ଧାମନଗର, ୨୮।୧୨(ଡି.ଏନ୍.ଏ): ଭଦ୍ରକ ଜିଲା ଧାମନଗର ବ୍ଲକ ସିଡିପିଓଙ୍କ କାର୍ଯ୍ୟାଳୟ ସମ୍ମୁଖରେ ୮ ଦଫା ଦାବି ନେଇ ଅଲ୍ ଓଡ଼ିଶା ଅଙ୍ଗନୱାଡି ୱାର୍କର୍ସ ଆସୋସିଏଶନ ଓ ଭାରତୀୟ ମଜଦୁର ସଂଘ ପକ୍ଷରୁ ଚାଲିଥିବା ବିକ୍ଷୋଭ ଓ ଧାରଣା ମଙ୍ଗଳବାର ୩୭ ଦିନରେ ପହଞ୍ଚିଛି। ଦାବି ପୂରଣ ନ ହେବା ଯାଏ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଧାରଣା ଜାରି ରହିବ ବୋଲି ସଂଘ ପକ୍ଷରୁ କୁହାଯାଇଛି। କର୍ମୀ ଓ ସହାୟିକାମାନଙ୍କ ଆନ୍ଦୋଳନ ଚାଲିଥିବାରୁ ସମନ୍ବିତ ଶିଶୁ ବିକାଶ ଯୋଜନା ବାଟବଣା ହୋଇଛି। ରାଜଧାନୀଠାରୁ ଆରମ୍ଭ କରି ପ୍ରତ୍ୟେକ ବ୍ଲକ ସଦର ମହକୁମାରେ କାର୍ଯ୍ୟ ବନ୍ଦ ସେମାନେ ଆନ୍ଦୋଳନ ଜାରି ରଖିଛନ୍ତି। ଫଳରେ ଅଙ୍ଗନଓ୍ବାଡି କେନ୍ଦ୍ରଗୁଡ଼ିକ ବନ୍ଦ ରହିଥିବାରୁ ଏହାର ପ୍ରଭାବ ଶିଶୁମାନଙ୍କ ଉପରେ ପଡ଼ିଛି। ଧାମନଗର ବ୍ଲକ ଓ ଏନ୍ଏସିରେ ମୋଟ ୩୫୩ ଅଙ୍ଗନୱାଡି କେନ୍ଦ୍ର ରହିଛି। ସେଥିମଧ୍ୟରୁ ୩୦୧ କେନ୍ଦ୍ର ଓ ୫୨ ମିନି କେନ୍ଦ୍ର ଥିବାବେଳେ ପ୍ରାୟ ୧୦ ହଜାର ପାଖାପାଖି ଶିଶୁ ରହିଛନ୍ତି। ୨୪ ଅଙ୍ଗନଓ୍ବାଡି କେନ୍ଦ୍ର ଧାରଣାକୁ ସମର୍ଥନ ନ କରି କେନ୍ଦ୍ର ଖୋଲୁଥିବା ବେଳେ ୩୨୯ଟିରେ ତାଲା ଝୁଲୁଛି। ଏଭଳି ସ୍ଥିତିରେ ଶିଶୁମାନେ ପୁଷ୍ଟିକର ଖାଦ୍ୟ ପାଇବାରୁ ବଞ୍ଚିତ ହେବା ସହ ସହାୟତା ପାଉଥିବା କିଶୋରୀ, ଗର୍ଭବତୀ ଓ ପ୍ରସୂତି ମହିଳାମାନେ ମଧ୍ୟ ଅସୁବିଧାର ସମ୍ମୁଖୀନ ହେଉଛନ୍ତି। କର୍ମୀ ଓ ସହାୟିକାଙ୍କ ଅନୁପସ୍ଥିତିରେ ମହିଳା ଓ ସମନ୍ବିତ ଶିଶୁ ବିକାଶ ବିଭାଗ ପକ୍ଷରୁ ନିକଟରେ ବ୍ଲକର ବିଭିନ୍ନ ସ୍ବୟଂସହାୟକ ଗୋଷ୍ଠୀକୁ ନେଇ ଛତୁଆ ବଣ୍ଟାଯିବା ଆରମ୍ଭ ହୋଇଥିଲେ ମଧ୍ୟ ଏହା କିନ୍ତୁ ସଫଳ ହୋଇପାରି ନାହିଁ।
ଏ ସମ୍ପର୍କରେ ଧାମନଗର ସିଡିପିଓ ନମିତା ଦାସ କହିଛନ୍ତି, ଅଙ୍ଗନଓ୍ବାଡି କର୍ମୀଙ୍କ ଆନ୍ଦୋଳନ ରାଜ୍ୟ ସମସ୍ୟା। ଆମେ ଛତୁଆ ବାଣ୍ଟିବାକୁ ସ୍ବୟଂସହାୟକ ଗୋଷ୍ଠୀଙ୍କୁ ଦାୟିତ୍ୱ ଦେଇଛୁ। ଅଣ୍ଡା ବାଣ୍ଟିବା ଦାୟିତ୍ୱ ନେବାକୁ ଗୋଷ୍ଠୀ ରାଜି ନ ହେବାରୁ ସରକାର ମଧ୍ୟ ମନା କରିଥିଲେ। ଧାମନଗର ବ୍ଲକ ଏବଂ ଭଦ୍ରକ ଜିଲା ଅଙ୍ଗନୱାଡି ସଂଘର ସମ୍ପାଦିକା ଜୟନ୍ତୀ ଜେନା କେନ୍ଦ୍ର ଅଚଳାବସ୍ଥାକୁ ନେଇ କୁହନ୍ତି, ସେମାନେ ଅଧିକାଂଶ ସରକାରୀ କାର୍ଯ୍ୟ କରୁଥିବା ବେଳେ ବର୍ଷ ବର୍ଷ ଧରି କର୍ମୀ ଅବହେଳାର ଶିକାର ହୋଇଚାଲିଛନ୍ତି। ରାଜ୍ୟ ଏବଂ କେନ୍ଦ୍ର ସରକାର କର୍ମୀ ଓ ସହାୟିକାଙ୍କ ଆବଶ୍ୟକ ଦାବିଗୁଡ଼ିକ ପୂରଣ କରନ୍ତୁ।
