ବିଲାସପୁର,୪।୧୧: ଛତିଶଗଡ଼ର ବିଲାସପୁର ଜିଲାର ଲାଲ ଖଦାନ ଅଞ୍ଚଳ ନିକଟ ବିଲାସପୁର-କଟନୀ ରେଳପଥରେ ମଙ୍ଗଳବାର କୋରବା ଯାତ୍ରୀବାହୀ ଟ୍ରେନ୍ ଠିଆ ହୋଇଥିବା ଏକ ମାଲବାହୀ ଟ୍ରେନ୍ ସହ ମୁହାଁମୁହିଁ ଧକ୍କା ହୋଇଛି। ଏଥିରେ ୬ ଜଣଙ୍କ ମୃତ୍ୟୁ ଘଟିଛି ଏବଂ ବହୁ ଆହତ ହୋଇଛନ୍ତି। ଧକ୍କାର ପ୍ରଚଣ୍ଡତା ଏତେ ଥିଲା ଯେ ଯାତ୍ରୀବାହୀ ଟ୍ରେନ୍ର ଅଗ ଇଞ୍ଜିନ୍ ଓ କୋଚ୍ଗୁଡ଼ିକ ସମ୍ପୂର୍ଣ୍ଣ ଧ୍ୱଂସ ହୋଇଯାଇଛି।
ବିଲାସପୁର ଏସପି ରାଜନୀଶ ସିଂହ ମୃତ୍ୟୁ ସଂଖ୍ୟା ୬ ବୋଲି ନିଶ୍ଚିତ କରିଛନ୍ତି। “ଉଦ୍ଧାର କାର୍ଯ୍ୟ ଜାରି ରହିଛି। ଆହତମାନଙ୍କୁ ନିକଟସ୍ଥ ହସ୍ପିଟାଲକୁ ସ୍ଥାନାନ୍ତର କରାଯାଉଛି,” ସେ କହିଛନ୍ତି। ରେଳବାଇ ଅଧିକାରୀମାନେ କହିଛନ୍ତି ଯେ ସମସ୍ତ ସମ୍ବଳ ଘଟଣାସ୍ଥଳକୁ ପଠାଯାଇଛି ଏବଂ ଆହତଙ୍କ ଚିକିତ୍ସା ପାଇଁ ସବୁ ବ୍ୟବସ୍ଥା କରାଯାଉଛି।
ରେଳ ଅଧିକାରୀ, ସ୍ଥାନୀୟ ପ୍ରଶାସନ ଓ ଏନଡିଆରଏଫ୍ ଟିମ୍ ତୁରନ୍ତ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି। ଧ୍ୱଂସାବଶେଷ ମଧ୍ୟରୁ ଜଣେ ଶିଶୁକୁ ନିରାପଦରେ ଉଦ୍ଧାର କରାଯାଇଛି। ଗମ୍ଭୀର ଆହତଙ୍କୁ ଟ୍ରେନ୍ ଭିତରେ ହିଁ ଡାକ୍ତରୀ ଚିକିତ୍ସା ଦିଆଯାଉଛି, କାରଣ ଧ୍ୱଂସାବଶେଷ ଯୋଗୁଁ ତୁରନ୍ତ ବାହାର କରିବା କଷ୍ଟସାଧ୍ୟ।
ଧକ୍କାରେ ଓଭରହେଡ୍ ବିଦ୍ୟୁତ୍ ତାର ଓ ସିଗନାଲିଙ୍ଗ୍ ସିଷ୍ଟମ୍ ବ୍ୟାପକ କ୍ଷତିଗ୍ରସ୍ତ ହୋଇଛି, ଯାହା ଫଳରେ ରେଳ ଯୋଗାଯୋଗ ବ୍ୟାହତ ହୋଇଛି। ଅନେକ ଏକ୍ସପ୍ରେସ୍ ଓ ଯାତ୍ରୀବାହୀ ଟ୍ରେନ୍ ବାତିଲ୍ କିମ୍ବା ଡାଇଭର୍ଟ କରାଯାଇଛି। ଆଟକି ରହିଥିବା ଯାତ୍ରୀଙ୍କ ପାଇଁ ବିକଳ୍ପ ଯାତାୟତ ବ୍ୟବସ୍ଥା କରାଯାଉଛି। ଟେକ୍ନିକାଲ୍ ଟିମ୍ ରାତିଭର କାମ କରି ଟ୍ରାକ୍ ଓ ବିଦ୍ୟୁତ୍ ସିଷ୍ଟମ୍ ମରାମତି କରୁଛନ୍ତି।
ଦୁର୍ଘଟଣାର କାରଣ ଜାଣିବା ପାଇଁ ରେଳ ଅଧିକାରୀମାନେ ତଦନ୍ତ ଆରମ୍ଭ କରିଛନ୍ତି। ପ୍ରାଥମିକ ରିପୋର୍ଟରେ ସିଗନାଲିଙ୍ଗ୍ ଫେଲ୍ୟୁର୍ କିମ୍ବା ମାନବୀୟ ଭୁଲ୍ ସମ୍ଭାବନା ରହିଛି।
ହେଲ୍ପଲାଇନ୍ ନମ୍ବର:
ଚାମ୍ପା ଜଙ୍କସନ୍: ୭୭୫୨୪୮୫୬୫୨
ରାଇଗଡ଼: ୭୭୫୨୪୮୫୬୦
ପାନ୍ଡ୍ରା ରୋଡ଼: ୭୭୫୨୪୮୫୬୨
ଘଟଣାସ୍ଥଳ: ୭୭୫୨୪୮୫୪୯୯, ୮୬୦୨୦୦୭୨୦୨
