ମହାକାଳପଡ଼ା,୧୦ା୯(ପ୍ରତାପ ଚନ୍ଦ୍ର ସ୍ବାଇଁ): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ଅଞ୍ଚଳ ରଡ଼ିଆ-କଂସାର-ବଡ଼ଦାଣ୍ଡୁଆ ଗୋବରୀ ନଦୀ ପାର୍ଶ୍ୱ ଲୁଣା ଘେରି ବନ୍ଧ ସପ୍ତାହ ପୂର୍ବେ ଭୁଶୁଡ଼ି ପଡ଼ିବା ନେଇ ପ୍ରଥମେ ଧରିତ୍ରୀରେ ପ୍ରକାଶ ପାଇଥିଲା। ପରବର୍ତ୍ତୀ ସମୟରେ ଜଳସେଚନ ବିଭାଗ ପକ୍ଷରୁ ମାଟି ବାଲି ବସ୍ତା ବହ୍ଲାରେ ପ୍ୟାକିଂ ହୋଇଥିଲା। ହେଲେ ଅଦ୍ୟାବଧି ବଙ୍ଗୋପସାଗରେ ଲଘୁଚାପ ଜନିତ ପ୍ରଭାବରେ ତୁହାକୁ ତୁହା ବର୍ଷା ଓ ଅମାବାସ୍ୟା ତିଥି ଯୋଗୁ ଅଶାନ୍ତ ସାମୁଦ୍ରିକ ଜୁଆର ମାଡ଼ରେ ଏହି ଘେରିବନ୍ଧ ବୁଧବାର ରାତିରେ ୩ ଶହ ଫୁଟରୁ ଅଧିକ ଫାଟ ସୃଷ୍ଟି ହେବା ସହ ଭୁଶୁଡ଼ିବା ନେଇ ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି। ବହୁ କୋଟି ଟଙ୍କାର ଲୁଣା ଘେରି ବନ୍ଧ ନିର୍ମାଣ କାର୍ଯ୍ୟ ହୋଇଥିଲା। ଅଥଚ ନଦୀ ବନ୍ଧ ପାର୍ଶ୍ୱରେ କେତେକ ଚିଙ୍ଗୁଡ଼ି ଘେରିର ବର୍ଜ୍ୟବସ୍ତୁ ଜଳ ନିଷ୍କାସନ ଓ କଙ୍କଡ଼ା କୋଚିଆ ଘଳିଆ ଯୋଗୁ ନଦୀବନ୍ଧ ଦୁର୍ବଳ ଯୋଗୁ ବନ୍ଧ ନିର୍ମାଣ ସ୍ଥାୟିତ୍ୱ ନେଇ ପ୍ରଶ୍ନ ଉଠିଛି। ଚିଙ୍ଗୁଡ଼ି ଘେରିକୁ ତୁରନ୍ତ ଉଚ୍ଛେଦ ପାଇଁ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ଘେରି ବନ୍ଧର ସୁରକ୍ଷା ପାଇଁ ଅଘୋଷିତ ଠିକାଦାରଙ୍କ କର୍ମଚାରୀମାନେ ରାତି ଅନିଦ୍ରା ହୋଇ ଜେନେରେଟର ହଲୋଜିନ ଲାଇଟ୍ ଦେଇ ଜଗି ରହିଛନ୍ତି ବୋଲି ସ୍ଥାନୀୟ ଲୋକମାନେ କରିଛନ୍ତି। ସ୍ଥାନୀୟ ଲୋକମାନେ କହିବା କଥା ଆମ ଚାଷ ଜମି ଓ ଗ୍ରାମ ପ୍ରତି ବିପଦପୂର୍ଣ୍ଣ ଥିବା ନେଇ ଆଶଙ୍କା ପ୍ରକାଶ କରିଛନ୍ତି। ତୁରନ୍ତ ମେଗା ପ୍ରୋଜେକ୍ଟ ଯୋଜନାରେ ପଥର ପ୍ୟାକିଂ ନିର୍ମାଣ କାର୍ଯ୍ୟ ପାଇଁ ଜଳସେଚନ ବିଭାଗ ଉଚ୍ଚ ପଦସ୍ଥ ଅଧିକାରୀ ଦୃଷ୍ଟି ଦେବା ପାଇଁ ଦାବି କରିଛନ୍ତି ସ୍ଥାନୀୟ ଲୋକେ।
ଏ ସଂକ୍ରାନ୍ତରେ ଆଳିସ୍ଥିତ ଜଳସେଚନ ବିଭାଗ ଅଧୀନ (ନଦୀ ତଟବନ୍ଧ) ଅଧୀକ୍ଷଣ ଯନ୍ତ୍ରୀ ସନ୍ଦୀପ କୁମାର ସାହୁଙ୍କ ମତାମତ ନେବାରେ ଖବର ମିଳିଛି। ଘଟଣାସ୍ଥଳରେ ଯୁଦ୍ଧକାଳୀନ ଭିତ୍ତିରେ ବିଭାଗ ପକ୍ଷରୁ ସ୍ବତନ୍ତ୍ର ଦୃଷ୍ଟି ରଖାଯାଇଛି। ଖୁବ୍ଶୀଘ୍ର ପଦକ୍ଷେପ ଗ୍ରହଣ କରାଯିବ ବୋଲି କହିଛନ୍ତି।
