ବାସୁଦେବପୁର,୨୭ା୪(ଡି.ଏନ.ଏ.): ଭଦ୍ରକ ଜିଲା ବାସୁଦେବପୁର ଥାନା ଅଧୀନ ବେତଡ଼ା ବଜାରରୁ ତାରାକାନ୍ତ ସାହୁ ନାମକ ଜଣେ ସୁନା ବ୍ୟବସାୟୀଙ୍କ ଦୋକାନରୁ ଚୋରି ଘଟଣାର ପର୍ଦ୍ଦାଫାଶ ହୋଇଛି। ବାସୁଦେବପୁର ପୋଲିସ ଉକ୍ତ ଘଟଣାରେ ୩ ଜଣଙ୍କୁ ଗିରଫ କରିଛି। ୪୮୬ ଗ୍ରାମର ସୁନା ଅଳଙ୍କାର(ଯାହାର ଆନୁମାନିକ ମୂଲ୍ୟ ୩୩ ଲକ୍ଷରୁ ଊର୍ଦ୍ଧ୍ୱ ହେବ), ନଗଦ ୩.୬୦ ଲକ୍ଷ ଟଙ୍କା ଓ ୨ ମୋବାଇଲ ଫୋନ ଜବତ କରିଛି। ଗିରଫ ଯୁବକମାନେ ହେଲେ ଗଞ୍ଜାମ ଜିଲା କାଳଷଣ୍ଢପୁର ଗ୍ରାମର ଏମ୍. ସୁନୀଲ, ଆସ୍କା ଥାନା ଅଧୀନ ଆଇବି କେମ୍ପ ଗ୍ରାମର କୁନା ଦାସ ଓ ଆସ୍କା ଥାନା ଅଧୀନ ସୁନ୍ଦରପେଟା ସାହି ଗ୍ରାମର ସୁନା ଦୋକାନୀ ଏ. ବାବୁ ଆଛାରି। ୩ ଜଣଙ୍କୁ ବୁଧବାର ବାସୁଦେବପୁର ପୋଲିସ କୋର୍ଟଚାଲାଣ କରିଥିବା ଖବରଦାତା ସମ୍ମିଳନୀରେ ଏସ୍ପି ବରୁଣ ଗୁଣ୍ଟୁପାଲି ସୂଚନା ଦେଇଛନ୍ତି।
ପ୍ରକାଶଯୋଗ୍ୟ, ସୁନା ଦୋକାନୀ ତାରାକାନ୍ତ ସାହୁଙ୍କ ସାନଭାଇ କାମିନୀକାନ୍ତ ୧୪ ସେପ୍ଟେମ୍ବର ୨୦୨୨ରେ ଦୋକାନ ଖୋଲିବାକୁ ଆସିଥିଲେ। ଦୋକାନ ଆଗରେ ଅଳିଆ ପଡ଼ିଥିବା ଦେଖି ସେ ସୁନାଭର୍ତ୍ତି ବ୍ୟାଗ ଗାଡ଼ିରେ ରଖି ସଫା କରୁଥିଲେ। ସେହି ସମୟରେ ଦୁର୍ବୃତ୍ତ ଆସି ସୁନାଭର୍ତ୍ତି ବ୍ୟାଗ ନେଇ ଚମ୍ପଟ ମାରିଥିଲେ। ବାସୁଦେବପୁର ଥାନାରେ ଏ ନେଇ ମାମଲା (ନଂ.୪୧୬/୨୨) ରୁଜୁ ହୋଇଥିଲା। ପୋଲିସ ପକ୍ଷରୁ ସିସିଟିଭି ଫୁଟେଜ, ସାଇଣ୍ଟିଫିକ ଟିମ୍, ଡଗ୍ ସ୍କ୍ବାଡର ସହାୟତା ନିଆଯାଇ ଘଟଣାର ତଦନ୍ତ କରାଯାଇଥିଲା। ଏମ୍. ସୁନୀଲ ଓ କୁନା ଦାସ ଏହି ସୁନା ଚୋରି କରି ତାଙ୍କ ଗାଁ ନିକଟସ୍ଥ ଏକ ଗଛତଳେ ମାଟି ଖୋଳି ପୋତିଥିଲେ। ୧ ମାସ ପରେ ତାକୁ ବାହାର କରି ସେହି ଅଞ୍ଚଳର ଦୋକାନୀ ଏ. ବାବୁ ଆଛାରୀଙ୍କୁ ଦେଇଥିଲେ। ତାଙ୍କଠାରୁ ୨ ଜଣ ୬ ଲକ୍ଷ ଟଙ୍କା ନେଇଥିଲେ। ପରେ ଦୋକାନୀ ଜଣକ ଅନ୍ୟଜଣେ ଦୋକାନୀଙ୍କୁ ଏହି ସୁନାକୁ ବିକ୍ରି କରି ୧୩.୫୦ ଲକ୍ଷ ଟଙ୍କା ଆଣିଥିଲେ ବୋଲି ଅଭିଯୁକ୍ତ ପୋଲିସ ଆଗରେ ମାନିଥିଲେ। ଘଟଣାର ଅଧିକ ତଦନ୍ତ ଚାଲିଛି। ଅନ୍ୟ ଯେଉଁମାନେ ଘଟଣାରେ ସମ୍ପୃକ୍ତ ଅଛନ୍ତି ସମସ୍ତଙ୍କୁ ଗିରଫ କରାଯିବ ବୋଲି ଏସ୍ପି କହିଛନ୍ତି। ଏସ୍ଡିପିଓ ସୌରଭ ଓତା, ଆଇଆଇସି ସାବିତ୍ରୀ ପଣ୍ଡା, ଏସ୍ଆଇ ଜିତେନ୍ଦ୍ର ନାୟକ ପ୍ରମୁଖ ସମ୍ମିଳନୀରେ ଉପସ୍ଥିତ ଥିଲେ।
