ପାରାଦୀପ, ୨୧ା୯(ଶରତ ରାଉତ)ପାରାଦୀପ ମାଛଧରା ବନ୍ଦର ପାଖ ମହାନଦୀ ମୁହାଣରେ ମଙ୍ଗଳବାର ବୋଟ୍ ବୁଡ଼ି ଘଟଣାରେ ନିଖୋଜ ଥିବା ୩ ମତ୍ସ୍ୟଜୀବୀଙ୍କ ସନ୍ଧାନ ବୁଧବାର ସା ସୁଦ୍ଧା ମିଳିନାହିଁ। ସେହି ନିଖୋଜଙ୍କୁ ଖୋଜିବା ପାଇଁ ବୁଧବାର ସମୁଦ୍ରରେ କୋଷ୍ଟଗାର୍ଡ ପକ୍ଷରୁ ହେଲିକପ୍ଟର ଓ ପାଟ୍ରୋଲିଂ ଜାହାଜ ଯୋଗେ ଉଦ୍ୟମ ଜାରି ରହିଛି। ନିଖୋଜର ୭୨ ଘଣ୍ଟା ପର୍ଯ୍ୟନ୍ତ ଏପରି କରାଯିବ ବୋଲି କୋଷ୍ଟଗାର୍ଡ ପକ୍ଷରୁ ସୂଚନା ମିଳିଛି। ବୋଟ୍ ବୁଡ଼ି ଘଟଣାର ୨୪ ଘଣ୍ଟା ଅତିକ୍ରାନ୍ତ ହୋଇଥିବାରୁ ନିଖୋଜଙ୍କ ମିଳିବା ଆଶା କ୍ଷୀଣ ହୋଇଛି ବୋଲି କେତେଜଣ ମତ୍ସ୍ୟଜୀବୀ କହିଛନ୍ତି। ଅପରପକ୍ଷେ ଅନ୍ୟ ୩ ଜଣ ଉଦ୍ଧାର ମତ୍ସ୍ୟଜୀବୀ ବୁଧବାର କୂଳକୁ ଫେରିଛନ୍ତି। ସେମାନଙ୍କୁ ବିଜୁ ମେମୋରିଆଲ ହସ୍ପିଟାଲରେ ପ୍ରାଥମିକ ଚିକିତ୍ସା କରାଯାଇଛି। ଅନ୍ୟ ଉଦ୍ଧାର ୨ ଜଣ ମତ୍ସ୍ୟଜୀବୀ ପୋର୍ଟ ହସ୍ପିଟାଲରେ ଚିକିତ୍ସାଧୀନ ଅଛନ୍ତି। ମଙ୍ଗଳବାର ବୋଟ୍ ବୁଡ଼ିଲା ପରେ ପ୍ରାୟ ୫ ଘଣ୍ଟା ଉପରକୁ ଦୃଶ୍ୟମାନ ହେଉଥିଲା। ବୁଧବାର ବୋଟ୍ ସମୁଦ୍ରରେ ଲୀନ ହୋଇଯାଇଛି।
ସୂଚନାଯୋଗ୍ୟ, ମଙ୍ଗଳବାର ମା’ ବାସୁଳେଇ ୨ ନାମକ ବୋଟ୍ ପଞ୍ଜୀକୃତ ନଂ. ଆଇଏନ୍ଡି-ଓଆର୦୪ଏମ୍ଏମ୍୧୬୦ ସମୁଦ୍ରରୁ ମାଛ ଧରି ପୋତାଶ୍ରୟକୁ ଫେରିବା ବେଳେ ମୁହାଣରେ ବୁଡ଼ି ଯାଇଥିଲା। ସେଥିରେ ଥିବା ୮ ଜଣ ମତ୍ସ୍ୟଜୀବୀ ସମୁଦ୍ର ପାଣିରେ ଭାସି ଯାଇଥିଲେ। ପ୍ରଥମେ ଦୁଇଜଣଙ୍କୁ ପାରାଦୀପ ବନ୍ଦର ଟଗ୍ ବୋଟ୍ ସମୁଦ୍ରର ବ୍ରେକ୍ ୱାଟର ପାଖରୁ ଉଦ୍ଧାର କରିଥିଲେ। ସେତେବେଳକୁ ୨ଜଣଙ୍କ ଅବସ୍ଥା ଗୁରୁତର ଥିଲା। ତାଙ୍କୁ ପୋର୍ଟ ହସ୍ପିଟାଲରେ ଭର୍ତ୍ତି କରାଯାଇଛି। ଅନ୍ୟ ୩ ଜଣଙ୍କୁ ଆଉ ଏକ ମାଛଧରା ବୋଟ୍ ସାଇ ଚନ୍ଦ୍ରିକା ସମୁଦ୍ରରୁ ଉଦ୍ଧାର କରିଥିଲା। କିନ୍ତୁ ମୁହାଣ ଅଶାନ୍ତ ଥିବାରୁ ସେମାନଙ୍କୁ କୂଳକୁ ନ ଆଣି ସମୁଦ୍ର ଭିତରେ ରହିଥିଲେ। ବୁଧବାର ପୂର୍ବାହ୍ନ ୧୧ଟାରେ ଜୁଆର ହେବାରୁ ସମ୍ପୃକ୍ତ ବୋଟ୍ କୂଳକୁ ଆସିଥିଲା। ସମ୍ପୃକ୍ତ ୮ ଜଣ ମତ୍ସ୍ୟଜୀବୀଙ୍କ ଘର ଭଦ୍ରକ ଜିଲା ବାସୁଦେବପୁର ଥାନା ଅନ୍ତର୍ଗତ ମନ୍ଦାରୀ ଗ୍ରାମରେ ବୋଲି ଜଣାପଡ଼ିଛି। ନିଖୋଜ ମତ୍ସ୍ୟଜୀବୀ ହେଲେ ସୁନୀଲ ମଲ୍ଲିକ (୩୦), ସୁରେନ୍ଦ୍ର ମଲ୍ଲିକ (୬୦) ଓ ବିଜୟ ମଲ୍ଲିକ ୫୭। ଉଦ୍ଧାର ମତ୍ସ୍ୟଜୀଜୀବମାନେ ହେଲେ ନିର୍ମଳ ମଲ୍ଲିକ (୩୬), ଭାନୁ ମଲ୍ଲିକ (୩୫), ଜୟକୃଷ୍ଣ ମଲ୍ଲିକ (୫୫), ହରିହର ମଲ୍ଲିକ (୩୫) ଓ କମଳା ମଲ୍ଲିକ (୩୮)।
ପ୍ରତ୍ୟେକ ମତ୍ସ୍ୟଜୀବୀଙ୍କ ପାଇଁ ସରକାର ମାଗଣା ବୀମା ଯୋଜନା କରିଛନ୍ତି। କିନ୍ତୁ ଏହି ନିଖୋଜ ମତ୍ସ୍ୟଜୀବୀଙ୍କ ବୀମା ହୋଇଛି କି ନାହିଁ ସେ ପ୍ରସଙ୍ଗରେ ମତ୍ସ୍ୟ ଅଧିକାରୀ ବିଜୟ କରଙ୍କୁ ପଚାରିବାରେ ସେମାନଙ୍କ ଆଧାରକାର୍ଡ ବୋଟରେ ଥିଲା। ତାହା ନଷ୍ଟ ହୋଇଛି। ବାଲେଶ୍ୱର ମତ୍ସ୍ୟ ବିଭାଗ ପାଖରେ ଥାଇପାରେ ବୋଲି ସେ କହିଛନ୍ତି। ମୁହାଣ ଅଞ୍ଚଳ ପୋତି ହୋଇଯିବା ଯୋଗୁ ସେଠାରେ ପାଣି ଛାଡ ସମୟରେ ବୋଟ୍ ଯିବା ଆସିବା କରିବା କଷ୍ଟକର ହେଉଛି ବୋଲି ଓମ୍ଫା ସଭାପତି ଶ୍ରୀକାନ୍ତ ପରିଡା କହିଛନ୍ତି। ୨ବର୍ଷ ତଳେ ପାରାଦୀପ ବନ୍ଦର ପ୍ରଶାସନ ପକ୍ଷରୁ ମୁହାଣ ଖନନ କରାଯାଇଥିଲା। ଏବେ ପୁଣି ପୋତି ହୋଇଗଲାଣି।
