କେନ୍ଦୁଝର,୧୨।୭(ସ୍ବ.ପ୍ର.): କେନ୍ଦୁଝର ଜିଲାରେ ରବିବାର ଜଣେ କରୋନା ଯୋଦ୍ଧାଙ୍କ ସମେତ ୩ କରନା ପଜିଟିଭ ଚିହ୍ନଟ ହୋଇଛନ୍ତି। ସେମାନଙ୍କ ମଧ୍ୟରୁ କବିତ୍ର ଗ୍ରାମରେ ପୂର୍ବରୁ ଚିହ୍ନଟ ଜଣେ ରୋଗୀଙ୍କ ଲୋକାଲ କଣ୍ଟାକ୍ଟରେ ଆସିଥିବା ପ୍ରଶାସନ ପକ୍ଷରୁ କୁହାଯାଇଛି। କରନା ଯୋଦ୍ଧା ଯେଉଁଠି କାମ କରୁଥିଲେ ସେସବୁ ସ୍ଥାନ ସିଲ୍ କରାଯାଇଛି। ତାଙ୍କ ସଂସ୍ପର୍ଶରେ ଆସିଥିବା ଲୋକଙ୍କୁ ଚିହ୍ନଟ କରାଯାଉଛି। କେନ୍ଦୁଝର ସହରରେ ଶଟଡାଉନ୍ ହେବ ନାହିଁ। ଅଣ ଅତ୍ୟାବଶ୍ୟକ ସାମଗ୍ରୀ ଦୋକାନ ଓ ମାର୍କେଟ କମ୍ପ୍ଲେକ୍ସଗୁଡ଼ିକ ବନ୍ଦ ସମୟ ଦିନ ୨ଟା ଧାର୍ଯ୍ୟ କରାଯାଇଛି ବୋଲି ଜିଲାପାଳ ଆଶୀଷ ଠାକ୍ରେ ପ୍ରେସ ମିଟ୍ରେ କହିଛନ୍ତି। ରବିବାର ଚିହ୍ନଟଙ୍କୁ ମିଶାଇ ଜିଲାରେ ଆକ୍ରାନ୍ତଙ୍କ ସଂଖ୍ୟା ୨୯୫ରେ ପହଞ୍ଚି ଥିବା ବେଳେ ୧୭୮ ଜଣ ସୁସ୍ଥ ହୋଇ ଘରକୁ ଫେରିଛନ୍ତି। ୧୧୭ଜଣ ଏବେ କୋଭିଡ-୧୯ ହସ୍ପିଟାଲରେ ଚିକିତ୍ସାଧୀନ ଅଛନ୍ତି।
