ଭୁବନେଶ୍ୱର, ୧୦ା୮(ବ୍ୟୁରୋ): ୨୦୨୨-୨୩ ଶିକ୍ଷାବର୍ଷରେ ରାଜ୍ୟରେ ଯୁକ୍ତ୩ରେ ନାମଲେଖା ପାଇଁ ସିଟ୍ ନିଅଣ୍ଟ ପଡ଼ିପାରେ। କାରଣ ଚଳିତବର୍ଷ ଯୁକ୍ତ୨ ପାସ୍ ହାର ତୁଳନାରେ ରାଜ୍ୟର ପ୍ରମୁଖ ଡିଗ୍ରୀ କଲେଜଗୁଡିକରେ ସିଟ୍ କମ୍ ରହିଛି। ତେଣୁ ଯୁକ୍ତ୩ରେ ସିଟ୍ ସଂଖ୍ୟାକୁ ବୃଦ୍ଧି କରା ନ ଗଲେ ନାମଲେଖାରେ ସମସ୍ୟା ଦେଖାଦେଇପାରେ। ଫଳରେ ଏଥର ଛାତ୍ରୀଛାତ୍ରମାନେ ଉଚ୍ଚଶିକ୍ଷାରୁ ବଞ୍ଚତ୍ତ ହେବା ଆଶଙ୍କା କରାଯାଉଛି। ରାଜ୍ୟରେ ଚଳିତବର୍ଷ ଯୁକ୍ତ୨ କଳା, ବିଜ୍ଞାନ, ବାଣିଜ୍ୟ ଏବଂ ଧନ୍ଦାମୂଳକ ଶିକ୍ଷାରେ ମୋଟ ୨,୬୬,୫୬୮ ଜଣ ଛାତ୍ରୀଛାତ୍ର ଉତ୍ତୀର୍ଣ୍ଣ ହୋଇଛନ୍ତି। ତେବେ ରାଜ୍ୟର ଡିଗ୍ରୀ କଲେଜଗୁଡ଼ିକରେ ମୋଟ ୨ଲକ୍ଷ ୪୯ହଜାର ୪୫୩ ସିଟ୍ ରହିଛି। ସିଟ୍ ସଂଖ୍ୟା ଠାରୁ ଉତ୍ତୀର୍ଣ୍ଣ ହୋଇଥିବା ପିଲାଙ୍କ ସଂଖ୍ୟା ୧୭,୧୧୫ ଅଧିକ। ତେଣୁ ନାମଲେଖାରେ ସମସ୍ୟା ଉପୁଜିପାରେ ବୋଲି ଶିକ୍ଷାବିତ୍ମାନେ ଆଶଙ୍କା ପ୍ରକାଶ କରୁଛନ୍ତି।
ସୂଚନାନୁଯାୟୀ, ରାଜ୍ୟରେ ମୋଟ ୧,୦୨୫ଟି ଡିଗ୍ରୀ କଲେଜ ରହିଛି। ସେଥିରେ ମୋଟ୍ ସିଟ୍ ସଂଖ୍ୟା ୨ଲକ୍ଷ ୪୯ହଜାର ୪୫୩। ସେଥିରୁ କଳାରେ ୧,୩୯,୭୯୩ ସିଟ୍ ଥିବାବେଳେ ଫିଜିକାଲ ସାଇନ୍ସ (ପିସିଏମ୍)ରେ ୪୨,୦୧୫, ବାୟୋଲୋଜିକାଲ ସାଇନ୍ସ (ସିବିଜେଡ୍)ରେ ୨୬,୬୦୪, ବାଣିଜ୍ୟରେ ୩୦,୬୭୫, ସେଲ୍ଫ ଫାଇନାନ୍ସରେ ୧,୬୬୬ ଏବଂ ସଂସ୍କୃତରେ ୮,୭୦୦ ସିଟ୍ ରହିଛି। ତେବେ ଏଥର ଯୁକ୍ତ୨ କଳାରେ ୧,୭୧,୨୮୮, ବିଜ୍ଞାନରେ ୭୨,୧୦୬, ବାଣିଜ୍ୟରେ ୨୧,୧୬୫ ଏବଂ ଧନ୍ଦାମୂଳକ ଶିକ୍ଷାରେ ୨,୦୦୯ଜଣ ଛାତ୍ରୀଛାତ୍ର ପାସ୍ କରିଛନ୍ତି। ମୋଟ ୨,୬୬,୫୬୮ ଛାତ୍ରୀଛାତ୍ର ଯୁକ୍ତ୨ ଉତ୍ତୀର୍ଣ୍ଣ ହୋଇଛନ୍ତି। ସେପଟେ ସିବିଏସ୍ଇ ଏବଂ ଆଇଏସ୍ସିଇ ପିଲା ମଧ୍ୟ ରହିଛନ୍ତି। ତେଣୁ ଏଥର ଯୁକ୍ତ୨ ପାଇଁ ପ୍ରାୟ ୨ଲକ୍ଷ ୭୦ହଜାର ପିଲା ଆବେଦନ କରିପାରନ୍ତି ବୋଲି ଅନୁମାନ କରାଯାଉଛି।
