ନୂଆଦିଲ୍ଲୀ,୧୧।୨ : ଆଗାମୀ ଦିନରେ ମେଘାଳୟ, ମିଜୋରାମ, ତ୍ରିପୁରା, ନାଗାଲାଣ୍ଡ,ଛତିଶଗଡ଼, ତେଲେଙ୍ଗାନା, ରାଜସ୍ଥାନ ଏବଂ ମଧ୍ୟପ୍ରଦେଶ ଆଦି ରାଜ୍ୟରେ ବିଧାନସଭା ନିର୍ବାଚନ ହେବାକୁ ଯାଉଛି। ଏସବୁ ରାଜ୍ୟରେ ୩୩ ଲକ୍ଷରୁ ଅଧିକ ଶମିକ ଅଛନ୍ତି। ମାତ୍ର ଚଳିତ କେନ୍ଦ୍ରୀୟ ବଜେଟରେ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଯୁକ୍ତି ଗ୍ୟାରେଣ୍ଟି ଆକ୍ଟ (ମନରେଗା) ଯୋଜନା ପାଇଁ କେବଳ ୬୦ ହଜାର କୋଟି ଟଙ୍କା ଆବଣ୍ଟନ କରାଯାଇଛି। ଏହା ଯୋଗୁ ଭୋଟରଙ୍କ ଉପରେ ଏହାର ପ୍ରଭାବ ପଡ଼ିବାର ଆଶଙ୍କା ଥିବା ରାଜନୈତିକ ସମୀକ୍ଷକ ମତପୋଷଣ କରିଛନ୍ତି। ବିରୋଧୀ ଦଳମାନେ ଅଭିଯୋଗ କରିଛନ୍ତି ଯେ କେନ୍ଦ୍ର ସରକାର ବଜେଟ ଆବଣ୍ଟନକୁ ହ୍ରାସ କରି ଗ୍ରାମୀଣ ରୋଜଗାର ଗ୍ୟାରେଣ୍ଟି ଯୋଜନା ଶେଷ କରୁଛନ୍ତି। ତେବେ ଗ୍ରାମାଞ୍ଚଳର ଚାକିରିର ଚାହିଦା ଆଧାରରେ ଏହାକୁ ସଂଶୋଧନ କରାଯିବ ବୋଲି କେନ୍ଦ୍ର ସରକାର କହିଛନ୍ତି।
ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ଦ୍ୱାରା ଉପସ୍ଥାପିତ ହୋଇଥିବା ବଜେଟରେ ମନରେଗା ଆବଣ୍ଟନରେ ୨୫ ପ୍ରତିଶତ ହ୍ରାସ ଘଟିଛି। ବର୍ଷ ଶେଷରେ, ଗ୍ରାମ୍ୟ ଉନ୍ନୟନ ମନ୍ତ୍ରଣାଳୟ ମନରେଗା ଯୋଜନାରେ ଅଭାବକୁ ଦୂର କରିବା ପାଇଁ ଅତିରିକ୍ତ ୨୫ ହଜାର କୋଟି ଟଙ୍କା ମାଗିଥିଲେ। ମାତ୍ର ସରକାର କେବଳ ୧୬ ହଜାର କୋଟି ମଞ୍ଜୁର କରିଥିଲେ। ସାରା ଦେଶରେ କୃଷି କ୍ଷେତ୍ରରେ ଶ୍ରମିକମାନେ ମନରେଗା ଅଧୀନରେ କାର୍ଯ୍ୟ କରୁଛନ୍ତି, କିନ୍ତୁ ଏହି ଆର୍ଥିକ ବର୍ଷରେ ମନରେଗା ଯୋଜନାରେ ଗୋଟିଏ ପରିବାରର ହାରାହାରି ଦିନର ଆୟ ପାଞ୍ଚ ବର୍ଷ ମଧ୍ୟରେ ସର୍ବନିମ୍ନ ସ୍ତରରେ ଅଛି । ବିଧାନସଭା ନିର୍ବାଚନ ହେବାକୁ ଯାଉଥିବା ଦୁଇ ରାଜ୍ୟ ରାଜସ୍ଥାନ ଏବଂ ମଧ୍ୟପ୍ରଦେଶରେ ମନରେଗା ଦ୍ୱାରା ଉପକୃତ ହେଉଥିବା ଶ୍ରମିକଙ୍କ ସଂଖ୍ୟା ଅଧିକ ରହିଛି। ସରକାରୀ ପରିସଂଖ୍ୟାନ ଅନୁଯାୟୀ, ୨୦୨୦-୨୧ ଆର୍ଥିକ ବର୍ଷରେ ସାରା ଦେଶରେ ମନରେଗା ଅଧୀନରେ ୧୧ କୋଟିରୁ ଅଧିକ ଲୋକ କାମ କରିଥିଲେ।
