ତାଇପେଇ, ୧୦।୪ : ତାଇଓ୍ବାନ ଆକାଶ ମାର୍ଗ ସୀମାରେ ୪ ଚାଇନା ବିମାନ ଅନୁପ୍ରବେଶ କରିଛି। ଏପ୍ରିଲ୍ ମାସର ପ୍ରଥମ ୮ ଦିନ ମଧ୍ୟରେ ଚାଇନା ବିମାନ ଏଭଳି ୭ ଥର ଅନୁପ୍ରବେଶ କରିଥିବା ତାଇଓ୍ବାନ ଅଭିଯୋଗ କରିଛି। ତାଇୱାନର ବାୟୁ ପ୍ରତିରକ୍ଷା ଅଞ୍ଚଳରେ ଚାଇନାର ବିମାନ ଶେନିଆଙ୍ଗ ଜେ -୧୧ ଯୁଦ୍ଧ ବିମାନ, ଶାନକ୍ସି -୮, ସିଏଆଇସିଡବ୍ଲ୍ୟୁଜେଡ୍-୧୦ ହେଲିକପ୍ଟର ଏବଂ ଏମ୍ଆଇ-୧୭ କାର୍ଗୋ ହେଲିକପ୍ଟର ଦେଖିବାକୁ ମିଳିଥିଲା।
ଏହି ସମସ୍ତ ବିମାନ ତାଇୱାନର ଦକ୍ଷିଣ-ପଶ୍ଚିମ ସେକ୍ଟରରେ ପ୍ରବେଶ କରିଥିଲେ। ଏହା ପରେ ତାଇୱାନ ପକ୍ଷରୁ ଚାଇନା ବିମାନକୁ ଚେତାବନୀ ଦିଆଯାଇଥିଲା। ତାଇୱାନର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ଏହାର ବାୟୁ ପ୍ରତିରକ୍ଷା କ୍ଷେତ୍ରର ସୁରକ୍ଷା ପାଇଁ କ୍ଷେପଣାସ୍ତ୍ର ପ୍ରତିରକ୍ଷା ପ୍ରଣାଳୀ ନିୟୋଜିତ କରାଯାଇଛି। ତାଇୱାନ କହିଛି ଯେ ଏପ୍ରିଲରେ ସପ୍ତମ ଥର ପାଇଁ ତାଇୱାନର ଆକାଶ ମାର୍ଗରେ ଚାଇନାର ବିମାନ ଦେଖିବାକୁ ମିଳିଛି।
ଚାଇନା ଦୀର୍ଘ ଦିନ ଧରି ତାଇୱାନକୁ ନିଜର ବୋଲି ଦାବି କରିଆସୁଛି। ତେବେ ଚାଇନା ଗତ କିଛି ମାସ ମଧ୍ୟରେ ତାଇୱାନ ଉପରେ ଅଧିକ ଆକ୍ରମଣାତ୍ମକ ହୋଇପଡିଛି। ଅନେକ ଥର ଚାଇନାର ବିମାନ ତାଇୱାନର ପ୍ରତିରକ୍ଷା କ୍ଷେତ୍ରକୁ ଅନୁପ୍ରବେଶ କରୁଛି।
ପ୍ରକୃତପକ୍ଷେ ତାଇୱାନ ଏବଂ ଆମେରିକା ମଧ୍ୟରେ ବଢୁଥିବା ଘନିଷ୍ଠତା ପାଇଁ ଚାଇନା ଚିନ୍ତିତ ହୋଇ ପଡ଼ିଛି। ଚାଇନା କହିଛି ଯେ ଯଦି ତାଇୱାନ ଏବଂ ତା ମଧ୍ୟରେ କୌଣସି ତୃତୀୟ ଦେଶ ଆସେ, ତେବେ ଏହାର ପରିଣାମ ଖରାପ ହୋଇପାରେ।