ପୂର୍ବରୁ ଯୁକ୍ତ୨ ପରେ ଅନେକ ଛାତ୍ରୀଛାତ୍ର ଇଞ୍ଜିନିୟରିଂ, ଡିପ୍ଲୋମା ଆଦି ବିଭିନ୍ନ ବୈଷୟିକ ଶିକ୍ଷାରେ ନାମଲେଖାଉଥିବାରୁ ଯୁକ୍ତ୩ ବା ଡିଗ୍ରୀ କଲେଜରେ ସିଟ୍ ଖାଲି ପଡୁଥିଲା। ମାତ୍ର ଗତ ଦୁଇବର୍ଷ ହେବ ପାସ୍ ହାର ଅଧିକ ରହୁଥିବାରୁ ଯୁକ୍ତ୩ରେ ମଧ୍ୟ ନାମଲେଖା ସଂଖ୍ୟା ବୃଦ୍ଧି ପାଇଛି। ସେହିପରି ଗତ ୫ବର୍ଷ ହେବ ରାଜ୍ୟରେ ଘରୋଇ ଇଞ୍ଜିନିୟରିଂ କଲେଜରେ ନାମଲେଖା ୮୦% କମ୍ ରହିଛି। ସରକାରୀ ଇଞ୍ଜିନିୟରିଂ କଲେଜରେ ସିଟ୍ ସଂଖ୍ୟା ପ୍ରାୟ ୧୦ହଜାର ମଧ୍ୟରେ ରହିଛି। ଏହାସତ୍ତ୍ୱେ କେବଳ ସରକାରୀ ଇଞ୍ଜିନିୟରିଂ କଲେଜ ପ୍ରତି ପିଲାଙ୍କ ଆଗ୍ରହ ବୃଦ୍ଧି ପାଇଛି। ଫଳରେ ଯେଉଁ ପିଲା ସରକାରୀ ଇଞ୍ଜିନିୟରିଂ କଲେଜରେ ସିଟ୍ ପାଇବାରୁ ବଞ୍ଚତ୍ତ ହେଉଛନ୍ତି, ସେମାନେ ଯୁକ୍ତ୩ରେ ପଢ଼ିବାକୁ ଆଗ୍ରହ ପ୍ରକାଶ କରୁଛନ୍ତି। ତେଣୁ ଏସବୁ ଦିଗକୁ ଦେଖିଲେ ଯୁକ୍ତ୩ରେ ସିଟ୍ ଅଭାବ ପଡ଼ିବ ବୋଲି କୁହାଯାଉଛି। ଏ ସମ୍ପର୍କରେ ଶିକ୍ଷାବିତ୍ ଗୋଲକ ନାୟକ କହିଛନ୍ତି, ଏଥର ପାସ୍ ହାର ଯେହେତୁ ଅଧିକ ରହିଛିି, ତେଣୁ ସମସ୍ୟା ଦେଖାଦେବ। ଆଗକୁ ପିଲାଙ୍କ ଆବେଦନକୁ ଦେଖି ଉଚ୍ଚଶିକ୍ଷା ବିଭାଗ କିଛି ନିର୍ଦ୍ଦିଷ୍ଟ କଲେଜରେ ସିଟ୍ ସଂଖ୍ୟା ବଢ଼ାଇପାରେ। ତେବେ ତାହା କେବଳ ଗୋଟିଏ ବର୍ଷ ପାଇଁ ଲାଗୁ ହେବ। ତେଣୁ ଯୁକ୍ତ୩ ନାମଲେଖାରେ କୌଣସି ଅସୁବିଧା ହେବ ନାହିଁ ବୋଲି ଆଶା କରୁଛି।
ସୂଚନାଯୋଗ୍ୟ, ରାଜ୍ୟର ୮ଟି ଜିଲାରେ ସର୍ବାଧିକ ୫୦ରୁ ଅଧିକ ଡିଗ୍ରୀ କଲେଜ ରହିଛି। ସେଥିମଧ୍ୟରୁ ବାଲେଶ୍ୱରରେ ୭୨ଟି ଡିଗ୍ରୀ କଲେଜ ଥିବାବେଳେ ଜିଲାରେ ମୋଟ୍ ସିଟ୍ ସଂଖ୍ୟା ୧୪,୪୩୬। ସେହିପରି କଟକରେ ୬୭ କଲେଜରେ ୨୦,୪୫୬, ଗଞ୍ଜାମରେ ୬୪ କଲେଜରେ ୨୧,୦୭୨, ଯାଜପୁରରେ ୬୧ କଲେଜରେ ୧୪,୪୬୨, କେନ୍ଦ୍ରାପଡ଼ାରେ ୫୪ କଲେଜରେ ୧୧,୪୦୮, ଖୋର୍ଦ୍ଧାରେ ୬୮ କଲେଜରେ ୧୯,୬୫୩, ମୟୁରଭଞ୍ଜରେ ୬୦ କଲେଜରେ ୧୪,୩୮୪ ଏବଂ ପୁରୀରେ ୫୪ କଲେଜରେ ୧୪,୩୨୦ ସିଟ୍ ରହିଛି। ଚଳିତବର୍ଷ ସିଟ୍ ସଂଖ୍ୟା ଠାରୁ ପିଲାଙ୍କ ସଂଖ୍ୟା ବଢ଼ିଯିବାର ସମ୍ଭାବନା ରହିଛି। ତେଣୁ କଳାରେ ୨୦% ଓ ବିଜ୍ଞାନରେ ପ୍ରାୟ ୧୫% ସିଟ୍ ବୃଦ୍ଧି କରାଯାଇପାରେ ବୋଲି ଚର୍ଚ୍ଚା ହେଉଛି। ତେବେ ଏ ନେଇ ଅଦ୍ୟାବଧି ଉଚ୍ଚଶିକ୍ଷା ବିଭାଗ ପକ୍ଷରୁ କୌଣସି ଘୋଷଣା କରାଯାଇନାହିଁ।
