ଓ୍ବାଶିଂଟନ,୧୪/୮:ନଭେମ୍ବରରେ ହେବାକୁ ଥିବା ରାଷ୍ଟ୍ରପତି ନିର୍ବାଚନ ଆମେରିକାର ରାଜନୈତିକ ପାଣିପାଗରେ ଉଷ୍ମତା ଭରିଦେଇଛି। ବିଶେଷକରି ଭାରତୀୟ ବଂଶୋଦ୍ଭବ କାଲିଫର୍ନିଆ ସିନେଟର କମଲା ହାରିସ୍ ଡେମୋକ୍ରାଟିକ୍ ପାର୍ଟିରୁ ଉପରାଷ୍ଟ୍ରପତି ପ୍ରାର୍ଥୀ ଭାବେ ଅବତୀର୍ଣ୍ଣ ପରେ ତାଙ୍କ ପ୍ରେସିଡେନ୍ସିଆଲ ନୋମିନି ଜୋ ବିଡେନଙ୍କ ପ୍ରଚାର ରୋଚକ ମୋଡରେ ପହଞ୍ଚତ୍ଛି। ବିଡେନ ଓ ହାରିସ୍ ବୁଧବାର ପ୍ରଥମଥର ପାଇଁ ଗୋଟିଏ ମଞ୍ଚରେ ଛିଡ଼ାହୋଇ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ହ୍ବାଇଟ୍ ହାଇସ୍ ରେକର୍ଡ ଶେୟାର କରିଛନ୍ତି। ରିପବ୍ଲିକାନ ଟ୍ରମ୍ପ୍ ରାଷ୍ଟ୍ରପତି ପଦ ପାଇଁ ଯୋଗ୍ୟ ନୁହନ୍ତି ବୋଲି ଦୁହେଁ ସମାଲୋଚନା କରିଛନ୍ତି।
୭୭ ବର୍ଷୀୟ ଶ୍ୱେତାଙ୍ଗ ଜୋ ବିଡେନ ମଙ୍ଗଳବାର ୫୫ ବର୍ଷୀୟା କମଲା ହାରିସ୍ଙ୍କୁ ତାଙ୍କର ଭାଇସ୍ ପ୍ରେସିଡେନ୍ସିଆଲ ରନିଂ ମେଟ୍ ଭାବେ ଚୟନ କରିଥିଲେ। ଆମେରିକାର ଏକ ବଡ଼ ରାଜନୈତିକ ଦଳରୁ ଜଣେ କୃଷ୍ଣକାୟ ମହିଳା ଭାବେ ଏହି ଦୌଡ଼ିରେ ସାମିଲ ହେବାରେ ହାରିସ୍ ହେଉଛନ୍ତି ପ୍ରଥମ। ଏହାର ଦିନକ ପରେ ଦୁଇନେତା ଡେଲାଓ୍ବେରସ୍ଥିତ ଓ୍ବିଲମିଙ୍ଗଟନରେ ପ୍ରଥମଥର ପାଇଁ ଗୋଟିଏ ମଞ୍ଚରୁ ନିର୍ବାଚନୀ ପ୍ରଚାର ଆରମ୍ଭ କରିଛନ୍ତି। ଏହି ଅବସରରେ ବିଡେନ କହିଥିଲେ, ଉପରାଷ୍ଟ୍ରପତି ପଦ ଲାଗି ହାରିସ୍ ଜଣେ ସ୍ମାର୍ଟ, ଟାଣୁଆ ଏବଂ ଆମେରିକାର ମଧ୍ୟବିତ୍ତଙ୍କ ପାଇଁ ଲଢ଼ୁଆ ପ୍ରାର୍ଥୀ। କିପରି କଠୋର ନିଷ୍ପତ୍ତି ନିଆଯାଏ ତାଙ୍କୁ ଭଲ ଭାବେ ଜଣା। ସେ ପ୍ରଥମ ଦିନରୁ ହିଁ ଏହି କାମ କରିବାକୁ ପ୍ରସ୍ତୁତ। ଆମେ ଦୁହେଁ ଏକ ଉନ୍ନତ ଭବିଷ୍ୟତ ପାଇଁ ଦେଶକୁ ପୁନର୍ଗଠନ କରିବା ସକାଶେ ପ୍ରସ୍ତୁତ ହୋଇ ରହିଛୁ।
