ମୁମ୍ବାଇ,୪।୧: ନଭେମ୍ବର ୨୦୦୫ ପରେ ସେବାରେ ଯୋଗ ଦେଇଥିବା ରାଜ୍ୟ ସରକାରୀ କର୍ମଚାରୀଙ୍କୁ ପୁରୁଣା ପେନସନ ସ୍କିମ (ଓପିଏସ) ସୁବିଧା ପ୍ରଦାନ କରିବାର ବିକଳ୍ପ ପ୍ରଦାନ କରିବାକୁ ମହାରାଷ୍ଟ୍ର କ୍ୟାବିନେଟ ଗୁରୁବାର ଏକ ପ୍ରସ୍ତାବକୁ ଅନୁମୋଦନ କରିଛି। ସରକାରୀ ଏବଂ ଅର୍ଦ୍ଧ ସରକାରୀ କର୍ମଚାରୀ ଧର୍ମଘଟ କରିବା ପରେ କ୍ୟାବିନେଟରେ ଏହି ନିଷ୍ପତ୍ତି ନିଆଯାଇଛି।
ଏହି କର୍ମଚାରୀ ଏବଂ ଅଧିକାରୀଙ୍କ ଚାହିଦା ଥିଲା ଯେ ଓପିଏସ ପୁନଃ ସ୍ଥାପିତ ହେବା ଉଚିତ୍।
ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ (ସିଏମଓ) କହିଛି ଯେ ନଭେମ୍ବର ୨୦୦୫ ପରେ ଏହି ସେବାରେ ଯୋଗ ଦେଇଥିବା ରାଜ୍ୟ କର୍ମଚାରୀଙ୍କୁ ଓପିଏସର ବିକଳ୍ପ ପ୍ରଦାନ କରୁଥିବା ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛି। ନ୍ୟୁଜ ଏଜେନ୍ସି ପିଟିଆଇ ସହିତ କଥାବାର୍ତ୍ତା କରି ମହାରାଷ୍ଟ୍ର ରାଜ୍ୟ କର୍ମଚାରୀ କନଫେଡେରେସନର ସାଧାରଣ ସମ୍ପାଦକ ବିଶ୍ୱ କାଟକ କହିଛନ୍ତି ଯେ ନଭେମ୍ବର ୨୦୦୫ପୂର୍ବରୁ ନିଯୁକ୍ତ ୨୬,୦୦୦ ରାଜ୍ୟ ସରକାରୀ କର୍ମଚାରୀ କ୍ୟାବିନେଟ ନିଷ୍ପତ୍ତି ଦ୍ୱାରା ଉପକୃତ ହେବ, କିନ୍ତୁ ପରେ ଯୋଗଦାନ ପତ୍ର ଗ୍ରହଣ କରିଥିଲେ। ଏହି ନିଷ୍ପତ୍ତିରୁ କେବଳ ୨୬,୦୦୦ରାଜ୍ୟ ସରକାରୀ କର୍ମଚାରୀ ଉପକୃତ ହେବେ। ରାଜ୍ୟରେ ପ୍ରାୟ ୯ ଲକ୍ଷ ୫୦ହଜାର କର୍ମଚାରୀ ଅଛନ୍ତି, ଯେଉଁମାନେ ନଭେମ୍ବର ୨୦୦୫ ପୂର୍ବରୁ ଏହି ସେବାରେ ଯୋଗ ଦେଇଥିଲେ ଏବଂ ଓପିଏସର ଲାଭ ମଧ୍ୟ ପାଇସାରିଛନ୍ତି। ଓପିଏସ ଅଧୀନରେ ଜଣେ ସରକାରୀ କର୍ମଚାରୀ ମାସିକ ପେନସନ ପାଇଥାନ୍ତି ଯାହାକି ତାଙ୍କର ଶେଷ ବେତନର ୫୦ପ୍ରତିଶତ ଅଟେ। କର୍ମଚାରୀଙ୍କ ଅବଦାନର କୌଣସି ଆବଶ୍ୟକତା ନ ଥିଲା। ସୂଚନାଯୋଗ୍ୟ, ୨୦୦୫ ରେ ରାଜ୍ୟରେ ଓପିଏସ ବନ୍ଦ ହୋଇଯାଇଥିଲା।
