ଖଡ଼ିଆଳ,୨।୭(ସୁଜିତ୍ ପ୍ରଧାନ)ନୂଆପଡ଼ା ଜିଲା ଖଡ଼ିଆଳ ଏନ୍ଏସି ଅନ୍ତର୍ଗତ ବିଜେପୁର ଗ୍ରାମ ଗାନ୍ଧୀନଗର ସାହିରେ ଜନସ୍ବାସ୍ଥ୍ୟ ବିଭାଗର ନୂତନ ଗୃହ, ଆୟୁର୍ବେଦିକ ଡାକ୍ତରଖାନା ଏବଂ ମିଶନ ଶକ୍ତି ପାଇଁ ଗୃହ ନିର୍ମାଣ ହୋଇଛି। ଏହି ୩ଟି ସରକାରୀ କୋଠା କୌଣସି କାର୍ଯ୍ୟରେ ଆସୁ ନ ଥିବାରୁ ଏବେ ଏକ ପ୍ରକାର ଭୂତ କୋଠିରେ ପରିଣତ ହେବାକୁ ଯାଉଛି। ପଡାରେ ଥିବା ସମସ୍ତ କୋଠା କାର୍ଯ୍ୟକ୍ଷମ ନ ହେଲେ ଆଗାମୀ ଦିନରେ ପଡ଼ାବାସୀ ଆନ୍ଦୋଳନ କରିବାକୁ ବାଧ୍ୟ ହେବୁ ବୋଲି ଚେତବନୀ ଦେଇଛନ୍ତି।
ସୂଚନା ଯେ, ଜନସ୍ବାସ୍ଥ୍ୟ ବିଭାଗର ମେଗା ପ୍ରୋଜେକ୍ଟରେ ମୁଖ୍ୟ କାର୍ଯ୍ୟାଳୟ ୨୦୧୯ରେ ଗାନ୍ଧିନଗର ସାହିରେ ନିର୍ମାଣ କାମ ଆରମ୍ଭ ହୋଇ ୨୦୨୦ରେ ଶେଷ ହୋଇଛି। ନିର୍ମାଣର ୩ ବର୍ଷ ବିତିଗଲାଣି ହେଲେ ଏଯାଏ ଉଦ୍ଘାଟନ ହୋଇନାହିଁ। ମେଗା ପ୍ରୋଜେକ୍ଟ କାର୍ଯ୍ୟାଳୟ ନୂଆପଡା ଜନସ୍ବାସ୍ଥ୍ୟ ବିଭାଗରେ ବିଳୀନ ହୋଇଯିବାରୁ ମେଗା ପ୍ରୋଜେକ୍ଟ ବିଲ୍ଡିଂର କୌଣସି କାର୍ଯ୍ୟକାରୀ ହୋଇପାରୁ ନ ଥିବା ଜଣାପଡିଛି। ଏହି ମେଗା ପ୍ରୋଜେକ୍ଟ ଅଫିସରେ ଖଡିଆଳ ବ୍ଲକ କାର୍ଯ୍ୟାଳୟ ଓ ପରବର୍ତ୍ତି ସମୟରେ ଏନ୍ଏସି କାର୍ଯ୍ୟାଳୟ ପରିଚାଳନା ପାଇଁ ସ୍ଥିର ହୋଇଥିଲା। ହେଲେ କିଛି ଅସାଧୁ ନେତା ତଥା ଲୋକଙ୍କ ଜାତିଆଣ ମନୋଭାବ ଯୋଗୁ କୌଣସି ସରକାରୀ ଅଫିସ ପରିଚାଳିତ ହୋଇ ପାରି ନ ଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି।
କେବଳ ଆର୍ଡ୍ଲ୍ୟୁଏସ୍ଏର ପ୍ରୋଜେକ୍ଟ ଅଫିସ ନୁହଁ। ଗାନ୍ଧୀନଗର ସାହିରେ ଏକ ସରକାରୀ ଆୟୁବେର୍ଦିକ ହସ୍ପିଟାଲ ଅଛି। ହେଲେ ଗୃହ ଅଭାବରୁ ବିପଦସଙ୍କୁଳ ଅବସ୍ଥାରେ ଚାଲିଛି। ସେହିଭଳି ଗ୍ରାମରେ ଥିବା ମିଶନ ଶକ୍ତି ବିଲଡିଂ କାମ ଶେଷ ହୋଇଛି, ହେଲେ ତାହା ମଧ୍ୟ ପରିଚାଳନା ହୋଇ ପାରୁନାହିଁ। ପାଖରେ ଥିବା ଏଏନଏମ କେନ୍ଦ୍ର ଅମ୍ବେଦକର ସରକାରୀ ସ୍କୁଲ ମଧ୍ୟ ପରିଚାଳିତ ହେଉ ନ ଥିବାରୁ ମେଗା ପ୍ରୋଜେକ୍ଟ କାର୍ଯ୍ୟାଳୟ ସମେତ ସବୁ କୋଠାଘର ସବୁ ଅସାମାଜିକ ଲୋକଙ୍କ ଚରା ଭୁଇଁ ପାଲଟି ଯାଇଛି। ସରକାରୀ ବିଲଡିଂରେ ଅସାମାଜିକ ଯୁବକଙ୍କ ଆଡ୍ଡାସ୍ଥଳୀ ପାଲଟିଛି। ନିର୍ମାଣ ହୋଇଥିବା ସରକାରୀ ଗୃହରେ ଯେ କୌଣସି ସରକାରୀ ଅଫିସ ପରିଚାଳନା ପାଇଁ ସ୍ଥାନୀୟ ଲୋକେ ପ୍ରଶାସନକୁ ବାରମ୍ବାର ଦୃଷ୍ଟି ଆକର୍ଷଣ କରିଆସୁଛନ୍ତି। ହେଲେ କୌଣସି ସୁଫଳ ମିଳୁନାହିଁ। ସ୍ଥାନୀୟ କାଉନସିଲର ମଧ୍ୟ ଅତିଶୀଘ୍ର କୋଠା ସବୁ କାର୍ଯ୍ୟକ୍ଷମ କରବାକୁ ଦାବି କରିଥିବା ବେଳେ ଖଡ଼ିଆଳ ବିଧାୟକ ଅଧିରାଜ ମୋହନ ପାଣିଗ୍ରାହୀ ପ୍ରଶାସନର ଯେତେ ଦୃଷ୍ଟି ଆକର୍ଷଣ କଲେ ମଧ୍ୟ ଶୁଣୁ ନ ଥିବା ଅଭିଯୋଗ କରିଛନ୍ତି। ଏ ନେଇ ଜିଲାପାଳ ହେମକାନ୍ତ ସାଏଙ୍କୁ ପଚାରିବାରୁ ଏହାର ତଦନ୍ତ କରି ଜନସାଧାରଣଙ୍କ କାର୍ଯ୍ୟକୁ ଆସିବା ପରି ସୁବିଧା କରାଯିବ ବୋଲି କହିଛନ୍ତି।
