ନୂଆଦିଲ୍ଲୀ,୨୩।୭(ପି.ଟି.): ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ବୁଧବାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛି। ଏଥିରେ ୩୨ଜଣ ବିଦେଶୀ କୋଚ୍ଙ୍କ କାର୍ଯ୍ୟକାଳ ବୃଦ୍ଧି କରାଯାଇଛି। ସାଇ ୧୧ଟି କ୍ରୀଡ଼ାବର୍ଗର ଏହି କୋଚ୍ମାନଙ୍କ ଚୁକ୍ତିକୁ ଆସନ୍ତାବର୍ଷ ସେପ୍ଟେମ୍ବରକୁ ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଛି। ଆସନ୍ତାବର୍ଷ ଆୟୋଜନ ହେବାକୁଥିବା ଟୋକିଓ ଅଲିମ୍ପିକ୍କୁ ଦୃଷ୍ଟିରେ ରଖି ଓ ଆଥଲେଟମାନଙ୍କୁ ଟ୍ରେନିଂକୁ ଜାରି ରଖିବା ପାଇଁ ଏହି ନିଷ୍ପତ୍ତି ହୋଇଛି। ଏମାନଙ୍କ ମଧ୍ୟରେ ସାମିଲ ରହିଛନ୍ତି ବକ୍ସିଂ କୋଚ୍ ସାଣ୍ଟିଆଗୋ ନିଏଭା ଓ ରାଫାଏଲ ବେରଗାମାସ୍କୋ, ପୁରୁଷ ହକିର ଗ୍ରାହାମ ରେଡ୍, ଶୁଟିଂର ପାଭେଲ ସ୍ମିରନୋଭ। ଆସନ୍ତା ସେପ୍ଟେମ୍ବରରେ ଏହି କୋଚ୍ମାନଙ୍କ କାର୍ଯ୍ୟକାଳ ଶେଷ ହୋଇଥାନ୍ତା। ଅଲିମ୍ପିକ୍ସ ସହ କୌଣସି ସମ୍ପର୍କ ନ ଥିଲେ ମଧ୍ୟ ଜାତୀୟ ଫୁଟବଲ କୋଚ୍ ଆଇଗର ଷ୍ଟିମାକଙ୍କ ଚୁକ୍ତି ବୃଦ୍ଧି ହୋଇଛି। ଗତବର୍ଷ ମେ’ରେ ତାଙ୍କୁ ଦୁଇବର୍ଷ ପାଇଁ ନିଯୁକ୍ତି ମିଳିଥିଲା।
ପୂର୍ବରୁ ଚଳିତମାସରେ ସବୁ ବିଦେଶୀ କୋଚ୍ଙ୍କ ଚୁକ୍ତି ଆସନ୍ତାବର୍ଷ ସେପ୍ଟେମ୍ବର ପର୍ଯ୍ୟନ୍ତ ବୃଦ୍ଧି କରିବାକୁ କ୍ରୀଡ଼ା ମନ୍ତ୍ରଣାଳୟ ଘୋଷଣା କରିଥିଲା। କୋଭିଡ୍-୧୯ ମହାମାରୀ କାରଣରୁ ଟୋକିଓ ଅଲିମ୍ପିକ୍ସକୁ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଥିଲା। ଫଳରେ ଅଲିମ୍ପିକ୍ସରେ ଭାଗ ନେବାକୁ ଥିବା ଓ ଅଂଶଗ୍ରହଣ କରବାର ସମ୍ଭାବନା ଥିବା ଆଥଲେଟ୍ମାନଙ୍କ ଟ୍ରେନିଂକୁ ଜାରି ରଖିବା ପାଇଁ କୋଚ୍ଙ୍କ ଚୁକ୍ତି ବୃଦ୍ଧି କରିବା ଜରୁରୀ ଥିଲା ବୋଲି କୁହାଯାଇଛି। ଅଲିମ୍ପିକ୍ସ ଗୋଟିଏ ବର୍ଷ ଘୁଞ୍ଚାଇ ଦିଆଯାଇଥିବାରୁ କୋଚ୍ମାନଙ୍କୁ ଦାୟିତ୍ୱରୁ ହଟାଯାଇ ନୂଆ କୋଚ୍ଙ୍କୁ ନିଯୁକ୍ତି କରିଥିଲେ ଆଥଲେଟମାନଙ୍କର ପ୍ରସ୍ତୁତିରେ ବାଧା ସୃଷ୍ଟି ହୋଇଥାନ୍ତା ବୋଲି କ୍ରୀଡ଼ାମନ୍ତ୍ରୀ କିରେନ ରିଜିଜୁ କହିଛନ୍ତି। ଚୁକ୍ତିର ପୂର୍ବ ନିୟମ ଓ ସର୍ତ୍ତକୁ ବଜାୟ ରଖାଯାଇଛି। ଅନ୍ୟପଟେ ଜାତୀୟ ଫେଡେରେଶନଗୁଡିକର ପରାମର୍ଶ ଓ ସୁପାରିସ କ୍ରମେ ଚୁକ୍ତି ବୃଦ୍ଧି କରିବାକୁ ନିଷ୍ପତ୍ତି ନିଆଯାଇଛି ବୋଲି ସାଇର ଜଣେ ବରିଷ୍ଠ ଅଧିକାରୀ କହିଛନ୍ତି।
ପୂର୍ବରୁ ଉଭୟ ଭାରତୀୟ ଓ ବିଦେଶୀ କୋଚ୍ଙ୍କୁ ୪ ବର୍ଷ ବା ଗୋଟିଏ ଅଲିମ୍ପିକ୍ ସାଇକ୍ଲ ପାଇଁ ନିଯୁକ୍ତି ଦିଆଯିବ ବୋଲି ରିଜିଜୁ ସ୍ପଷ୍ଟ କରିଥିଲେ। ୨୦୨୪ ଓ ୨୦୨୮ ଅଲିମ୍ପିକ୍କୁ ଦୃଷ୍ଟିରେ ରଖି ସେ ଏ ନେଇ ଘୋଷଣା କରିଥିଲେ। କୋଚ୍ମାନଙ୍କ ପ୍ରଦର୍ଶନ ଓ ସମ୍ପୃକ୍ତ ଜାତୀୟ ଫେଡେରେଶନଗୁଡିକ ସୁପାରିସ କ୍ରମେ କୋଚ୍ମାନଙ୍କ ଚୁକ୍ତି ବୃଦ୍ଧି କରାଯିବ ବୋଲି ସେ କହିଥିଲେ। ଅବଶ୍ୟ ଆଥଲେଟଙ୍କ ପ୍ରଦର୍ଶନ ଉପରେ କୋଚ୍ଙ୍କ ଦକ୍ଷତାକୁ ମପାଯିବ ଓ ସେହି ଅନୁସାରେ ଚୁକ୍ତିର ସଂଜ୍ଞା ନିରୂପଣ ହେବ ବୋଲି କୁହାଯାଇଛି।
