ଭଦ୍ରକ ଅଫିସ, ୧୬।୨: ଭଦ୍ରକ ଜିଲାକୁ ସରକାରଙ୍କ ପକ୍ଷରୁ ମିଳିଥିବା ଟାର୍ଗେଟ୍ ସରି ଆସୁଥିବା ବେଳେ ଧାନ ବିକି ନ ପାରିବା ନେଇ ଚାଷୀଙ୍କ ଅସନ୍ତୋଷ ବଢ଼ି ଚାଲିଛି। ଧାନ ବିକି ପାରି ନ ଥିବା ଚାଷୀମାନେ ବିଭିନ୍ନ ସମୟରେ ରାସ୍ତାରୋକୋ କରୁଛନ୍ତି ତ ବିଭିନ୍ନ ମଣ୍ଡିରେ ଏହାକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହେଉଛି। ଅପରପକ୍ଷେ ଟୋକନ ବାତିଲ ହେଉଥିବା ଚାଷୀମାନେ ରାଜ୍ୟ ବାହାରୁ ଆସୁଥିବା ଦଲାଲମାନଙ୍କୁ ଧାନ ବିକିବାକୁ ବାଧ୍ୟ ହେଉଛନ୍ତି। ଜିଲାର ବିଭିନ୍ନ ବ୍ଲକରୁ ଶତାଧିକ ଟ୍ରକ୍ ଧାନ ଲୋଡ୍ ହୋଇ ବାହାର ରାଜ୍ୟକୁ ଚାଲାଣ ହେଉଥିବା ଦେଖିବାକୁ ମିଳୁଛି।
ଚଳିତବର୍ଷ ଖରିଫ ଧାନ ବିକ୍ରି ପାଇଁ ୮୯,୧୩୩ ଚାଷୀ ପଞ୍ଜୀକୃତ ହୋଇଥିବା ବେଳେ ଏପର୍ଯ୍ୟନ୍ତ ପ୍ରାୟ ୫୫ ହଜାର ଜଣ ଧାନ ବିକ୍ରି କରିଥିବା ଯୋଗାଣ ନିଗମ ପକ୍ଷରୁ ସୂଚନା ମିଳିଛି। ଆହୁରି ୩୪ ହଜାର ଚାଷୀ ଧାନ ବିକ୍ରି ଅପେକ୍ଷାରେ ଥିବାବେଳେ ସରକାରଙ୍କ ପକ୍ଷରୁ ମଣ୍ଡିକୁ ଅଧିକ ଟାର୍ଗେଟ ଦିଆଯାଇ ନାହିଁ। ଜିଲାରୁ ୨୬ ଲକ୍ଷ ୧୩ ହଜାର ୭୩୫ କୁଇଣ୍ଟାଲ ଧାନ କିଣିବା ଲାଗି ଟାର୍ଗେଟ୍ ଦିଆଯାଇଥିଲା। ଚଳିତ ମାସ ୧୧ ତାରିଖ ସୁଦ୍ଧା ୧୯ ଲକ୍ଷ ୪୪ ହଜାର ୭୮୪ କୁଇଣ୍ଟାଲ ଧାନ କିଣାଯାଇଛି।
ଏହାମଧ୍ୟରେ ବହୁ ଚାଷୀଙ୍କ ଟୋକନ ବାତିଲ ହୋଇଗଲାଣି। ପ୍ରଥମେ ଧାନ ବିକିଥିବା ଚାଷୀଙ୍କର ୨ୟ ଟୋକନ ମଧ୍ୟ ବାତିଲ ହୋଇଯାଇଛି। କେତେକ ମଣ୍ଡିରୁ ଧାନ ଉଠି ପାରୁ ନ ଥିବାରୁ ଅଚଳାବସ୍ଥା ସୃଷ୍ଟି ହୋଇଛି। ମଣ୍ଡି କର୍ମକର୍ତ୍ତା ଓ ମିଲର କାଗଜପତ୍ରରେ ଧାନ କିଣି ଟାର୍ଗେଟ୍ ସାରି ଦେଉଥିବା ବେଳେ ଚାଷୀଙ୍କ ଧାନ ବିକ୍ରି ହୋଇପାରୁ ନାହିଁ ବୋଲି ଅଭିଯୋଗ ହେଉଛି। ଏବେ ୬ ଲକ୍ଷ କୁଇଣ୍ଟାଲ ଟାର୍ଗେଟ ଥିବାବେଳେ ୩୪ ହଜାର ଚାଷୀଙ୍କ ଧାନ କେମିତି କିଣାଯିବ ସେ ନେଇ ପ୍ରଶାସନ ଚିନ୍ତାରେ। ଏ ସମ୍ପର୍କରେ ଜିଲା ଯୋଗାଣ ଅଧିକାରୀ ଲିଙ୍ଗରାଜ ବେହେରା କହିଛନ୍ତି, ଜିଲାରେ ନିୟୋଜିତ ଥିବା ମିଲରମାନେ ପ୍ରାୟ ଟାର୍ଗେଟ୍ ଅନୁସାରେ ଧାନ କିଣି ସାରିଥିବା ବେଳେ ଜିଲା ବାହାର ମିଲର ଗାଡ଼ି ପଠାଇ ଧାନ ଉଠାଉ ନାହାନ୍ତି। ଫଳରେ ଧାନକିଣାରେ ବିଳମ୍ବ ହେଉଛି। ପ୍ରଥମରୁ ଅଧିକ ଟାର୍ଗେଟ୍ ଦିଆଯାଇ ନ ଥିବାରୁ ଚଳିତବର୍ଷ ଧାନକ୍ରୟରେ ବିଳମ୍ବ ଦେଖାଦେଇଛି। ତେବେ ସରକାର ଧାନକିଣା ଟାର୍ଗେଟ ନ ବଢ଼ାଇଲେ ବାହାର ରାଜ୍ୟରୁ ଆସୁଥିବା ଧାନ ବେପାରୀ ଓ ଦଲାଲମାନେ ଫାଇଦା ଉଠାଇବେ। ବାଧ୍ୟହୋଇ କମ୍ ଦରରେ ଧାନ ବିକିବା ଛଡ଼ା ସେମାନଙ୍କ ପାଖରେ ଅନ୍ୟ ଉପାୟ ନାହିଁ ବୋଲି ଚାଷୀମାନେ ପ୍ରକାଶ କରିଛନ୍ତି।
