ଭଦ୍ରକ,୨୭ା୧୦(ସନାତନ ରାଉତ): ବାପାଙ୍କ ଯନ୍ତ୍ରଣା ସହିପାରିଲେନି। ସାହି ପଡ଼ୋଶୀ କେହି ସହଯୋଗର ହାତ ବଢ଼ାଇଲେନି। ଆମ୍ବୁଲାନ୍ସ ସହ ଯୋଗାଯୋଗ ହୋଇପାରିଲାନି। ଶେଷରେ ଚିକିତ୍ସା ପାଇଁ ବାପାଙ୍କୁ ଟ୍ରଲିରେ ବସାଇ ୩୫ କି.ମି. ବୋହି ଡାକ୍ତରଖାନା ନେଲେ ନାବାଳିକା ଝିଅ। ଡାକ୍ତରଖାନାରେ ଚିକିତ୍ସା ପରେ ପୁଣି ବାପାଙ୍କୁ ଟ୍ରଲିରେ ବସାଇ ଘରକୁ ଫେରୁଥିଲେ ଭଦ୍ରକ ଜିଲା ଧାମନଗର ବ୍ଲକ ଅଧୀନ ନଦୀଗାଁର ସୁଜାତା ସେଠୀ(୧୪)। ଜିଲାପାଳଙ୍କ କାର୍ଯ୍ୟାଳୟଠାରୁ କିଛି ଦୂରରେ ଗୁରୁବାର ମଧ୍ୟାହ୍ନରେ ଏଭଳି ଘଟଣା ଦେଖି କେତେଜଣ ଗଣମାଧ୍ୟମ ପ୍ରତିନିଧି ସେମାନଙ୍କୁ ଅଟକାଇଥିଲେ। ଏହାପରେ ବାପ-ଝିଅଙ୍କଠାରୁ ସମ୍ପୂର୍ଣ୍ଣ ଘଟଣା ବୁଝିଥିଲେ।
ଘଟଣାରୁ ପ୍ରକାଶ ଯେ, ନଦୀଗଁା ନିବାସୀ ଶମ୍ଭୁନାଥ ସେଠୀ ଜଣେ ଟ୍ରଲି ଚାଳକ। ଗତ ୨୪ ତାରିଖରେ ଜମିଜମା ବିବାଦକୁ ନେଇ ତାଙ୍କର ପଡ଼ୋଶୀଙ୍କ ସହ ଗଣ୍ଡଗୋଳ ହୋଇଥିଲା। ଏଥିରେ ଶମ୍ଭୁନାଥଙ୍କର ହାତ ଭାଙ୍ଗିଯାଇଥିଲା। କାହାରିଠାରୁ ସାହାଯ୍ୟ ନ ମିଳିବାରୁ ଆମ୍ବୁଲାନ୍ସକୁ ଯୋଗାଯୋଗ କରି ନ ପାରି ଝିଅ ସୁଜାତା ସେହିଦିନ ଶମ୍ଭୁଙ୍କୁ ନିଜ ଟ୍ରଲିରେ ବସାଇ ପ୍ରଥମେ ଧାମନଗର ଡାକ୍ତରଖାନାକୁ ନେଇଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ତାଙ୍କୁ ଭଦ୍ରକ ଜିଲା ମୁଖ୍ୟ ଚିକିତ୍ସାଳୟକୁ ନେବାକୁ କୁହାଯାଇଥିଲା। ସୁଜାତା ଶମ୍ଭୁଙ୍କୁ ଟ୍ରଲିରେ ନେଇ ଜିଲା ମୁଖ୍ୟ ଡାକ୍ତରଖାନାରେ ଭର୍ତ୍ତି କରିଥିଲେ। ଏଭଳି ୩୫ କି.ମି. ସେ ଟ୍ରଲି ଚଲାଇ ଆସିଥିଲେ। ୨ ଦିନ ଚିକିତ୍ସା କରାଯାଇ ୭ ଦିନ ପରେ ଭାଙ୍ଗିଥିବା ହାତର ଅସ୍ତ୍ରୋପଚାର ହେବ ବୋଲି ଡାକ୍ତର ପରାମର୍ଶ ଦେଇ ଗୁରୁବାର ତାଙ୍କୁ ଡିସ୍ଚାର୍ଜ କରିଥିଲେ। ଏଣୁ ସୁଜାତା ବାପାଙ୍କୁ ଧରି ଘରକୁ ଫେରୁଥିଲେ। ବାଟରେ ଗଣମାଧ୍ୟମ ପ୍ରତିନିଧି ସେମାନଙ୍କୁ ପଚାରି ବୁଝୁଥିବା ବେଳେ ସେହି ରାସ୍ତା ଦେଇ ଯାଉଥିବା ଭଦ୍ରକ ବିଧାୟକ ସଞ୍ଜୀବ ମଲ୍ଲିକ ଓ ଧାମନଗରର ପୂର୍ବତନ ବିଧାୟକ ରାଜେନ୍ଦ୍ର ଦାସ ପହଞ୍ଚତ୍ ଘଟଣା ବିଷୟରେ ଅବଗତ ହୋଇଥିଲେ। ବିଧାୟକ ମଲ୍ଲିକ ଘଟଣାର ଗୁରୁତ୍ୱକୁ ବୁଝି ଜିଲା ମୁଖ୍ୟ ଚିକିତ୍ସାଧିକାରୀଙ୍କୁ ଜିଲାପାଳଙ୍କ କାର୍ଯ୍ୟାଳୟ ନିକଟସ୍ଥ ଘଟଣାସ୍ଥଳକୁ ଡାକିଥିଲେ। ମୁଖ୍ୟ ଚିକିତ୍ସାଧିକାରୀ ଡା. ସନ୍ତୋଷ ପାତ୍ର ସେଠାରେ ପହଞ୍ଚତ୍ ସମସ୍ତ ଘଟଣା ଅବଗତ ହେବା ପରେ ଆମ୍ବୁଲାନ୍ସ ବ୍ୟବସ୍ଥା କରାଇ ବାପ ଝିଅଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ଫେରାଇ ନେଇ ଅଧିକ ଚିକିତ୍ସା ବ୍ୟବସ୍ଥା କରିଛନ୍ତି। ସେମାନେ ଏବେ ହସ୍ପିଟାଲରେ ରହିବେ ଏବଂ ୭ ଦିନ ବଦଳରେ ଯେତେଶୀଘ୍ର ହୋଇପାରିବ ଶମ୍ଭୁଙ୍କ ଅସ୍ତ୍ରୋପଚାର କରାଯିବ ବୋଲି ଡା. ପାତ୍ର ପ୍ରତିଶ୍ରୁତି ଦେଇଛନ୍ତି।
