ଭବାନୀପାଟଣା,୨୦।୧୦(ସ୍ବ.ପ୍ର.): କଳାହାଣ୍ଡି ଜିଲା ଭବାନୀପାଟଣା ବ୍ଲକ ଶିକ୍ଷା ଅଧିକାରୀ(ବିଇଓ)ଙ୍କ କାର୍ଯ୍ୟାଳୟର ଆକାଉଣ୍ଟାଣ୍ଟ ଶୁଚିସ୍ମିତା ସୁଆର ଟଙ୍କା ହଡ଼ପ କରିଥିବା ମାମଲା ନେଇ ଟାଉନ ଥାନା ପୋଲିସ ତଦନ୍ତ ଆରମ୍ଭ କରିଛି। ଏହି ଘଟଣାରେ ଶୁଚିସ୍ମିତାଙ୍କ ସହ ସାମିଲ ଥିବା ଅଭିଯୋଗରେ ପୋଲିସ ବୁଧବାର ରାତିରେ ୩ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ଶୁଚିସ୍ମିତାଙ୍କ ଭିଣୋଇ ବରଗଡ଼ ଅମ୍ବାପାଲିର ୧୭ ନମ୍ବର ୱାର୍ଡର ଗଙ୍ଗାଧର ପୂଝାରୀ(୪୬), ବରଗଡ଼ ୱାର୍ଡ ନଂ.୧୩ ମହାନ୍ତିପଡ଼ାର ଗୋପାଳକୃଷ୍ଣ ଦାସ(୪୯) ଓ ଭବାନୀପାଟଣା ସହରସ୍ଥିତ ରାମନଗରପଡ଼ାର ଶିକ୍ଷକ ପୂର୍ଣ୍ଣଶଶୀ ମହାନ୍ତି(୩୯)।
ସେହିପରି ଭିଜିଲାନ୍ସ ପକ୍ଷରୁ ଜମିପଟ୍ଟା ଯାଞ୍ଚ ନିମନ୍ତେ ରାଜସ୍ବ ନିରୀକ୍ଷକଙ୍କୁ ଚିଠି କରାଯାଇଛି। ଇରିଗେଶନ କଲୋନୀରେ ଥିବା ଶୁଚିସ୍ମିତାଙ୍କ ଏକ ଘର ପୂର୍ବରୁ ଭିଜିଲାନ୍ସ ସିଲ କରିଥିବା ବେଳେ ବର୍ତ୍ତମାନ ଅନ୍ୟ ଏକ ଘରକୁ ମଧ୍ୟ ଜବତ କରିଥିବା ସୂଚନା ମିଳିଛି।
ଭବାନୀପାଟଣା ସଦର ବିଇଓ ଅଫିସ ଆକାଉଣ୍ଟାଣ୍ଟ ଶୁଚିସ୍ମିତା ୩୯ ଲକ୍ଷରୁ ଅଧିକ ଟଙ୍କା ନିଜ ବ୍ୟକ୍ତିଗତ ଆକାଉଣ୍ଟକୁ ଟ୍ରାନ୍ସଫର ଘଟଣା ସାଧାରଣରେ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି। ଏହି ଘଟଣାରେ ଉଭୟ ଟାଉନ ଥାନା ପୋଲିସ ଓ ଭିଜିଲାନ୍ସ ପକ୍ଷରୁ ଖୋଳତାଡ ଆରମ୍ଭ ହୋଇଛି। ଟାଉନ ଥାନା ପୋଲିସ ମଙ୍ଗଳବାର ରାତିରେ ଉପରୋକ୍ତ ୩ଜଣଙ୍କୁ ଆଣି ଥାନାରେ ଜେରା କରିଥିଲା। ଅର୍ଥ ହେରଫେରରେ ଶୁଚିସ୍ମିତାଙ୍କ ସହ ଏହି ୩ ଜଣ ସମ୍ପୃକ୍ତି ଥିବା ଜଣାପଡିଥିଲା। ଅନ୍ୟପକ୍ଷେ ଟାଉନ ଥାନା ଅତିରିକ୍ତ ଇନ୍ସପେକ୍ଟର ରନିତା ପ୍ରଧାନ ଘଟଣାର ଅଧିକ ତଦନ୍ତ ଚଲାଇଛନ୍ତି।
ସେହିପରି ଭିଜିଲାନ୍ସ ବିଭାଗ ଆକ୍ସିସ ବ୍ୟାଙ୍କର ଭୁବନେଶ୍ବର କାର୍ଯ୍ୟାଳୟ ସହ ଯୋଗାଯୋଗ କରି ବିଭିନ୍ନ ତଥ୍ୟ ମାଗିଥିବା ଜଣାପଡିଛି। ଏପରିକି ରେଜିଷ୍ଟ୍ରେଶନ ଅଫିସରେ ଶୁଚିସ୍ମିତାଙ୍କ ବିଭିନ୍ନ ଜମିର ପଞ୍ଜିକରଣ ତଥ୍ୟ ମଗାଯାଇଛି। ଗୋଟିଏ ପ୍ଲଟର ତଥ୍ୟ ଭିଜିଲାନ୍ସର ହସ୍ତଗତ ହୋଇଥିବା ବେଳେ ଅନ୍ୟ ତଥ୍ୟ ପାଇଁ ଉଦ୍ୟମ ଜାରି ରହିଛି। ସେହିପରି, ହିଲ ଟାଉନରେ ଥିବା ପ୍ଲଟ ଉପରେ ଭିଜିଲାନ୍ସର ଖୋଳତାଡ଼ ଆରମ୍ଭ କରିଛି। ଅନ୍ୟପକ୍ଷେ ଘଟଣାକୁ ୧୩ ଦିନ ବିତିଯାଇଥିଲେ ମଧ୍ୟ ଫେରାର ଶୁଚିସ୍ମିତାଙ୍କୁ ପୋଲିସ ଠାବ କରି ପାରିନାହିଁ।
