ନୂଆଦିଲ୍ଲୀ,୩ା୫: ଗତ ୩ ବର୍ଷ ମଧ୍ୟରେ ଭାରତର ପ୍ରାୟ ୩୯% ପରିବାର ଅନ୍ଲାଇନ୍ରେ ଆର୍ଥିକ ଠକେଇର ଶିକାର ହୋଇଥିବା ଏକ ସର୍ଭେରୁ ଜଣାପଡ଼ିଛି। ଲୋକାଲ୍ ସର୍କଲ ପକ୍ଷରୁ କରାଯାଇଥିବା ଏହି ସର୍ବେକ୍ଷଣରେ ସାମିଲ ପରିବାରଗୁଡ଼ିକ ମଧ୍ୟରୁ ମାତ୍ର ୨୪% ସେମାନଙ୍କ ଅର୍ଥ ଫେରିପାରିଥିବା କହିଛନ୍ତି।
ମଙ୍ଗଳବାର ପ୍ରକାଶିତ ଉକ୍ତ ରିପୋର୍ଟରେ କୁହାଯାଇଛି ଯେ, କ୍ରେଡିଟ୍ କିମ୍ବା ଡେବିଟ୍ କାର୍ଡ ଜରିଆରେ ସର୍ବାଧିକ ୨୩% ଠକେଇର ଶିକାର ହୋଇଛନ୍ତି। କିଣାବିକା ବେଳେ ଓ କ୍ଲାସିଫାଏଡ୍ ସାଇଟ୍ ଜରିଆରେ ୧୩% ୟୁଜର୍ସ ନିଜ ଟଙ୍କା ହରାଇଛନ୍ତି। ୧୩ ପ୍ରତିଶତଙ୍କ ଠାରୁ ବିଭିନ୍ନ ଓ୍ବେବ୍ସାଇଟ୍ରେ ଟଙ୍କା ନିଆଯାଇଥିଲେ ହେଁ ଅର୍ଡର ସାମଗ୍ରୀ ସେମାନଙ୍କୁ ଡେଲିଭର କରାଯାଇ ନାହିଁ। ୧୦% ଲେଖାଏ ଏଟିଏମ୍ କାର୍ଡ ଏବଂ ବ୍ୟାଙ୍କ ଆକାଉଣ୍ଟ ତଥ୍ୟା ୧୬% ଅନ୍ୟ ପ୍ରକାର ଠକେଇର ଶିକାର ହୋଇଛନ୍ତି। ତଥ୍ୟରୁ ଜଣାପଡ଼ିଛି ଯେ, ସର୍ଭେରେ ସାମିଲ ହୋଇଥିବା ୟୁଜର୍ସଙ୍କ ମଧ୍ୟରୁ ୩୦% ପରିବାରର ଜଣେ ଲେଖାଏ ସଦସ୍ୟ ଠକେଇରେ ପଡ଼ିଛନ୍ତି। ୯ ପ୍ରତିଶତଙ୍କ ପରିବାରର ଏକାଧିକ ସଦସ୍ୟ ଗତ ୩ ବର୍ଷ ମଧ୍ୟରେ ଆର୍ଥିକ ଠକେଇର ଶିକାର ହୋଇଛନ୍ତି। ଅବଶିଷ୍ଟ ୫୭% ଏଭଳି ଜାଲରେ ଫସିବାରୁ ବର୍ତ୍ତିଯାଇଥିବା କହିଛନ୍ତି। ୪% କୌଣସି ଉତ୍ତର ଦେଇନାହାନ୍ତି। ଦେଶର ୩୩୧ ଜିଲାର ପ୍ରାୟ ୩୨,୦୦୦ ଉତ୍ତରଦାତାଙ୍କୁ ଏହି ସର୍ଭେରେ ସାମିଲ କରାଯାଇଥିଲା। ସେମାନଙ୍କ ମଧ୍ୟରୁ ୬୬% ପୁରୁଷ ଓ ୩୪% ମହିଳା। ୧୮% ନିଜ ଟଙ୍କା ଫେରିପାଇବା ପାଇଁ ସମ୍ପୃକ୍ତ ପ୍ଲାଟ୍ଫର୍ମରେ ଅଭିଯୋଗ ଦାଖଲ କରିଥିବାବେଳେ ୬% ଉଚ୍ଚ କର୍ତ୍ତୃପକ୍ଷଙ୍କ ଦ୍ୱାରସ୍ଥ ହୋଇଛନ୍ତି। ୪୧% ୟୁଜର୍ସ ସେମାନଙ୍କ ଅଭିଯୋଗର ଶୁଣାଣି ହୋଇ ନ ଥିବା କହିଥିବାବେଳେ ୧୭% କେଉଁଠି କମ୍ପ୍ଲେନ୍ ଫାଇଲ୍ କରିବେ ତାହା ଜାଣିନାହାନ୍ତି।
