ନୂଆଦିଲ୍ଲୀ: ପାର୍ବଣରେ ରେଲଓ୍ବେ ୩୯୨ ସ୍ବତନ୍ତ୍ର ଟ୍ରେନ୍ ଚଳାଇବ। ଅକ୍ଟୋବର ୨୦ରୁ ନଭେମ୍ବର ୩୦ ମଧ୍ୟରେ ଏହି ଟ୍ରେନ୍ଗୁଡିକ ଚଳାଚଳ କରିବ। ସ୍ପେଶାଲ ଟ୍ରେନରେ ଲାଗୁ ଥିବା ଭଡା ଭଳି ଏହି ଟ୍ରେନଗୁଡିକର ଭଡା ସମାନ ରହିବ। ମେଲ୍ ଏବଂ ଏକ୍ସପ୍ରେସ୍ ଟ୍ରେନ ତୁଳରେ ଏହି ସମୟରେ ଯାତ୍ରୀ ଭଡା ୧୦ରୁ ୩୦% ବଢିବ। ଏହା ଟ୍ରାଭେଲ ଏବଂ କ୍ଲାସ ଉପରେ ନିର୍ଭର କରିବ ବୋଲି ଜଣାପଡିଛି। ଯାତ୍ରୀ ଚାହିଦାକୁ ଧ୍ୟାନରେ ରଖି କୋଲକାତା, ପାଟନା, ବାରାଣସୀ ଏବଂ ଲକ୍ଷ୍ନୌ ଭଳି ସହର ଅନ୍ୟ ସହରକୁ ମଧ୍ୟ ଯାତ୍ରୀ ସେବା ପ୍ରଦାନ କରାଯିବା ନେଇ ଲକ୍ଷ୍ୟ ରଖାଯାଇଛି। ଦୁର୍ଗାପୂଜା, ଦୀପାବଳି ଏବଂ ଛଟ୍ ପୂଜା ଭଳି ବିଭିନ୍ନ ପର୍ବପର୍ବାଣିରେ ସାଧାରଣତଃ ଲୋକମାନେ ନିଜ ନିଜ ବାସସ୍ଥାନକୁ ପ୍ରତ୍ୟାବର୍ତ୍ତନ କରିଥାନ୍ତି। ଏହି ସମୟରେ ଟ୍ରେନ୍ରେ ଅନେକ ଲୋକ ଯିବା ଆସିବା କରିଥାନ୍ତି। ବର୍ତ୍ତମାନ ସାରା ଦେଶରେ ୬୬୬ ମେଲ୍, ଏକ୍ସପ୍ରେସ ଏବଂ ସ୍ପେଶାଲ ଟ୍ରେନ ସାରା ଦେଶରେ ଚଳାଚଳ କରୁଛି। ସେହିଭଳି ମୁମ୍ବାଇ ଭଳି ସହରଗୁଡିକରେ କେତେକ ସହରତଳି ଟ୍ରେନ ଏବଂ କଲିକତା ମେଟ୍ରୋର କିଛି ଟ୍ରେନ ଚଳାଚଳ କରୁଛି। ପୂଜା ସ୍ପେଶାଲ ଟ୍ରେନଗୁଡିକ ୫୫ କିମି ପ୍ରତି ଘଣ୍ଟା ବେଗରେ ଚଳାଚଳ କରିବ।
କରୋନା ମହାମାରୀକୁ ନିୟନ୍ତ୍ରଣ କରିବା ଲାଗି ରେଲଓ୍ବେ ମାର୍ଚ୍ଚ ୨୫ ପରଠାରୁ ନିୟମିତ ଟ୍ରେନ ଚଳାଚଳ ଉପରେ କଟକଣା ଲଗାଇଛି। ଚାହିଦା ଏବଂ ଆବଶ୍ୟକତା ଆଧାରରେ ବିଭିନ୍ନ ଟ୍ରେନ ଚଳାଚଳ ଉପରେ କାର୍ଯ୍ୟପନ୍ଥା ଗ୍ରହଣ କରାଯାଉଛି। ମେ ୧୨ ପରଠାରୁ କେତେକ ସ୍ବତନ୍ତ୍ର ଟ୍ରେନ ଦେଶ ମଧ୍ୟରେ ଚଳାଚଳ କରୁଛି। ପ୍ରାଥମିକ ପର୍ଯ୍ୟାୟରେ ୧୫ ଯୋଡ଼ା ରାଜଧାନୀ ଟ୍ରେନ୍ ଚଳାଚଳ କରିଥିଲା। ଏହା ପରେ ଜୁନରୁ ୧୦୦ ଯୋଡ଼ା ଟ୍ରେନ ପୁଣି ଥରେ ଯୋଡ଼ାଯାଇଥିଲା। ସେହିଭଳି ସେପ୍ଟେମ୍ବରରୁ ଆଉ ୮୦ଟ୍ରେନ ଏଥିରେ ଯୋଡ଼ାଯାଇଛି। ଆବଶ୍ୟକତାକୁ ବିଚାରକରି ପୁଣି ଟ୍ରେନ ଚଳାଚଳ ଉପରେ ବିଭିନ୍ନ ନିଷ୍ପତ୍ତି ଗ୍ରହଣ କରାଯାଉଥିବା ରେଳ ବୋର୍ଡ ଅଧ୍ୟକ୍ଷ ଭି.କେ. ଯାଦବ ସୂଚନା ଦେଇଛନ୍ତି।
