ଫୁଲବାଣୀ ଅଫିସ,୧ା୨: କନ୍ଧମାଳ ଜିଲା ବାଲିଗୁଡ଼ା ବ୍ଲକ ଋତୁଙ୍ଗିଆ ପଞ୍ଚାୟତରେ ଥିବା ଏକ ସ୍କୁଲରେ ବୁଧବାର ଅଘଟଣ ଘଟିଛି। ଜଣେ ଛାତ୍ର ଆଣିଥିବା ବିସ୍ଫୋରକ ବିସ୍ଫୋରଣ ହେବାରୁ ୩ ଛାତ୍ର ଗୁରୁତର ହୋଇଛନ୍ତି। ସେମାନଙ୍କ ମଧ୍ୟରୁ ୨ ଜଣଙ୍କ ଅବସ୍ଥା ସଂକଟାପନ୍ନ ଅବସ୍ଥାରେ ବ୍ରହ୍ମପୁର ମେଡିକାଲରେ ଭର୍ତ୍ତି କରାଯାଇଛି। ପୋଲିସ ଘଟଣାର ତଦନ୍ତ ଚଳାଇଥିବା ବେଳେ ସ୍କୁଲ କର୍ତ୍ତୃପକ୍ଷ ଏ ବିଷୟରେ ମୁହଁ ଖୋଲୁ ନାହାନ୍ତି।
ମିଳିଥିବା ସୂଚନାନୁସାରେ, ଉକ୍ତ ସ୍କୁଲର ହଷ୍ଟେଲରେ ରହି ଜଣେ ପିଲା ୭ମ ଶ୍ରେଣୀରେ ପଢୁଥିଲେ। ସକାଳେ ସ୍କୁଲକୁ ପିଲାମାନେ ଯାଇଥିଲେ। ଖାଇବା ଛୁଟି ସମୟରେ ସେହି ୭ମ ଶ୍ରେଣୀ ପିଲା ଜଣକ କେଉଁଠୁ ଗୋଟେ ବିସ୍ଫୋରକ ଆଣି ସାଥି ପିଲାମାନଙ୍କୁ ଦେଖାଇଥିଲେ। ହଠାତ୍ ଏହା ବିସ୍ଫୋରଣ ହେବାରୁ ଛାତ୍ରଙ୍କ ସମେତ ଆଉ ଦୁଇ ଜଣ ଗୁରୁତର ହୋଇ ପଡ଼ିଥିଲେ। ସଙ୍ଗେ ସଙ୍ଗେ ସେମାନଙ୍କୁ ବାଲିଗୁଡ଼ା ଉପଖଣ୍ଡ ଚିକିତ୍ସାଳୟ ଏବଂ ପରେ ବ୍ରହ୍ମପୁର ମେଡିକାଲକୁ ରେଫର କରାଯାଇଥିଲା। ଦୁଇ ଜଣଙ୍କ ଅବସ୍ଥା ସଂକଟାପନ୍ନ ରହିଛି। ହଷ୍ଟେଲରେ ରହୁଥିବା ଛାତ୍ର ଜଣକ ବିସ୍ଫୋରକ କେଉଁଠୁ ଆଣିଲେ ବା କେଉଁଠୁ ପାଇଲେ ତାହା ଜଣାପଡ଼ିନାହିଁ। ଘଟଣାକୁ ନେଇ ଅଭିଭାବକଙ୍କ ମହଲରେ ଉତ୍ତେଜନା ପ୍ରକାଶ ପାଇଛି।
