ଛତ୍ରପୁର,୧୨ା୮(ଡି.ଏନ୍.ଏ.): ସରକାରୀ କାର୍ଯ୍ୟରେ ଅବହେଳା ଓ ଅନିୟମିତତା ନେଇ ୩ ଜଣ ସହକାରୀ ଶିକ୍ଷକଙ୍କୁ କାରଣ ଦର୍ଶାଅ ନୋଟିସ୍ ଜାରି ହୋଇଛି। ସେମାନେ ହେଲେ ଗଞ୍ଜାମ ଜିଲା ଖଲିକୋଟ ବ୍ଲକ ଅଧୀନ ଝରାପଲ୍ଲୀ ପ୍ରକଳ୍ପ ଉଚ୍ଚ ପ୍ରାଥମିକ ସ୍କୁଲର ସହକାରୀ ଶିକ୍ଷକ ମଧୁଚରଣ ସେଠୀ, କୈରାସୀ ନୋଡାଲ ୟୁପି ସ୍କୁଲର ସହକାରୀ ଶିକ୍ଷକ କ୍ଷୀତିଶ ଦାଶ ଓ କୋମଣ୍ଡ ଉଚ୍ଚ ପ୍ରାଥମିକ ସ୍କୁଲର ସହକାରୀ ଶିକ୍ଷକ କିଶୋର ଚନ୍ଦ୍ର ଘାସି। ଏମାନଙ୍କୁ ଛତ୍ରପୁର ତଥା ଖଲିକୋଟ ବ୍ଲକ ଶିକ୍ଷାଧିକାରୀ (ବିଇଓ) ଅବିନାଶ ଶତପଥୀ( ଚିଠି ନମ୍ବର ୧୭୯୧,୧୭୯୫ ଓ ୧୭୯୯)ରେ ଏହି କାରଣଦର୍ଶାଅ ନୋଟିସ୍ ଜାରି କରିଛନ୍ତି। ୭ ଦିନ ମଧ୍ୟରେ ଉକ୍ତ ନୋଟିସ୍ର ଉତ୍ତର ଦେବାକୁ କୁହାଯାଇଛି। ଏଥିରେ ଖିଲାପ କଲେ ଏମାନଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉକ୍ତ ନୋଟିସ୍ରେ ସତର୍କ କରାଇ ଦିଆଯାଇଛି। ଏଥିସହ ଏମାନଙ୍କ ସର୍ଭିସ ବୁକ୍ ମଧ୍ୟ ପ୍ରଭାବିତ ହେବ ବୋଲି କୁହାଯାଇଛି।
ଉକ୍ତ ଶିକ୍ଷକମାନେ ଅନ୍ୟ ଶିକ୍ଷକମାନଙ୍କୁ ପ୍ରରୋଚିତ କରିବା ସହ ଉଚ୍ଚ କର୍ତ୍ତୃପକ୍ଷଙ୍କୁ ସୂଚନା ନ ଦେଇ ଅନଶନ କରାଇବା, ସରକାରୀ କାର୍ଯ୍ୟରେ ଅବହେଳା, ଅନିୟମିତତା, ଉଚ୍ଚ କର୍ତ୍ତୃପକ୍ଷଙ୍କୁ ଅମାନ୍ୟ କରିବା, କୋଭିଡ୍ ପ୍ରୋଟୋକଲ ନ ମାନି ସମୂହ ଶିକ୍ଷକ ଏକାଠି ହୋଇ ବୈଠକ କରିବା ଏବଂ ବ୍ଲକ ଶିକ୍ଷାଧିକାରୀଙ୍କ ଅଫିସକୁ ଅଯଥାରେ ଆସି ଅନ୍ୟ କର୍ମଚାରୀମାନଙ୍କ ଦୈନନ୍ଦିନ କାର୍ଯ୍ୟରେ ବାଧା ସୃଷ୍ଟି କରିଥିବା ଦର୍ଶାଇ ବିଇଓ ଏହି କାରଣ ଦର୍ଶାଅ ନୋଟିସ୍ ଜାରି କରିଛନ୍ତି।
