ନୂଆଦିଲ୍ଲୀ, ୯ା୧ (ପି.ଟି.)-ବ୍ୟାଡ୍ମିଣ୍ଟନ ଓ୍ବାଲର୍ଡ ଫେଡେରେଶନ (ବିଡବ୍ଲ୍ୟୁଏଫ୍) ଶୁକ୍ରବାର ଇଣ୍ଡୋନେସିଆର ୩ଜଣ ବ୍ୟାଡ୍ମିଣ୍ଟନ ଖେଳାଳିଙ୍କୁ ଆଜୀବନ ବାସନ୍ଦ କରିଛି। ଏହି ଖେଳାଳି ତ୍ରୟଙ୍କ ବିରୋଧ ମ୍ୟାଚ ଫିକ୍ସିଂ, ମ୍ୟାଚ ଜାଲିଆତି ଓ ବେଟିଂରେ ଲିପ୍ତ ଥିବା ଅଭିଯୋଗ ହୋଇଥିଲା। ପରସ୍ପରକୁ ଜାଣିଥିବା ଇଣ୍ଡୋନେସିଆର ୮ଜଣ ଖେଳାଳି ୨୦୧୯ ପର୍ଯ୍ୟନ୍ତ ବିଶେଷକରି ଏସିଆରେ ବିଭିନ୍ନ ଲୋୟର ଲେଭଲ ଅନ୍ତର୍ଜାତୀୟ ପ୍ରତିଯୋଗିତାରେ ମ୍ୟାଚ ଫିକ୍ସିଂ, ମ୍ୟାଚ ଜାଲିଆତି ଅବା ବ୍ୟାଡ୍ମିଣ୍ଟନ ବେଟିଂ କାର୍ଯ୍ୟରେ ଲିପ୍ତ ଥିଲେ। ଏହାଦ୍ୱାରା ସେମାନେ ଖେଳର ପରିଚାଳନା ପରିଷଦ ନିୟମର ଉଲ୍ଲଂଘନ କରିଥିଲେ। ଅନ୍ୟ ୫ଜଣଙ୍କୁ ୬ରୁ ୧୨ବର୍ଷ ମଧ୍ୟରେ ସସ୍ପେଣ୍ଡ କରାଯାଇଛି। ଏହାଛଡ଼ା ପ୍ରତ୍ୟେକଙ୍କୁ ୩,୦୦୦ରୁ ୧୨,୦୦୦ ଆମେରିକୀୟ ଡଲାର ମଧ୍ୟରେ ଜରିମାନା କରାଯାଇଛି। ଜଣେ ହ୍ବିସିଲ୍ବ୍ଲୋୟରଙ୍କଠାରୁ ସୂଚନା ପାଇବା ପରେ ଅଭିଯୋଗକୁ ନେଇ ତଦନ୍ତ ହେବାପରେ ଏହି ଦଣ୍ଡବିଧାନ କରାଯାଇଛି। ଏହି ଖେଳାଳିମାନଙ୍କୁ ପ୍ରଥମେ ଗତବର୍ଷ ଜାନୁୟାରୀରେ ସାମୟିକ ସସ୍ପେଣ୍ଡ କରାଯାଇଥିଲା। ବିଡବ୍ଲ୍ୟୁଏଫ୍ କହିଛି, ଦଣ୍ଡିତ ଖେଳାଳିମାନେ ଚାହିଁଲେ ୨୧ଦିନ ଭିତରେ ନିଷ୍ପତ୍ତି ବିରୋଧରେ କୋର୍ଟ ଅଫ୍ ଆର୍ବିଟ୍ରେଶନ ଫର୍ ସ୍ପୋଟର୍ସ (କାସ୍)ରେ ଅପିଲ କରିପାରିବେ।
