ନୂଆଦିଲ୍ଲୀ,୨୮।୯: ରାଜସ୍ଥାନ କଂଗ୍ରେସରେ ବିଦ୍ରୋହ ପାଇଁ ମୁଖ୍ୟମନ୍ତ୍ରୀ ଅଶୋକ ଗେହଲଟ୍ଙ୍କ ୩ ଅନୁଗତ ବିଧାୟକଙ୍କୁ ଦାୟୀ କରାଯାଇଛି। ସେମାନେ ହେଲେ ବିଧାନସଭାରେ ଦଳର ମୁଖ୍ୟ ହୁଇପ୍ ମହେଶ ଜୋଷୀ, ଆର୍ଟିଡିସି ଅଧ୍ୟକ୍ଷ ଧର୍ମେନ୍ଦ୍ର ପାଠକ ଏବଂ ଶାନ୍ତି ଧରିଓ୍ବାଲ। ସେମାନେ ବିଧାୟକମାନଙ୍କ ସମାନ୍ତରାଳ ବୈଠକ ଡକାଇ ପରବର୍ତ୍ତୀ ମୁଖ୍ୟମନ୍ତ୍ରୀଙ୍କ ସମ୍ପର୍କରେ ପ୍ରସ୍ତାବ ଗୃହୀତ କରାଇଥିଲେ। ୩ ନେତାଙ୍କୁ ଦଳ ପକ୍ଷରୁ କାରଣ ଦର୍ଶାଅ ନୋଟିସ ଜାରି ହୋଇଛି। ତେବେ ବିଦ୍ରୋହ ପାଇଁ କେନ୍ଦ୍ରୀୟ ପର୍ଯ୍ୟବେକ୍ଷକ ତାଙ୍କ ରିପୋର୍ଟରେ ଗେହଲଟ୍ଙ୍କୁ ସିଧାସଳଖ ଦାୟୀ କରିନାହାନ୍ତି। ରବିବାର ଚାଲିଥିବା ଡ୍ରାମାରେ ଉପସ୍ଥିତ ଥିବା ରାଜ୍ୟ ପ୍ରଭାରୀ ଅଜୟ ମାକେନ୍ ଦଳ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ରିପୋର୍ଟ ପ୍ରଦାନ କରିବା ସହ ୩ ବିଧାୟକଙ୍କ ବିରୋଧରେ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଲାଗି ସୁପାରିସ କରିଥିଲେ।
ରବିବାର ବୈଠକରେ ଗେହଲଟଙ୍କ ସମର୍ଥକ ବିଧାୟକମାନେ ୨୦୨୦ରେ ସଚିନ ପାଇଲଟ୍ଙ୍କ ବିଦ୍ରୋହ ପ୍ରସଙ୍ଗ ଉଠାଇ ସେହି ସମୟରେ ସରକାରଙ୍କୁ ସମର୍ଥନ କରିଥିବା ବିଧାୟକଙ୍କ ମଧ୍ୟରୁ ଜଣକୁ ମୁଖ୍ୟମନ୍ତ୍ରୀ ବାଛିବା ପାଇଁ ପ୍ରସ୍ତାବ ଗୃହୀତ କରାଇଥିଲେ। ପାଇଲଟ୍ଙ୍କୁ ମୁଖ୍ୟମନ୍ତ୍ରୀ କରାଇ ନ ଦେବା ଲାଗି ସେମାନେ ସମୂହ ଇସ୍ତଫା ଧମକ ଦେଇଥିଲେ। କେନ୍ଦ୍ରୀୟ ପର୍ଯ୍ୟବେକ୍ଷକ ଜଣ ଜଣକରି ବିଧାୟକଙ୍କୁ ଭେଟିବା ଲାଗି ସୋନିଆ ଗାନ୍ଧୀ ନିର୍ଦ୍ଦେଶ ଦେଇଥିଲେ ହେଁ ଗେହଲଟ୍ଙ୍କ ଅନୁଗତମାନେ ତାହାକୁ ଅବଜ୍ଞା କରିଥିଲେ। ପରବର୍ତ୍ତୀ କଂଗ୍ରେସ ଅଧ୍ୟକ୍ଷ ନିର୍ବାଚିତ ହେବା ପର୍ଯ୍ୟନ୍ତ ରାଜ୍ୟରେ ସ୍ଥିତାବସ୍ଥା ଜାରି ରଖିବା ପାଇଁ ସେମାନେ ଦାବି କରିଥିଲେ। ଯାହା ଫଳରେ ଗେହଲଟ୍ ଅଧ୍ୟକ୍ଷ ହୋଇଥିଲେ ମୁଖ୍ୟମନ୍ତ୍ରୀ ଚୟନ କ୍ଷମତା ତାଙ୍କୁ ମିଳିଯାଇଥାନ୍ତା। ବିଧାୟକମାନେ ବିଶୃଙ୍ଖଳା ସୃଷ୍ଟି କରିବା ସହ ସ୍ଥିତାବସ୍ଥା ଜାରି ଲାଗି ଦାବି କରିବା ସ୍ବାର୍ଥ ନିହିତ ଦ୍ୱନ୍ଦ୍ୱ ସୃଷ୍ଟି କରିଥାନ୍ତା ବୋଲି ମାକେନ ତାଙ୍କ ରିପୋର୍ଟରେ ଦର୍ଶାଇଛନ୍ତି।
ସେପଟେ ରାଜସ୍ଥାନ ସଙ୍କଟର ସମାଧାନ ପାଇଁ ଦଳର କେତେଜଣ ବରିଷ୍ଠ ନେତା ଉଦ୍ୟମ ଆରମ୍ଭ କରିଛନ୍ତି। ଅମ୍ବିକା ସୋନି ଏବଂ ଆନନ୍ଦ ଶର୍ମା କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ସହ ଆଲୋଚନା କରିବା ପରେ ଗେହଲଟ୍ଙ୍କ ସହ ଫୋନ୍ ଯୋଗେ କଥା ହୋଇଛନ୍ତି। ଖୁବ୍ଶୀଘ୍ର ଗେହଲଟ୍ ସୋନିଆଙ୍କୁ ଭେଟିବେ ବୋଲି ଜଣାପଡ଼ିଛି। ବିଦ୍ରୋହ ପାଇଁ ଦାୟୀ ଗେହଲଟ୍ଙ୍କ ଅନୁଗତ ନେତାଙ୍କୁ ଚେତାବନୀ ଦିଆଯିବ। ଏବେ ବି ଗେହଲଟ୍ଙ୍କୁ କଂଗ୍ରେସ ଅଧ୍ୟକ୍ଷ ଦୌଡ଼ରୁ ବାଦ୍ ଦିଆଯାଇ ନ ଥିବା ଦଳୀୟ ସୂତ୍ରରୁ କୁହାଯାଇଛି। ଅନ୍ୟପକ୍ଷରେ ରାଜସ୍ଥାନର ପୂର୍ବତନ ଉପମୁଖ୍ୟମନ୍ତ୍ରୀ ତଥା ବରିଷ୍ଠ ନେତା ସଚିନ ପାଇଲଟ୍ ମଙ୍ଗଳବାର ଦିଲ୍ଲୀରେ ପହଞ୍ଚତ୍ଥିଲେ ମଧ୍ୟ ସୋନିଆଙ୍କ ସହ ତାଙ୍କ ବୈଠକ ଏପର୍ଯ୍ୟନ୍ତ ସ୍ଥିର ହୋଇନାହିଁ।
