ନୂଆଦିଲ୍ଲୀ: କରୋନା ପ୍ରଭାବିତ ଦେଶର ଅର୍ଥ ବ୍ୟବସ୍ଥାରେ ବଜାର ଚାହିଦା ଫେରାଇ ଆଣିବା ଲାଗି ସରକାର ବିଭିନ୍ନ ପଦକ୍ଷେପ ନେଉଛନ୍ତି। ଏହା ଅନ୍ତର୍ଗତ କେନ୍ଦ୍ର ସରକାରଙ୍କ ପ୍ରାୟ ୩୦ ଲକ୍ଷ ଅଣଗେଜେଟେଡ୍ କର୍ମଚାରୀଙ୍କୁ ବୋନସ ପ୍ରଦାନ ପ୍ରସ୍ତାବକୁ କ୍ୟାବିନେଟ୍ ବୁଧବାର ମଞ୍ଜୁରୀ ପ୍ରଦାନ କରିଛି। ଏଥିରେ କର୍ମଚାରୀଙ୍କୁ ୩,୭୩୭ କୋଟି ଟଙ୍କା ପ୍ରଦାନ କରାଯିବା ନେଇ ଯୋଜନା ରଖାଯାଇଛି। ୨୦୧୯-୨୦ ଲାଗି ଉତ୍ପାଦକତା ସଂଯୋଗୀ ଏବଂ ଅଣ ଉତ୍ପାଦକତା ସଂଯୋଗୀ ବୋନସକୁ କେନ୍ଦ୍ର କ୍ୟାବିନେଟ୍ ପକ୍ଷରୁ ଅନୁମୋଦନ ମିଳିଛି। ବିଜୟା ଦଶମୀ ପୂର୍ବରୁ କର୍ମଚାରୀଙ୍କୁ ବ୍ୟାଙ୍କ ଆକାଉଣ୍ଟରେ ଏକା ଥରକେ ଏହି ଅର୍ଥ ପ୍ରଦାନ କରାଯିବ ବୋଲି କେନ୍ଦ୍ର ମନ୍ତ୍ରୀ ପ୍ରକାଶ ଜାଭଡେକର ଖବରଦାତା କାର୍ଯ୍ୟକ୍ରମରେ ବୁଧବାର ସୂଚନା ଦେଇଛନ୍ତି। ମଧ୍ୟବିତ୍ତଙ୍କୁ ଏଭଳି ଅର୍ଥ ପ୍ରଦାନ ଦ୍ୱାରା ବଜାରରେ ଚାହିଦା ବଢ଼ାଇବାରେ ସହାୟକ ହୋଇପାରିବ ବୋଲି ଆଶାବାଦୀ ବୋଲି ଜାଭଡେକର କହିଛନ୍ତି। ଅର୍ଥମନ୍ତ୍ରୀ ନିର୍ମଳା ସୀତାରାମନ ଅକ୍ଟୋବର ୧୨ରେ ବିଭିନ୍ନ ଯୋଜନା ଉପରେ ଘୋଷଣା କରିଥିଲେ। ପ୍ରଭାବିତ ଅର୍ଥ ବ୍ୟବସ୍ଥାରେ ଚାହିଦା ଫେରାଇ ଆଣିବା ଉପରେ ଏହି ଘୋଷଣାଗୁଡ଼ିକ ପର୍ଯ୍ୟବସିତ ରହିଥିଲା। ସରକାରୀ କର୍ମଚାରୀଙ୍କ ଖର୍ଚ୍ଚ ବଢ଼ାଇ ବଜାରରେ ଚାହିଦା ବୃଦ୍ଧି ଉପରେ ସରକାର ବର୍ତ୍ତମାନ ଫୋକସ ରଖିଛନ୍ତି। କର୍ମଚାରୀଙ୍କ ଅଗ୍ରିମ ଅର୍ଥ ପ୍ରଦାନ ଏବଂ ପୁଞ୍ଜି ଖର୍ଚ୍ଚ ଉପରେ ମଧ୍ୟ ଗୁରୁତ୍ୱାରୋପ କରାଯାଇଛି।
