ନବରଙ୍ଗପୁର,୧।୪(ସଦାଶିବ ପ୍ରହରାଜ): ମକା କାରଖାନାରୁ ବାହାରୁଛି ଦୂଷିତ ପାଣି । ତେବେ ଏହା ପିଇ ୨୫ରୁ ଉର୍ଦ୍ଧ୍ବ ଗାଈ, ବଳଦ, ବାଛୁରୀର ମୃତ୍ୟୁ ହୋଇଥିବା ଅଭିଯୋଗ କରିଛନ୍ତି ଗ୍ରାମବାସୀ । କାରଖାନା ଦ୍ୱାରା ହୋଇଥିବା କ୍ଷତି ଯୋଗୁଁ କ୍ଷତିପୂରଣ ଦେବାକୁ ଦାବି କରିଛନ୍ତି । ଅଭିଯୋଗ ପାଇବା ପରେ ନବରଙ୍ଗପୁର ଜିଲାପାଳ ଡଃ ମହେଶ୍ୱର ସ୍ବାଇଁ, ବିଧାୟକ ଗୌରୀଶଙ୍କର ମାଝୀ, କୋଷାଗୁମୁଡା ବିଡ଼ିଓ ଆଶିଷ ତ୍ରିପାଠୀ ଘଟଣା ସ୍ଥଳରେ ପହଞ୍ଚି ଘଟଣା ବିଷୟରେ ପଚାରି ବୁଝିଛନ୍ତି । ଅନ୍ୟପଟେ ପୋଲିସ ପ୍ରଶାସନ ପହଞ୍ଚି ଘଟଣାର ତଦନ୍ତ ଆରମ୍ଭ କରିଛନ୍ତି ।
ଖବର ଅନୁସାରେ, ନବରଙ୍ଗପୁର ଜିଲା କୋଷାଗୁମୁଡା ବ୍ଲକ ରାଜଡ଼ା ପଞ୍ଚାୟତ ବାମୁନି ଗ୍ରାମରେ ଆନ୍ଧ୍ରପ୍ରଦେଶର ଏକ ମକା କାରଖାନା ସ୍ଥାପନ କରାଯାଇଛି । ଏହାର ଦୂଷିତ ପାଣି ନାଳ ମାଧ୍ୟମରେ ବାହାରକୁ ଛଡା ଯାଉଛି । ଅଞ୍ଚଳର ଗାଈ ବଳଦ ବାଛୁରୀ ଖାଦ୍ୟ ଖାଇବାକୁ ଯାଇ ଏହି ଦୂଷିତ ପାଣି ପିଇ ୨୫ ରୁ ଉର୍ଦ୍ଧ୍ବ ମୃତ୍ୟୁ ହୋଇଥିବା ଗ୍ରାମବାସୀ ଅଭିଯୋଗ କରିଛନ୍ତି । ଗାଈ ମୃତ୍ୟୁ ଖବର ଜାଣିବା ପରେ ଜିଲା ପ୍ରଶାସନ, ପୋଲିସ ପ୍ରଶାସନ, ବିଧାୟକ ଓ ପ୍ରାଣୀ ଚିକିତ୍ସକ କର୍ମଚାରୀ ଉପସ୍ଥିତ ରହି କେଉଁ କାରଣରୁ ଏଭଳି ଘଟଣା ଘଟିଛି ତଦନ୍ତ ଆରମ୍ଭ କରିଛନ୍ତି ।
ଅନ୍ୟପଟେ ମୃତ ଗାଈ ମାଲି ମାନେ କ୍ଷତି ପୂରଣ ସହ ଅଞ୍ଚଳର ପଶୁ ସୁରକ୍ଷା ପାଇଁ ଦାବି କରିଛନ୍ତି । କେଉଁ କାରଣରୁ ଗାଈ ମୃତ୍ୟୁ ହୋଇଛି ପାଣିର ପରୀକ୍ଷା ପରେ ଜଣାପଡିବ ବୋଲି ଜିଲାପାଳ କହିଛନ୍ତି । ପ୍ରାଣୀ ଡାକ୍ତର ମୃତ ଗାଈମାନଙ୍କର ବ୍ୟବଚ୍ଛେଦ କରି ରିପୋର୍ଟ ଆସିଲା ପରେ ଯଦି ପ୍ରକୃତରେ ପାଣି ଦ୍ୱାରା ଗାଈ ମୃତ ହୋଇଛନ୍ତି ତେବେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପ୍ରଶାସନ କହିଛି ।
