ଆର.ଉଦୟଗିରି,୧୮ା୧୦(ଡି.ଏନ.ଏ.): ୨୦୧୮ରେ ହୋଇଥିବା ତିତ୍ଲି ବାତ୍ୟାରେ ଆର.ଉଦୟଗିରି ବ୍ଲକ ଅନଗାଁ ପଞ୍ଚାୟତର କିମ୍ବସିଂ, ବଡିହର ଓ ଦଳେଇସାହି ଗାଁର କ୍ଷତିଗ୍ରସ୍ତ ହୋଇଥିଲା। ୩ ଖଣ୍ଡ ଗାଁରେ ପ୍ରାୟ ୫୦ ଆଦିବାସୀ ପରିବାର ବସବାସ କରୁଥିବା ବେଳେ ତିତ୍ଲି ବାତ୍ୟାରେ ଗାଁଗୁଡିକ ସମ୍ପୂର୍ଣ୍ଣ ନଷ୍ଟ ହେବା ସହ ଭୂସ୍ଖଳନ ଯୋଗୁ ପାହାଡରୁ ବଡ ପଥର ଖସି ରାସ୍ତା ନିଶ୍ଚିହ୍ନ ହୋଇଯାଇଥିଲା। ପ୍ରଶାସନ ପକ୍ଷରୁ ସମସ୍ତ ପରିବାରକୁ ଭୂୟାଁପଡା ଠାରେ ଘର ନିର୍ମାଣ କରି ରହିବା ପାଇଁ ଜାଗା ସହ ଘର ପାଇଁ ଅର୍ଥ ଦିଆଯାଇଥିଲେ ମଧ୍ୟ ଗ୍ରାମବାସୀ ଚାଷ ଜମି ଓ ଭିଟାମାଟି ଛାଡିବାକୁ ରାଜି ନୁହନ୍ତି। ଗତ ରବିବାର ସ୍ଥାନୀୟ ବିଡିଓ ଲରିମନ ଖର୍ସେଲ ଉକ୍ତ ଗାଁଗୁଡିକ ଗସ୍ତ କରି ଲୋକଙ୍କ ସମସ୍ୟା ବୁଝିଛନ୍ତି। ବିଡିଓଙ୍କ ଗାଡି ବ୍ଲକ ଠାରୁ ୩୫ କି.ମି. ଯିବା ପରେ ଅଗାଁ ପଞ୍ଚାୟତର ଭୂୟାଁପଡା ଗାଁରେ ପହଞ୍ଚିଥିଲା। ସେଠାରୁ ଗାଡି ରଖି ବିଡିଓ ଓ ବ୍ଲକର ଅନ୍ୟ କର୍ମଚାରୀ ଏପିଓ ଅକ୍ଷୟ ବିଷୋୟୀରତ୍ନ, ସହକାରୀ ନିର୍ବାହୀ ଯନ୍ତ୍ରୀ ନୀଳାଞ୍ଚଳ ମହାପାତ୍ର ଓ ପ୍ରତିନିଧିଙ୍କ ସହ ୧୦ କି.ମି. ପାହଡ ଚଢି କ୍ଷତିଗ୍ରସ୍ତ ଗାଁ ଗୁଡିକରେ ପହଞ୍ଚିଥିଲେ। ବିଡିଓ ପ୍ରତି ଘରକୁ ଯାଇ ଲୋକମାନଙ୍କୁ ବୁଝାଶୁୁଝା କରଥିଲେ। ହେଲେ ଲୋକେ ପାହାଡ କାଟି ଗାଁକୁ ରାସ୍ତା ନିର୍ମାଣ କରିବାକୁ ଦାବି କରିଥିଲେ। କ୍ଷତିଗ୍ରସ୍ତ ଲୋକେ ସରକାରୀ ଯୋଜନା ଠିକ୍ ଭାବେ ପାଉଛନ୍ତି କି ନାହିଁ ପଚାରି ବୁଝିବାରୁ ପ୍ରତ୍ୟେକ ପରିବାର ୧ ଲକ୍ଷ ୧୯ ହଜାର ଟଙ୍କା ପାଇଛନ୍ତି ଓ ନିଜ ଇଚ୍ଛାରେ ଏହି ଜାଗା ଛାଡି ଯାଉନୁ ବୋଲି କହିଥିଲେ। ସରକାରଙ୍କ ସମସ୍ତ ସୁବିଧା ସୁଯୋଗ ପାଇଥିବା ସେମାନେ ବିଡିଓଙ୍କୁ କହିଥିଲେ।
