ଭୁବନେଶ୍ୱର,୧୨। ୯(ବ୍ୟୁରୋ): ଚଳିତ ବନ୍ୟା ଯୋଗୁ କ୍ଷତିଗ୍ରସ୍ତ ହୋଇଥିବା ଚାଷୀଙ୍କ ପାଇଁ ଶୁକ୍ରବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୩୦୦ କୋଟି ଟଙ୍କର ସ୍ବତନ୍ତ୍ର ପ୍ୟାକେଜ ଘୋଷଣା କରିଛନ୍ତି। ଗତ ଅଗଷ୍ଟ ଶେଷ ସପ୍ତାହରେ ରାଜ୍ୟର ବିଭିନ୍ନ ଜିଲାରେ ବନ୍ୟା ଯୋଗୁ ବହୁ ଶସ୍ୟହାନି ହୋଇଛି।
ଘୋଷଣା ଅନୁଯାୟୀ ୩୩ ପ୍ରତିଶତ ଶସ୍ୟହାନି ହୋଇଥିବା କ୍ଷୁଦ୍ର ଓ ନାମମାତ୍ର ଚାଷୀଙ୍କୁ ଅଣଜଳସେଚିତ ଜମି ପାଇଁ ପ୍ରତି ହେକ୍ଟରକୁ ୬ ହଜାର ୮୦୦ ଟଙ୍କା ଇନପୁଟ ସବ୍ସିଡ୍ ଯୋଗାଇ ଦିଆଯିବ। ସେହିପରି ଜଳସେଚିତ ଜମି ପାଇଁ ହେକ୍ଟର ପିଛିା ୧୩ ହଜାର ୫୦୦ ଟଙ୍କା ଏବଂ ଆମ୍ବ, କାଜୁ, ନଡିଆ ପାନ ଆଦି ସବୁଦିନିଆ ଫସଲପାଇଁ ହେକ୍ଟର ପିଛା ୧୮ ହଜାର ଟଙ୍କା ପ୍ରଦାନ କରାଯିବ। ଇନପୁଟ୍ ସବ୍ସିଡ୍ ସର୍ବନିମ୍ନ ସବୁଦିନିଆ ଫସଲ ପାଇଁ ୨ ହଜାର ଏବଂ ଅନ୍ୟାନ୍ୟ ଫସଲ ପାଇଁ ୧ ହଜାର ଟଙ୍କାରୁ କମ୍ ଦିଆଯିବ ନାହିଁ।
ବନ୍ୟା ପ୍ରଭାବିତ ଚାଷୀଙ୍କୁ ୨୦୨୦ ଖରିଫ ପାଇଁ ୨୦ ହଜାର ଡାଲିଜାତୀୟ କୀଟ ଯୋଗାଇ ଦିଆଯିବ। ସେହିପରି ରବିଫସଲ ପାଇଁ ୬୦ ହଜାର ଏକରରେ ବିିଭିନ୍ନ ପ୍ରକାର ଫସଲ ଲାଗି ପ୍ରଦର୍ଶନ କାର୍ଯ୍ୟକ୍ରମ କରାଯିବ। କ୍ଷତିଗ୍ରସ୍ତ ଚାଷୀମାନଙ୍କୁ ୨ ହଜାର ପମ୍ପ ସେଟ ୫୦ ପ୍ରତିଶତ ରିହାତିରେ ଯୋଗାଇ ଦିଆଯିବ। ସର୍ବାଧିକ ୧୫ ହଜାର ଟଙ୍କା ପର୍ଯ୍ୟନ୍ତ ରିହାତି ଯୋଗାଇ ଦିଆଯିବ।
ସେହିପରି ପ୍ରଭାବିତ ଚାଷୀମାନଙ୍କୁ ୫୦ ପ୍ରତିଶତ ରିହାତିରେ ସର୍ବାଧିକ ୩ ହଜାର ଟଙ୍କା ପର୍ଯ୍ୟନ୍ତ ୫ ହଜାର ସିଞ୍ଚନ ମେଶିନ ପ୍ରଦାନ କରାଯିବ। ହାତ ଓ ବ୍ୟାଟେରି ଚାଳିତ ସିଞ୍ଚନ ମେଶିନ ପାଇଁ ୬୦୦ ଟଙ୍କା ପ୍ରଦାନ କରାଯିବ। ରବି ଫସଲ ପାଇଁ ୧ ଲକ୍ଷ ଚାଷୀଙ୍କୁ ବିହନ ବିଶୋଧନ କାର୍ଯ୍ୟକ୍ରମରେ ସାମିଲ କରାଯିବ। ସେମାନଙ୍କୁ ୧ଲକ୍ଷ ଏକର ଜମି ପାଇଁ ମାଗଣାରେ ରାସାୟନିକ ବିହନ ବିଶୋଧନ କିମ୍ବା ଜୈବିକ ବିହନ ବିଶୋଧନ ସୁବିଧା ଯୋଗାଇ ଦିଆଯିବ। ରବି ଋତୁ ପାଇଁ ତୁରନ୍ତ ଉନ୍ନତ ମାନର ପ୍ରାମାଣିକ ବିହନ ପର୍ଯ୍ୟାପ୍ତ ପରିମାଣରେ ଯୋଗାଇ ଦିଆଯିବ। ସ୍ବତନ୍ତ୍ର ପ୍ୟାକେଜରେ ପ୍ରମାଣିକ ବିହନ ପାଇଁ ସ୍ବତନ୍ତ୍ର ଭାବେ ୭୫ ପ୍ରତିଶତ ପର୍ଯ୍ୟନ୍ତ ରିହାତି ଯୋଗାଇ ଦିଆଯିବ। ବନ୍ୟା ପ୍ରଭାବିତ ଜିଲାଗୁଡିକରେ ୧୦ କୋଟି ଟଙ୍କାର ଫାର୍ମ ମେକାନାଇଜେଶନ ସବ୍ସିଡ୍ ଯୋଗାଇ ଦିଆଯିବ। ଏଥିସହିତ ଶସ୍ୟହାନିର ଶୀଘ୍ର ଆକଳନ କରାଯିବା ସହ ଶସ୍ୟର ମଧ୍ୟ ଭାଗରେ ଶସ୍ୟବୀମା ଯୋଗାଇ ଦେବାକୁ ବ୍ୟବସ୍ଥା କରାଯିବ। ୧ ଲକ୍ଷ ଚାଷୀଙ୍କୁ ପାଳଙ୍ଗ, ବିନ୍ସ, ଟମାଟୋ, ଲଙ୍କା, ମୂଳା ଇତ୍ୟାଦି ପାଇଁ ପନିପରିବା ମଞ୍ଜି କିଟ୍ ୧୩୦ ଟଙ୍କାରେ ଯୋଗାଇ ଦିଆଯିବ। ୭୫ ହଜାର ଚାଷୀଙ୍କୁ ୧୬୦ ଟଙ୍କା ମୂଲ୍ୟରେ ଅମୃତଭଣ୍ଡା, କଳଦୀ ଓ ସଜନା ଗଛ ଇତ୍ୟାଦି ୧୦ ପ୍ରକାର ଶୀଘ୍ର ବଢୁଥିବା ଫଳ ପାଇଁ କୀଟ ପିଛା ୧୬୦ ଟଙ୍କା ଦରରେ ଯୋଗାଇ ଦିଆଯିବ। ଜୀବନ ଜୀବିକା ପାଇଁ ୧୦ ହଜାର ଛତୁ ଚାଷ ୟୁନିଟ୍ ଲାଗି ୫୦୦ ୟୁନିଟ୍ ଶେଡ୍ ନେଟ ଯୋଗାଇ ଦିଆଯିବ।
୩୩ ପ୍ରତିଶତ ବନ୍ୟା ପ୍ରଭାବିତ ଅଞ୍ଚଳରେ ଖରିଫ ପାଇଁ ଦିଆଯାଇଥିବା କ୍ଷୁଦ୍ର ମିଆଦି ଋଣକୁ
ଚାଷୀଙ୍କ ପାଇଁ ୩୦୦ କୋଟିର …
ମଧ୍ୟମ ମିଆଦୀ ଋଣରେ ପରିବର୍ତ୍ତନ କରାଯିବ। ପ୍ରଭାବିତ ଅଞ୍ଚଳରେ କ୍ଷୁଦ୍ର ମିଆଦୀ ଖରିଫ ଋଣ ବର୍ଷକ ପାଇଁ ଅର୍ଥାତ୍ ୨୦୨୨ ପର୍ଯ୍ୟନ୍ତ ଏହାକୁ ମଧ୍ୟମ ଅବଧିକୁ ବୃଦ୍ଧି କରାଯିବ। ୨୦୨୦ ଅକ୍ଟୋବର ପହିଲାରୁ ଚାଷୀଙ୍କୁ ରବି ଫସଲ ପାଇଁ ଋଣ ଯୋଗାଇ ଦିଆଯିବ।
ସେହିପରି ବନ୍ୟାରେ ମୃତ୍ୟୁ ହୋଇଥିବା ଗୃହପାଳିତ ପ୍ରାଣୀଙ୍କ ପାଇଁ ୩୦ ହଜାର ଟଙ୍କାର ସହାୟତା ପ୍ରଦାନ କରାଯିବ। ୩ ଦୁହାଁଳିଆ ଗାଈ ଏବଂ ମଇଁଷି ପାଇଁ ୨୫ ହଜାର ଟଙ୍କା ଏବଂ କ୍ଷୀର ଦେଉ ନ ଥିବା ଗାଈ ଓ ମଇଁଷି ପାଇଁ ୨୫ ହଜାର ଟଙ୍କା ସହାୟତା ରାଶି ଯୋଗାଇ ଦିଆଯିବ। ସେହିପରି ୬ ବାଛୁରି ପାଇଁ ପ୍ରତ୍ୟେକ ପିଛା ୧୬ ହଜାର ଟଙ୍କା, ଛେଳିଙ୍କ ପାଇଁ ୩ ହଜାର ସର୍ବାଧିକ ୩୦ଟି ଛେଳି ପାଇଁ ସହାୟତା ରାଶି ପ୍ରଦାନ କରାଯିବ। ୫ ହଜାର କୁକୁଡ଼ା ପାଇଁ ପ୍ରତି କୁକୁଡା ପିଛା ୫୦ ଟଙ୍କା ଲେଖାଏ ପ୍ରଦାନ କରାଯିବାକୁ ଘୋଷଣା କରାଯାଇଛି।
ସେହିପରି ମାଛ ପୋଖରୀ କ୍ଷୟକ୍ଷତି ପାଇଁ ଚାଷୀଙ୍କୁ ପ୍ରତି ହେକ୍ଟରକୁ ୧୨ ହଜାର ୨୦୦ ଟଙ୍କା ପ୍ରଦାନ କରାଯିବ। ମାଛ ପୋଖରୀକୁ ପୁନରୁଦ୍ଧାର କରିବା ପାଇଁ ପ୍ରତି ହେକ୍ଟରକୁ ୮ହଜାର ୨୦୦ ଟଙ୍କାର ଇନପୁଟ୍ ସବ୍ସିଡ୍ ପ୍ରଦାନ କରିବାକୁ ଘୋଷଣା କରାଯାଇଛି। ବୁଣାକାର ଓ ହସ୍ତଶିଳ୍ପୀ କାରିଗରଙ୍କ ପାଇଁ ଏହି ସ୍ବତନ୍ତ୍ର ପ୍ୟାକେଜରେ ସହାୟତା ଘୋଷଣା କରାଯାଇଛି। ପ୍ରତ୍ୟେକ ବୁଣାକାରଙ୍କୁ ଯନ୍ତ୍ରପାତି କ୍ରୟ କରିବାକୁ ୪ ହଜାର ୧୦୦ ଟଙ୍କା ଏବଂ ୪୧୦୦ ଟଙ୍କା କଞ୍ଚାମାଲ କ୍ଷତିପୂରଣ ବାବଦରେ ଆର୍ଥିକ ସହାୟତା ପ୍ରଦାନ କରାଯିବ। ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମ ନିଯୁକ୍ତି ଯୋଜନାରେ ଗ୍ରାମପଞ୍ଚାୟତ ରାସ୍ତା, ଖେଳପଡିଆ, କେନାଲ, ପୋଖରୀ, ଗୁହାଳ ଇତ୍ୟାଦି ମରାମତି କ୍ଷେତ୍ରକୁ ସାମିଲ କରାଯିବାକୁ ଘୋଷଣା କରାଯାଇଛି।