କରୋନା ଭାଇରସ୍ ସଂକ୍ରମଣକୁ ଦୃଷ୍ଟିରେ ରଖି ଏହି କାର୍ଯ୍ୟକ୍ରମ ସର୍ବସାଧାରଣଙ୍କ ନିମନ୍ତେ ଖୋଲା ନ ଥିଲା। ଉଭୟ ବିଡେନ ଓ ହାରିସ୍ ସେଫ୍ଟି ମାସ୍କ ପିନ୍ଧି ସାମାଜିକ ଦୂରତ୍ୱ ଅବଲମ୍ବନ ପୂର୍ବକ ଚାଲି ଚାଲି ଖବରଦାତାଙ୍କୁ ସମ୍ବୋଧନ କରିବା ପାଇଁ ମଞ୍ଚ ଉପରକୁ ଆସିଥିଲେ। ଏହି ଅବସରରେ ହାରିସ୍ କହିଥିଲେ, ସେମାନେ ଜିତିବା ପରେ ବିଡେନ ପ୍ରଶାସନ ଲକ୍ଷ ଲକ୍ଷ ନିଯୁକ୍ତି ସୁଯୋଗ ସୃଷ୍ଟି କରିବ। ଜଳବାୟୁ ପରିବର୍ତ୍ତନ ପାଇଁ ଲଢ଼େଇ କରିବା ସହ ସମସ୍ତଙ୍କୁ ସୁହାଇଲା ଭଳି ଏକ କେୟାର ଆକ୍ଟ ଆଣିବ। ଆମେରିକୀୟଙ୍କ ମଙ୍ଗଳ ପାଇଁ ଅନେକ କଠୋର ପଦକ୍ଷେପ ନିଆଯିବ। ଉପରାଷ୍ଟ୍ରପତି ପ୍ରାର୍ଥୀ ହେବା ପରେ ପ୍ରଥମ ଥର ଲାଗି ସେ ଟ୍ରମ୍ପ୍ ପ୍ରଶାସନର ସାଢ଼େ ୩ ବର୍ଷର କାର୍ଯ୍ୟକାଳକୁ ସମାଲୋଚନା କରିଥିଲେ। ଟ୍ରମ୍ପ୍ ସରକାର ନେଇଥିବା ଅନେକ ଭୁଲ୍ ପଦକ୍ଷେପର ଏକ ଲମ୍ବା ତାଲିକାକୁ ହାରିସ୍ ଉପସ୍ଥାପନ କରିଥିଲେ। ରାଷ୍ଟ୍ରପତି ପଦ ପାଇଁ ଜଣେ ଅଯୋଗ୍ୟ ବ୍ୟକ୍ତିଙ୍କୁ ଜିତାଇବା ଦ୍ୱାରା ଯାହା ହୋଇଛି ତାହା ଆମେ ସମସ୍ତେ ଦେଖିପାରୁଛେ। ଆମ ଦେଶ ଛିନ୍ନଭିନ୍ନ ହୋଇଯାଇଛି ଏବଂ ବିଶ୍ୱରେ ମଧ୍ୟ ଆମ ପ୍ରତିଷ୍ଠା ହାନି ହୋଇଛି। ସେମାନେ ଆମକୁ କେଉଁ ଅବସ୍ଥାକୁ ଆଣିଛନ୍ତି ଦେଖନ୍ତୁ। ୧୬ ନିୟୁତରୁ ଅଧିକ ଲୋକ ନିଯୁକ୍ତି ହରାଇଲେଣି, ସ୍କୁଲକୁ ଫେରିପାରୁ ନ ଥିବା ଲକ୍ଷ ଲକ୍ଷ ପିଲା ଦାରିଦ୍ର୍ୟ ଅବସ୍ଥାରେ ଅଛନ୍ତି, ପ୍ରତି ୫ ଜଣ ମା’ରେ ଜଣେ ନିଜ ପିଲାଙ୍କୁ ଖାଇବାକୁ ଦେଇପାରୁ ନାହାନ୍ତି ଏବଂ କରୋନାରେ ୧୬୫,୦୦୦ ଲୋକ ପ୍ରାଣ ହରାଇଲେଣି। ଏସବୁ କେବଳ ଟ୍ରମ୍ପ୍ ପ୍ରଶାସନର ଭୁଲ୍ ନୀତି ଯୋଗୁ ହୋଇଛି ବୋଲି ହାରିସ୍ ସମାଲୋଚନା କରିଥିଲେ। ଇତିମଧ୍ୟରେ ହାରିସ୍ଙ୍କୁ ନିଜର ରନିଂ ମେଟ୍ ଭାବେ ଚୟନ କରିବାର ୨୪ ଘଣ୍ଟା ମଧ୍ୟରେ ବିଡେନ୍ ନିଜ ପ୍ରେସିଡେନ୍ସିଆଲ କ୍ୟାମ୍ପେନ ପାଇଁ ୨୬ ନିୟୁତ ଡଲାର ପାଣ୍ଠି ସଂଗ୍ରହ କରିଛନ୍ତି।
