ଭୁବନେଶ୍ୱର,୮।୯(ବ୍ୟୁରୋ): ବାଦ୍ୟଯନ୍ତ୍ର ସମୂହର ସୁମଧୁର ଧ୍ୱନିରେ ପ୍ରକମ୍ପିତ ହୋଇଉଠିଥିଲା ପୂରା ମଞ୍ଚ। ଝୁମି ଉଠିଥିଲେ ଶ୍ରୋତା, ଦର୍ଶକ ଓ ଅତିଥି। ଅବସର ଥିଲା ରବୀନ୍ଦ୍ର ମଣ୍ଡପରେ ଚାଲିଥିବା ୨୮ତମ ଓଏମ୍ସି ଗୁରୁ କେଳୁଚରଣ ମହାପାତ୍ର ପୁରସ୍କାର ଉତ୍ସବର ତୃତୀୟ ସନ୍ଧ୍ୟା। ବାଦ୍ୟ ସଙ୍ଗୀତ ବି ନଚାଇପାରେ, ଯାହାକୁ ପ୍ରମାଣିତ କରି ଦେଖାଇଥିଲେ ଶିବାଙ୍ଗୀ ଅନୁଷ୍ଠାନର ୧୦ଜଣ ଶିଳ୍ପୀ। ତା’ ସାଙ୍ଗକୁ ଦର୍ଶକଙ୍କ କରତାଳି ‘ମ୍ୟୁଜିକାଲ ମିଲେଙ୍ଗେ’ କାର୍ଯ୍ୟକ୍ରମକୁ ନିଆରା କରିଦେଇଥିଲା।
ଆରମ୍ଭରେ ଶ୍ରୀ ଗଣେଶଙ୍କୁ ଆବାହନ ପୂର୍ବକ ବକ୍ର ତୁଣ୍ଡ ମହାକାୟ ସଙ୍ଗୀତ ସହ ବିଭିନ୍ନ ବାଦ୍ୟଯନ୍ତ୍ରର ଧ୍ୱନି ଭକ୍ତିମୟ ପରିବେଶ ସୃଷ୍ଟି କରିଥିଲା। ବେହେଲାରେ ଅଗ୍ନିମିତ୍ରା ବେହେରା, ବଂଶୀରେ ଶ୍ରୀନିବାସ ଶତପଥୀ, ଗିଟାରରେ ଦେବ ରଞ୍ଜନ ନାୟକ ଓ ପ୍ରଣବ ପ୍ରଧାନ, କିବୋର୍ଡରେ ରମେଶ ଚନ୍ଦ୍ର ବେହେରା, ତବଲାରେ ବିଶ୍ୱ ରଞ୍ଜନ ନନ୍ଦ, ପରକ୍ୟୁଶନରେ ବୈଭବ କୁମାର ଦାସ ଓ ସମୀର ରଞ୍ଜନ ପ୍ରଧାନ, ଡ୍ରମ୍ରେ ବିକଶିତ୍ ସାହୁ ଏବଂ କଣ୍ଠରେ ମିଲନ୍ କୁମାର ପଣ୍ଡା ସମସ୍ତଙ୍କୁ ମନ୍ତ୍ରମୁଗ୍ଧ କରିଦେଇଥିଲେ।
ପ୍ରସ୍ତୁତି ‘ଇମ୍ଫୋସିଆନ୍’ ଏବଂ ‘ଓଡ଼ିଶୀ ଫ୍ୟୁଜନ’ରେ ଶିଳ୍ପୀଙ୍କ ଉତ୍ସାହ ଓ କଳାର ସୃଜନତା ଶ୍ରୋତାଙ୍କୁ ସ୍ତମ୍ଭୀଭୂତ କରିଥିଲା। ପରବର୍ତ୍ତୀ ପ୍ରଦର୍ଶନରେ ବର୍ଷାର ସେ ଶାନ୍ତକାରୀ ଶବ୍ଦକୁ ଧ୍ୱନି ମାଧ୍ୟମରେ ଶ୍ରୋତାଙ୍କ ପାଖରେ ଉପସ୍ଥାପିତ କରିଥିଲେ ଶିଳ୍ପୀ। ସନ୍ଥ କବୀରଙ୍କ ଦୋହାକୁ ସଙ୍ଗୀତ ମାଧ୍ୟମରେ ଚିତ୍ରଣ କରିବା ପରେ ବିନାଶକ ଭଗବାନ ଶିବଙ୍କ ଉପରେ ପର୍ଯ୍ୟବସିତ ଶିବନାସରେ ‘ସୃଜନ’ ପକ୍ଷରୁ ଆୟୋଜିତ ୨୮ତମ ଓଏମ୍ସି ଗୁରୁ କେଳୁଚରଣ ମହାପାତ୍ର ପୁରସ୍କାର ଉତ୍ସବର ତୃତୀୟ ସା ସମାପ୍ତ ହୋଇଥିଲା। ଅତିଥି ଭାବେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗର ନିର୍ଦ୍ଦେଶକ ରଞ୍ଜନ କୁମାର ଦାସ, ‘ଧରିତ୍ରୀ’ ଏବଂ ‘ଓଡ଼ିଶା ପୋଷ୍ଟ’ର ସମ୍ପାଦକ ତଥାଗତ ସତପଥୀ ଓ ‘କାଦମ୍ବିନୀ’ର ସମ୍ପାଦିକା ଡ. ଇତିରାଣୀ ସାମନ୍ତ ଯୋଗ ଦେଇଥିଲେ। ଉତ୍ସବର ପରିକଳ୍ପନା ସୃଜନ ନିର୍ଦ୍ଦେଶକ ଗୁରୁ ରତିକାନ୍ତ ମହାପାତ୍ରଙ୍କ ଦ୍ୱାରା କରାଯାଇଥିବାବେଳେ କାର୍ଯ୍ୟକାରୀ କରିଥିଲେ ଦେବୀପ୍ରସାଦ ମିଶ୍ର। ଡ. ମୃତ୍ୟୁଞ୍ଜୟ ରଥ ଓ ଅନୁଜା ତାରିଣୀ ମିଶ୍ର ଏହାର ପରିଚାଳନା କରିଥିଲେ। ସୃଜନ ଅନୁଷ୍ଠାନର ଫେସବୁକ୍ ପେଜ୍ ଏବଂ ୟୁଟ୍ୟୁବ୍ ଚ୍ୟାନେଲରେ ଏହି ପୁରସ୍କାର ଉତ୍ସବର ସିଧା ପ୍ରସାରଣ କରାଯାଉଛି। ଶ୍ରୀ ଶ୍ରୀ ବିଶ୍ୱବିଦ୍ୟାଳୟ ସହଯୋଗ କରିଥିବାବେଳେ ‘ଧରିତ୍ରୀ’ ଏବଂ ‘ଓଡ଼ିଶା ପୋଷ୍ଟ’ ଏହି ଉତ୍ସବର ମିଡିଆ ପାର୍ଟନର ରହିଛନ୍ତି।
