ନୂଆଦିଲ୍ଲୀ, ୨୨ା୮: ଭାରତରେ ଅନ୍ତର୍ଜାତୀୟ ଛାତ୍ରୀଛାତ୍ରଙ୍କ ସଂଖ୍ୟା ବୃଦ୍ଧି ପାଇଁ ୟୁନିଭର୍ସିଟି ଗ୍ରାଣ୍ଟ୍ କମିଶନ (ୟୁଜିସି) ନୂଆ ପଦକ୍ଷେପ ନେବାକୁ ଯୋଜନା କରିଛନ୍ତି। ଏଣିକି ଦେଶର ବିଶ୍ୱବିଦ୍ୟାଳୟ ଏବଂ ଉଚ୍ଚଶିକ୍ଷାନୁଷ୍ଠାନଗୁଡ଼ିକ ସ୍ନାତକ ଏବଂ ସ୍ନାତକୋତ୍ତର ପାଠ୍ୟକ୍ରମ ପାଇଁ ବିଦେଶୀ ଛାତ୍ରୀଛାତ୍ରଙ୍କ ନିମନ୍ତେ ୨୫% ଅତିରିକ୍ତ ସିଟ୍ ସୃଷ୍ଟି କରିପାରିବେ। ଏଥିସହ ନାମଲେଖା ପାଇଁ ସେମାନଙ୍କୁ କୌଣସି ପ୍ରବେଶିକା ପରୀକ୍ଷା ଦେବାକୁ ପଡ଼ିବ ନାହିଁ ବୋଲି ୟୁଜିସି ଅଧ୍ୟକ୍ଷ ଜଗଦେଶ କୁମାର କହିଛନ୍ତି।
ଭାରତର ୟୁଜି ଏବଂ ପିଜି ପ୍ରୋଗ୍ରାମର ଅନ୍ତର୍ଜାତୀୟକରଣ କରିବା ପାଇଁ ଗତ ସପ୍ତାହରେ ୟୁଜିସି ପକ୍ଷରୁ ବସିଥିବା ଏବ ବୈଠକରେ ଏହି ନିଷ୍ପତ୍ତି ନିଆଯାଇଛି ବୋଲି କୁମାର ସୂଚନା ଦେଇଛନ୍ତି।
ସମ୍ପୃକ୍ତ ଅନୁଷ୍ଠାନର ମୋଟ କ୍ଷମତାଠାରୁ ଅଧିକ ଅତିରିକ୍ତ ସିଟ୍ କରାଯିବା ସମ୍ବନ୍ଧୀୟ ନିଷ୍ପତ୍ତି ନିର୍ଦ୍ଦିଷ୍ଟ ନିୟମାବଳୀ ଅନୁସାରେ ନିଆଯିବ। ଭିତ୍ତିଭୂମି, ଅଧ୍ୟାପିକା ଅଧ୍ୟାପକ ଏବଂ ଅନ୍ୟ ଆବଶ୍ୟକ କର୍ମଚାରୀଙ୍କ ସଂଖ୍ୟା ଆଦିକୁ ଦୃଷ୍ଟିରେ ରଖି ନିୟାମକଙ୍କ ଦ୍ୱାରା ସିଟ୍ ସଂଖ୍ୟା ବୃଦ୍ଧି ବାବଦରେ ବିଚାର କରାଯିବ।
ଭାରତୀୟ ଉଚ୍ଚ ଶିକ୍ଷାନୁଷ୍ଠାନଗୁଡ଼ିକ ବିଦେଶୀ ଛାତ୍ରୀଛାତ୍ରଙ୍କୁ ସେମାନଙ୍କ ସମତୁଲ୍ୟ ଶିକ୍ଷାଯୋଗ୍ୟତା ଭିତ୍ତିରେ ନାମଲେଖା ପାଇଁ ଅନୁମତି ଦେଇପାରନ୍ତି। ଯୋଗ୍ୟତା ମାପକାଠି ନିର୍ଦ୍ଧାରଣ ୟୁଜିସି କିମ୍ବା ଏହା ଦ୍ୱାରା ଗଠିତ ଅନ୍ୟ କୌଣସି ସଂସ୍ଥା କରିବ। ବିଦେଶୀ ଛାତ୍ରୀଛାତ୍ରଙ୍କ ନାମଲେଖା ପ୍ରକ୍ରିୟାରେ ସମ୍ପୂର୍ଣ୍ଣ ସ୍ବଚ୍ଛତା ଅବଲମ୍ବନ କରାଇବ। ତେବେ ଭାରତ ସରକାର ଓ ଏବଂ ଅନ୍ୟ ଦେଶ ମଧ୍ୟରେ କିମ୍ବା ଶିକ୍ଷା ଅନୁଷ୍ଠାନଗୁଡ଼ିକ ମଧ୍ୟରେ ହୋଇଥିବା ଚୁକ୍ତିନାମା ଓ ଏକ୍ଦଚେଞ୍ଜ ପ୍ରେଗ୍ରାମ ଅଧୀନରେ ଅର୍ନ୍ତଜାତୀୟ ବିଦ୍ୟାର୍ଥୀମାନଙ୍କ ପାଇଁ ଏହି ଅତିରିକ୍ତ ସିଟ୍ ଉପଲବ୍ଧ ହେବ ନାହିଁ।
ଅତିରିକ୍ତ ସିଟ୍ କେବଳ ବିଦେଶୀ ଛାତ୍ରୀଛାତ୍ରଙ୍କ ପାଇଁ ଏବଂ ଏଥିରୁ କୌଣସି ସିଟ୍ ଖାଲି ପଡ଼ିଲେ ଅନ୍ୟ କେଉଁ ପିଲା ସେଥିରେ ନାମ ଲେଖାଇପାରିବେ ନାହିଁ। ବହିର୍ବ୍ୟାପାର ମନ୍ତ୍ରଣାଳୟ ତଥ୍ୟ ଅନୁସାରେ, ୨୦୨୧ରେ ମୋଟ ୨୩,୪୩୯ ବିଦେଶୀ ଛାତ୍ରୀଛାତ୍ର ଭାରତ ଆସିଥିଲେ। କରୋନା ମହାମାରୀ ପୂର୍ବରୁ ୨୦୧୯ରେ ଉଚ୍ଚଶିକ୍ଷା ପାଇଁ ୭୫ ହଜାରରୁ ଊର୍ଦ୍ଧ୍ୱ ଛାତ୍ରୀଛାତ୍ର ଭାରତ ଆସିଥିଲେ।
