ଭୁବନେଶ୍ୱର,୯ା୧୦(ଅନିଲ ଦାସ):ବାୟୁ ଏବଂ ଶବ୍ଦ ପ୍ରଦୂଷଣକୁ ରୋକିବା ସହ ସାଧାରଣ ପରିବହନ ଖର୍ଚ୍ଚକୁ ହ୍ରାସ କରିବା ପାଇଁ ରାଜ୍ୟର ସହରାଞ୍ଚଳରେ ଇଲେକ୍ଟ୍ରିକ ବସ୍ ସେବାକୁ ତ୍ୱରାନ୍ବିତ କରାଯିବ। ଏ ନେଇ ରାଜ୍ୟ ସରକାର ୪୦୦ ଇ-ବସ୍ ଯୋଗାଇ ଦେବାକୁ କେନ୍ଦ୍ର ସରକାରଙ୍କୁ ପ୍ରସ୍ତାବ ଦେଇଛନ୍ତି। ସେଥିରୁ ପ୍ରଥମ ପର୍ଯ୍ୟାୟରେ ୨୦୦ ବସ୍ ଯୋଗାଇବାକୁ କେନ୍ଦ୍ର ସରକାର ଅନୁମୋଦନ କରିଛନ୍ତି। ଇତିମଧ୍ୟରେ ୪୫ଟି ଇ-ବସ୍ ପହଞ୍ଚିଛି। ଅବଶିଷ୍ଟ ଆସନ୍ତା ଡିସେମ୍ବର ସୁଦ୍ଧା ପହଞ୍ଚିବ ବୋଲି ଅର୍ବାନ କ୍ୟାପିଟାଲ ରିଜିଅନ ଟ୍ରାନ୍ସପୋର୍ଟ(କ୍ରୁଟ)ର ଜଣେ ଅଧିକାରୀ କହିଛନ୍ତି। ଭୁବନେଶ୍ୱର, କଟକ ଓ ରାଉରକେଲା ସହର ଓ ଏହାର ଆଖପାଖ ଅଞ୍ଚଳରେ ୧୦୦ଟି ଲେଖାଏ ଏବଂ ସମ୍ବଲପୁରରେ ୫୦ଟି ବସ୍ ଚଳାଚଳ କରିବ। ଏଥିସହିତ ରାଜ୍ୟର ଅନ୍ୟାନ୍ୟ ସହରାଞ୍ଚଳରେ ମଧ୍ୟ ଇ-ବସ୍ ସେବା ଆରମ୍ଭ କରାଯିବ। ପ୍ରଧାନମନ୍ତ୍ରୀ ଇ-ବସ୍ ସେବା ଯୋଜନାରେ ଇଲେକ୍ଟ୍ରି ବସ୍ଗୁଡ଼ିକୁ କେନ୍ଦ୍ର ସରକାର ରାଜ୍ୟଗୁଡ଼ିକୁ ଯୋଗାଇଦେବେ। ଇ-ବସ୍ ଯୋଜନାରେ ଦେଶର ୧୬୯ ସହରରେ ୧୦ ହଜାର ଇ-ବସ୍ ଚଳାଚଳ କରିବ। ଏହି ଯୋଜନାରେ କେନ୍ଦ୍ର ସରକାର ୨୦ରୁ ୪୦ ଲକ୍ଷ ଜନସଂଖ୍ୟା ଥିବା ସହର ପାଇଁ ୧୫୦, ୧୦ରୁ ୨୦ ଲକ୍ଷ ଜନସଂଖ୍ୟା ପାଇଁ ୧୦୦, ୫ରୁ ୧୦ ଲକ୍ଷ ଜନସଂଖ୍ୟା ପାଇଁ ୧୦୦ ଏବଂ ୫ ଲକ୍ଷ ଓ ଏହାଠାରୁ କମ୍ ଜନସଂଖ୍ୟା ସହର ପାଇଁ ୫୦ଟି ଇ-ବସ୍ ଯୋଗାଇଦେବେ। ଜନସଂଖ୍ୟା ଦୃଷ୍ଟିରୁ ଭୁବନେଶ୍ୱର, କଟକ ଓ ରାଉରକେଲା ସହର ଜନସଂଖ୍ୟା ୫ରୁ ୧୦ ଲକ୍ଷ ମଧ୍ୟରେ ରହିଛି। ଏହି ସହର ପାଇଁ ୧୦୦ଟି ଲେଖାଏ ଇ-ବସ୍ କେନ୍ଦ୍ର ସରକାର ଯୋଗାଇ ଦେବେ। ଏଥିସହିତ ରାଜ୍ୟର ୫ ଲକ୍ଷ ଓ ଏହାଠାରୁ କମ୍ ଜନସଂଖ୍ୟା ସହରକୁ ୫୦ ଲେଖାଏ ଯୋଗାଇ ଦେବେ। ପ୍ରଥମ ପର୍ଯ୍ୟାୟରେ ରାଜ୍ୟ ସରକାର ୪୦୦ ବସ୍ ଯୋଗାଇ ଦେବାକୁ ପ୍ରସ୍ତାବ ଦେଇଛନ୍ତି। ରାଜ୍ୟର ଅନ୍ୟ ସହରଗୁଡ଼ିକରେ କେତେ ବସ୍ ଆବଶ୍ୟକ ସେ ନେଇ ଗୃହ ନିର୍ମାଣ ଓ ନଗର ଉନ୍ନୟନ ବିଭାଗ ଆକଳନ ପରେ କେନ୍ଦ୍ର ସରକାରଙ୍କୁ ପ୍ରସ୍ତାବ ଦିଆଯିବ ବୋଲି ପରିବହନ ବିଭାଗର ଜଣେ ଅଧିକାରୀ କହିଛନ୍ତି।
