ଭୁବନେଶ୍ୱର,୨୮ା୧୧(ବ୍ୟୁରୋ): ଓଡ଼ିଶା ସଚିବାଳୟରେ କାର୍ଯ୍ୟ କରୁଥିବା ଜଣେ ଆସିଷ୍ଟାଣ୍ଟ ସେକ୍ସନ ଅଫିସର (ଏଏସ୍ଓ)ଙ୍କୁ ‘ବଜାଜ୍ ଫାଇନାନ୍ସ’ରୁ ୧୦ଲକ୍ଷ ଟଙ୍କା ଲୋନ୍ ଦେବା ଆଳରେ ୨୬.୮୧ ଲକ୍ଷ ଟଙ୍କା ଠକେଇ କରିବା ଅଭିଯୋଗରେ ଭୁବନେଶ୍ୱର ସାଇବର କ୍ରାଇମ ଓ ଅର୍ଥନୈତିକ ଅପରାଧ ଥାନା ପୋଲିସ ମଧ୍ୟପ୍ରଦେଶରୁ ୨ ଭାଇଙ୍କୁ ଗିରଫ କରିଛି। ଅଭିଯୁକ୍ତଦ୍ୱୟ ହେଲେ ମଧ୍ୟପ୍ରଦେଶ ଗ୍ବାଲିୟର ଜିଲା ସିରୋଲ ଥାନା ଅଞ୍ଚଳର ଅଙ୍କିତ କୁମାର ସିଂ (୧୯) ଓ ବଲେନ୍ଦ୍ର ସିଂ (୨୪)। ଭାଇଦ୍ୱୟଙ୍କୁ ଗୁରୁବାର ମଧ୍ୟପ୍ରଦେଶରୁ ଗିରଫ କରାଯିବା ପରେ ସ୍ଥାନୀୟ କୋର୍ଟକୁ ଚାଲାଣ କରାଯାଇଥିଲା। ସେଠାରୁ ଟ୍ରାଞ୍ଜିଟ୍ ରିମାଣ୍ଡରେ ଅଣାଯାଇ ରବିବାର ଭୁବନେଶ୍ୱର ଏସ୍ଡିଜେଏମ୍ କୋର୍ଟ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ଦୁଇଭାଇଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ସେମାନେ ପୂର୍ବରୁ ଏକାଧିକ ଠକେଇ କରିଥିବା ପୋଲିସ ଆଗରେ ସ୍ବୀକାର କରିଛନ୍ତି। ଉଭୟଙ୍କୁ ରିମାଣ୍ଡରେ ଆଣି ଠକେଇ ସଂକ୍ରାନ୍ତରେ ଅଧିକ ତଥ୍ୟ ଯୋଗାଡ଼ କରିବାକୁ ପୋଲିସ ଯୋଜନା କରୁଥିବା ସୂଚନା ମିଳିଛି।
ପୋଲିସ ସୂଚନା ଅନୁଯାୟୀ, ସଚିବାଳୟରେ ଏଏସ୍ଓ ଭାବେ କାର୍ଯ୍ୟ କରୁଥିବା ଅଭିଷେକ ହୋତାଙ୍କୁ ଅଭିଯୁକ୍ତ ଦୁଇ ଭାଇ ଫସାଇଥିଲେ। ଗତ ଜୁନରେ ଅଭିଯୁକ୍ତମାନେ ଯୁବତୀଙ୍କ ପରିଚୟ ଦେଇ କଥା ହୋଇଥିଲେ। ସେ ନିଜକୁ ବଜାଜ୍ ଫାଇନାନ୍ସର କର୍ମଚାରୀ ବୋଲି ପରିଚୟ ଦେଇଥିଲେ। ଅଭିଯୁକ୍ତମାନେ ୧୦ ଲକ୍ଷ ଟଙ୍କାର ଲୋନ ଦେବାକୁ କହିବାରୁ ଅଭିଷେକ ନେବାକୁ ରାଜି ହୋଇଥିଲେ। ଏଥିପାଇଁ ପ୍ରଥମେ ୨୫ ହଜାର ଟଙ୍କା ଦେବାକୁ ପଡ଼ିବ ବୋଲି କହିଥିଲେ। ଏହାପରେ ବିଭିନ୍ନ ନମ୍ବରରୁ ଅଭିଷେକଙ୍କୁ ଫୋନ କରି ଇନ୍ସ୍ୟୁରାନ୍ସ ବାବଦରେ ପୁଣି ୪ ଲକ୍ଷ, ପ୍ରୋସେସିଂ ଫି’ ପାଇଁ ୪୦ ହଜାର ଟଙ୍କା ଦେବାକୁ ପଡ଼ିବ ବୋଲି କହିଥିଲେ। ଏହିପରି ୮ଟି ପର୍ଯ୍ୟାୟରେ ଅଭିଷେକଙ୍କଠାରୁ ଅଭିଯୁକ୍ତମାନେ ୨୬ ଲକ୍ଷ ୮୧ ହଜାର ୨୫୦ ଟଙ୍କା ନେଇଯାଇଥିଲେ। ପରବର୍ତ୍ତୀ ସମୟରେ ଉଭୟ ଅଭିଷେକଙ୍କ ମୋବାଇଲ ନମ୍ବରକୁ ବ୍ଲକ କରି ଦେଇଥିଲେ। ଏନେଇ ଗତ ଅଗଷ୍ଟ ୨୫ରେ ଅଭିଷେକଙ୍କ ଅଭିଯୋଗ କ୍ରମେ ପୋଲିସ ମାମଲା (ନଂ.୩୫/୨୦୨୨) ରୁଜୁ କରି ତଦନ୍ତ ଆରମ୍ଭ କରିଥିଲା। ମଧ୍ୟପ୍ରଦେଶରେ ୨ ଭାଇ ଏହି ଠକେଇ କରୁଥିବା ଜଣାପଡ଼ିବା ପରେ ପୋଲିସ ପରବର୍ତ୍ତୀ ପଦକ୍ଷେପ ଗ୍ରହଣ କରିଥିଲା।
