ଭୁବନେଶ୍ୱର,୧୬।୭(ବ୍ୟୁରୋ): ଉଚ୍ଚଶିକ୍ଷା ମନ୍ତ୍ରଣାଳୟ ପକ୍ଷରୁ ଶୁକ୍ରବାର ଜାତୀୟ ଶିକ୍ଷାନୁଷ୍ଠାନ ମାନ୍ୟତା ବା ନ୍ୟାଶନାଲ ଇନଷ୍ଟିଚ୍ୟୁଶନାଲ ର଼୍ୟାଙ୍କିଙ୍ଗ୍ ଫ୍ରେମ୍ଓ୍ବାର୍କ (ଏନ୍ଆଇଆର୍ଏଫ୍) ପ୍ରକାଶ ପାଇଛି। ସାମଗ୍ରିକ ଭାବେ ଆଇଆଇଟି ମାଡ୍ରାସ ଶ୍ରେଷ୍ଠ ଶିକ୍ଷାନୁଷ୍ଠାନ ମାନ୍ୟତା ପାଇଥିବାବେଳେ ଏହି ର଼୍ୟାଙ୍କିଙ୍ଗ୍ରେ ଓଡ଼ିଶାର ୪ ଶିକ୍ଷାନୁଷ୍ଠାନ ସ୍ଥାନ ପାଇଛି। ସୋଆ ବିଶ୍ୱବିଦ୍ୟାଳୟ ୩୦ତମ ର଼୍ୟାଙ୍କରେ ଥିବାବେଳେ ୩୪ତମ ସ୍ଥାନରେ କିଟ୍, ୩୯ରେ ରାଉରକେଲା ଏନ୍ଆଇଟି ଓ ୬୫ତମ ସ୍ଥାନରେ ଭୁବନେଶ୍ୱର ଆଇଆଇଟି ରହିଛି। ତେବେ ଶ୍ରେଷ୍ଠ ୧୦୦ ତାଲିକାରେ ରାଜ୍ୟ ସରକାରଙ୍କ କୌଣସି ବି ଶିକ୍ଷାନୁଷ୍ଠାନ ସ୍ଥାନ ପାଇନାହିଁ। ଉତ୍କଳ ବିଶ୍ୱବିଦ୍ୟାଳୟ ଏହି ର଼୍ୟାଙ୍କିଙ୍ଗରେ ୧୦୧-୧୫୦ ମଧ୍ୟରେ ରହିଛି। ମହାବିଦ୍ୟାଳୟ ବର୍ଗରେ ଓଡ଼ିଶାକୁ ମଧ୍ୟ ନିରାଶ ହେବାକୁ ପଡ଼ିଛି। ରାଜ୍ୟର କୌଣସି ସରକାରୀ କିମ୍ବା ଘରୋଇ ମହାବିଦ୍ୟାଳୟ ଏହି ବର୍ଗରେ ସ୍ଥାନ ପାଇପାରିନାହାନ୍ତି। ତେବେ ବିଶ୍ୱବିଦ୍ୟାଳୟ ବର୍ଗରେ ଶ୍ରେଷ୍ଠ ୧୦୦ରେ ଓଡ଼ିଶାର ୩ଟି ବିଶ୍ୱବିଦ୍ୟାଳୟ ସ୍ଥାନ ପାଇଥିବା ବେଳେ ଗୋଟିଏ ସରକାରୀ ଶିକ୍ଷାନୁଷ୍ଠାନ ରହିଥିବା ଜଣାପଡ଼ିଛି। ସୋଆ ବିଶ୍ୱବିଦ୍ୟାଳୟ ୧୬ତମ ସ୍ଥାନରେ ଥିବାବେଳେ କିଟ୍ ୨୦ ଏବଂ ଉତ୍କଳ ବିଶ୍ୱବିଦ୍ୟାଳୟ ୮୮ ତମ ସ୍ଥାନରେ ରହିଛି। ଇଞ୍ଜିନିୟରିଂରେ ଏନ୍ଆଇଟ୍ ରାଉରକେଲାକୁ ୧୫, ସୋଆକୁ ୨୭, ଭୁବନେଶ୍ୱର ଆଇଆଇଟି ୩୬, କିଟ୍ ୪୨ ଓ ସିଭି ରମଣ କଲେଜକୁ ୯୮ ତମ ର଼୍ୟାଙ୍କ୍ ମିଳିଛି। ସ୍ବାସ୍ଥ୍ୟ ଶିକ୍ଷାରେ ଶ୍ରେଷ୍ଠ ୫୦ରେ ସୋଆ ୧୮, ଭୁବନେଶ୍ୱର ଏମ୍ସ ୨୬, କିଟ୍ ୩୦ ଓ ଏସ୍ସିବି ୪୪ତମ ସ୍ଥାନରେ ରହିଛି। ଗବେଷଣା ଶିକ୍ଷାନୁଷ୍ଠାନ ବର୍ଗରେ ଶ୍ରେଷ୍ଠ ୫୦ ଶିକ୍ଷାନୁଷ୍ଠାନ ମଧ୍ୟରେ ରାଉରକେଲା ଏନ୍ଆଇଟି ୨୪ତମ ର଼୍ୟାଙ୍କରେ ଥିବାବେଳେ ଆଇଆଇଟି ଭୁବନେଶ୍ୱର ୩୭, ସୋଆ ୪୫ ଓ କିଟ୍ ୪୭ତମ ସ୍ଥାନ ହାସଲ କରିଛି।
ସୂଚନାଯୋଗ୍ୟ, ଦେଶରେ ଉଚ୍ଚଶିକ୍ଷାର ମାନବୃଦ୍ଧି ତଥା ଏକ ସୁସ୍ଥ ପ୍ରତିଯୋଗିତାମୂଳକ ଶୈକ୍ଷିକ ବାତାବରଣ ସୃଷ୍ଟି ପାଇଁ ପ୍ରତିବର୍ଷ ଏନ୍ଆଇଆର୍ଏଫ୍ ଏଭଳି ର଼୍ୟାଙ୍କିଙ୍ଗ୍ ଘୋଷଣା କରିଥାଏ। ଶିକ୍ଷାନୁଷ୍ଠାନରେ ପାଠପଢ଼ା, ଭିତ୍ତିଭୂମି, ଗବେଷଣା, ଶିକ୍ଷାର ମାନ, ଶିକ୍ଷାର ବାତାବରଣ, ଛାତ୍ରୀଛାତ୍ରଙ୍କ ସଫଳତା ଭଳି ବିଭିନ୍ନ ମାନଦଣ୍ଡକୁ ଆଧାର କରି ଦେଶର ବିଭିନ୍ନ ଶିକ୍ଷାନୁଷ୍ଠାନ, ବିଶ୍ୱବିଦ୍ୟାଳୟଗୁଡିକୁ ୧୧ଟି ବର୍ଗରେ ରାଙ୍କିଙ୍ଗ୍ କରାଯାଇଥାଏ।
