ନୂଆଦିଲ୍ଲୀ,୩୦ା୯: ଭାରତୀୟ କ୍ରିକେଟ ଦଳର ଅଭିଜ୍ଞ ଦ୍ରୁତ ବୋଲର ଉମେଶ ଯାଦବ ୩୮ ବର୍ଷ ବୟସରେ ଏକ ନୂଆ ଦଳରୁ ଖେଳିବାର ସୁଯୋଗ ପାଇଛନ୍ତି। ଆଗାମୀ ଘରୋଇ କ୍ରିକେଟ ସିଜନ ପାଇଁ ପଞ୍ଜାବ କ୍ରିକେଟ ଆସୋସିଏସନ (PCA) ତାଙ୍କୁ ଗେଷ୍ଟ ପ୍ଲେୟାର ଭାବେ ସାଇନ୍ କରିଛି, ଯେଉଁଠାରେ ସେ ସବୁ ଫର୍ମାଟରେ ଖେଳୁଥିବାର ନଜର ଆସିବେ। ଗତବର୍ଷ ବିଦର୍ଭ ଦଳରୁ ଓହରିଯିବା ପରେ ଏବେ ସେ ପଞ୍ଜାବ ପାଇଁ ଘରୋଇ କ୍ରିକେଟ ଖେଳିବେ। ପଞ୍ଜାବ କ୍ରିକେଟ ଆସୋସିଏସନର ସଭାପତି ଅମରଜୀତ ସିଂହ ମେହେଟ୍ଟା କହିଛନ୍ତି ଯେ ଉମେଶଙ୍କ ଯୋଗଦାନ ଦ୍ୱାରା ପଞ୍ଜାବର ବୋଲିଂ ଆକ୍ରମଣ ଅଧିକ ଶକ୍ତିଶାଳୀ ହେବ।
ଦୀର୍ଘ ଦିନରୁ ଟିମ୍ ଇଣ୍ଡିଆ ଓ ଆଇପିଏଲ୍ରୁ ବାହାରେ ଥିବା ଉମେଶ ୨୦୨୩ରେ ଶେଷ ଥର ପାଇଁ ଭାରତ ପାଇଁ ଟେଷ୍ଟ ମ୍ୟାଚ୍ ଖେଳିଥିଲେ ଏବଂ ୨୦୨୪ ପରଠାରୁ ଆଇପିଏଲ୍ରେ ମଧ୍ୟ ସୁଯୋଗ ପାଇନାହାନ୍ତି। ସେ ଭାରତ ପାଇଁ ୫୭ଟି ଟେଷ୍ଟ ମ୍ୟାଚ୍ରେ ୧୭୦ଟି ୱିକେଟ୍ ଏବଂ ଏକଦିବସୀୟରେ ୧୦୬ଟି ଉଇକେଟ ନେଇଛନ୍ତି, ଯେତେବେଳେ କି ଫାର୍ଷ୍ଟ କ୍ଲାସ କ୍ରିକେଟରେ ତାଙ୍କ ନାମରେ ୩୮୦ଟି ଉଇକେଟ ରହିଛି। ନିକଟରେ କ୍ରିକେଟ ବିଶେଷଜ୍ଞ ଭାବେ ନଜର ଆସିଥିବା ଏହି ଅଭିଜ୍ଞ ଖେଳାଳି ଏବେ ପଞ୍ଜାବର ଯୁବ ଦ୍ରୁତ ବୋଲରଙ୍କ ସହ ନିଜର ଅଭିଜ୍ଞତା ବାଣ୍ଟିବେ।
ପଞ୍ଜାବ ଦଳ ଦୀର୍ଘ ୩୩ ବର୍ଷ ହେବ ରଣଜୀ ଟ୍ରଫି ଜିତିପାରି ନାହିଁ। ଶେଷଥର ପାଇଁ ୧୯୯୨-୯୩ ସିଜନରେ ପଞ୍ଜାବ ଚାମ୍ପିୟନ ହୋଇଥିବା ବେଳେ ୧୯୯୪-୯୫ ଓ ୨୦୦୪-୦୫ରେ ଫାଇନାଲରେ ପହଞ୍ଚି ମଧ୍ୟ ପରାଜିତ ହୋଇଥିଲା। ଆଗାମୀ ସିଜନରେ ଶୁଭମନ ଗିଲ୍, ଗୁରନୁର ବ୍ରାର ଓ ଅର୍ଶଦୀପ ସିଂହଙ୍କ ଭଳି ଖେଳାଳି ଦଳ ସହ ଯୋଡ଼ିହେବାର ସମ୍ଭାବନା ଥିବା ବେଳେ ଉମେଶ ଯାଦବଙ୍କ ଉପସ୍ଥିତି ଦଳର ବୋଲିଂ ବିଭାଗକୁ ନୂଆ ଶକ୍ତି ଯୋଗାଇବ।