ଝାରସୁଗୁଡା ଅଫିସ,୧୩।୧୨: ଝାରସୁଗୁଡା ସହରରେ ଗତ ୪ ତାରିଖରେ ଗୁଳିକାଣ୍ଡ ଘଟାଇ ଅଭିଯୁକ୍ତମାନେ ଫେରାର ହୋଇଯାଇଥିଲେ। ଏହି ଘଟଣାର ପର୍ଦ୍ଦାଫାସ କରି ପୋଲିସ ୧ ସପ୍ତାହ ପରେ ସୁଦୂର କୋଲକାତାରୁ ଫେରାର ୪ ଅଭିଯୁକ୍ତଙ୍କୁ ଗିରଫକରି ମଙ୍ଗଳବାର କୋର୍ଟ ଚାଲାଣ କରିଛି। ଗିରଫ ଅଭିଯୁକ୍ତମାନେ ହେଲେ ଦୀପକ ସାହୁ, ତାଙ୍କ ପୁଅ ଅର୍ଜୁନ ସାହୁ, ସହଯୋଗୀ ମୁନୁ ପାଣ୍ଡେ ଓ ବାବୁ ଖାନ ରହିଛନ୍ତି। ଏମାନଙ୍କ ନିକଟରୁ ପୋଲିସ ୨ ଦେଶୀ ବନ୍ଧୁକ, ୪ ଅଫୁଟା ଗୁଳି, ୪ ମୋବାଇଲ, ୫ ଖୋକା, ଗୁଳିକାଣ୍ଡରେ ବ୍ୟବହୃତ ସ୍କୋର୍ପିଓ ଆଦି ପୋଲିସ ଜବତ କରିଛି। ଏ ନେଇ ଏସପି ରାହୁଲ ଜୈନ ଖବରଦାତା ସମ୍ମିଳନୀରେ ସୂଚନା ଦେବାକୁ ଯାଇ କହିଛନ୍ତି, ଗତ ୪ ତାରିଖ ରାତିରେ ଅଭିଯୁକ୍ତମାନେ ବସ୍ଷ୍ଟାଣ୍ଡ ନିକଟରେ ବୁରୋମାଲ ରୋହିତ ଶାହା ନାମକ ବ୍ୟକ୍ତିଙ୍କୁ ବନ୍ଧୁକ ଦେଖାଇ ଜୀବନରୁ ମାରିଦେବା ପାଇଁ ଗୋଡାଇଥିଲେ। ଏହାର କିଛି ସମୟ ପରେ ସହରରେ ଥିବା କଳିଙ୍ଗାବାର୍ ସମ୍ମୁଖରେ ସମ୍ପୁକ୍ତ ଅଭିଯୁକ୍ତମାନେ ପୁରୁଣା ବସ୍ତିର ଛୋଟୁ ସିନ୍ଦିରିଆଙ୍କୁ ଗାଳିଗୁଲଜ କରିବା ସହ ତାଙ୍କ ଉପରକୁ ଗୁଳି ଚଳାଇଥିଲେ। ଏଥିରେ ଛୋଟୁ ଅଳ୍ପକେ ବର୍ତ୍ତିଯାଇଥିବା ବେଳେ ତାଙ୍କର କୌଣସି ପ୍ରକାର କ୍ଷତି ହୋଇ ନ ଥିଲା । ଏନେଇ ଉଭୟଙ୍କ ଅଭିଯୋଗକୁ ଭିତ୍ତିକରି ପୋଲିସ ଟାଉନ୍ ଥାନା ଓ ସଦର ଥାନାରେ ୨ଟି ପୃଥକ ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା । ଏହି ଘଟଣାର ପର୍ଦ୍ଦାଫାସ କରି ଫେରାର ଅଭିଯୁକ୍ତଙ୍କୁ ଧରିବାପାଇଁ ଏସଡିପିଓ ନିର୍ମଳ ମହାପାତ୍ରଙ୍କ ନେତୃତ୍ୟରେ ଏକ ସ୍ବତନ୍ତ୍ର ପୋଲିସ ଟିମ୍ ଗଠନ କରାଯାଇ ବିଭିନ୍ନ ସ୍ଥାନରେ ଚଢାଉକରି ଅଭିଯୁକ୍ତଙ୍କୁ ଧରାଯାଇଥିଲା।
