ଦେଓଗାଁ,୨ା୧୨(ଡି.ଏନ.ଏ): ବଲାଙ୍ଗୀର ଜିଲା ଦେଓଗାଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ବର୍ତ୍ତମାନ ନାନା ଅବ୍ୟବସ୍ଥା ଘେରରେ ଚାଲିଛି। ଆବଶ୍ୟକ ଡାକ୍ତର, ନର୍ସ ଓ କର୍ମଚାରୀ ଅଭାବ ଯୋଗୁଁ ୨୪ଘଣ୍ଟିଆ ସ୍ବାସ୍ଥ୍ୟସେବା ପାଇପାରୁନାହାନ୍ତି ଜନସାଧାରଣ। ଅନ୍ୟପକ୍ଷେ ଶିଶୁ ଓ ସ୍ତ୍ରୀ ପ୍ରସୂତୀ ବିଶେଷଜ୍ଞ ଡାକ୍ତର ନ ଥିବାରୁ ଜନସାଧାରଣ ବାହାରକୁ ଯାଇ ଖର୍ଚ୍ଚାନ୍ତ ହୋଇ ଚିକିତ୍ସିତ ହେଉଛନ୍ତି।
୨୦୧୦ ମସିହାରେ ଏଠାରେ ଥିବା ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମାନ୍ୟତା ପାଇଲା। ଫଳରେ ବ୍ଲକର ଜନସାଧାରଣ ଉନ୍ନତ ସେବା ମିଳିବାର ଯଥେଷ୍ଟ ଆଶା ରଖିଥିଲେ। ହେଲେ ଆଜକୁ ୧୨ବର୍ଷ ହେଲା ଏହି ସ୍ବାସ୍ଥ୍ୟକେନ୍ଦ୍ର ସେହି ପୁରୁଣା କୋଠାରେ ଅବ୍ୟବସ୍ଥା ଘେରରେ ଚାଲିଛି। ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ମାନ୍ୟତା କେବଳ କାଗଜ କଲମରେ ସୀମିତ ରହିଯାଇଛି। ସରକାରୀ ନିୟମାନୁସାରେ ଏହି କେନ୍ଦ୍ରରେ ୨ଜଣ ବିଶେଷଜ୍ଞଙ୍କ ସମେତ ୧୨ଜଣ ଡାକ୍ତର ନିଯୁକ୍ତି ହେବା କଥା। ହେଲେ ବର୍ତ୍ତମାନ ଏଠାରେ ମାତ୍ର ୨ଜଣ ଡାକ୍ତର ରହିଛନ୍ତି। ଗୋଷ୍ଠୀ ସ୍ବାସ୍ଥ୍ୟ ଅଧିକାରୀ ଡା.ଚିତ୍ତରଞ୍ଜନ ମିଶ୍ରଙ୍କୁ ରାମଚନ୍ଦ୍ରପୁର ପ୍ରାଥମିକ ଚିକିସତ୍ାଳୟକୁ ଫେରାଇନିଆଯାଇଛି। ଏପଟେ ଡା. ମିଲନମୟୀ ପାଣିଗ୍ରାହୀ ପିଜି କୋର୍ସ ଅଧ୍ୟୟନ ପାଇଁ ବାହାରକୁ ଯିବା ସ୍ଥିର ହୋଇଛି। କିଛି ଦିନତଳେ ଠିକା ଚୁକ୍ତିଭିତ୍ତିକ ଭାବେ ଯୋଗଦେଇଥିବା ୨ଜଣ ଡାକ୍ତର ଇସ୍ତଫା ଦେଇଥିଲେ। ଫଳରେ ବର୍ତ୍ତମାନ ନିୟମିତ ଡାକ୍ତର ଗୀତାଞ୍ଜଳି ସାହୁ ଓ ପାଟଣାଗଡରୁ ଡେପୁଟେସନରେ ଆସିଥିବା ଡା.ଏସ.ମଲ୍ଲିକ କାର୍ଯ୍ୟରତ ରହିଛନ୍ତି। କେବଳ ଡାକ୍ତର ନୁହନ୍ତି, ଚିକିତ୍ସାଳୟରେ ୧୦ଜଣ ନର୍ସ ରହିବା ସ୍ଥଳେ ମାତ୍ର ୨ଜଣ ଅଛନ୍ତି। କିରାଣୀ ଉତ୍ତମ ବାଗଙ୍କୁ ସଇଁତଳା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ସପ୍ତାହକ ୩ଦିନ ପାଇଁ ଡେପୁଟେସନ ଦାୟିତ୍ୱ ଦିଆଯାଇଛି। ଫଳରେ ରୋଗୀସେବା ସହ କାର୍ଯ୍ୟାଳୟ କାମ ବ୍ୟାହତ ହେଉଛି। ଏଣୁ ଏଠାରେ ୨୪ଘଣ୍ଟିଆ ସ୍ବାସ୍ଥ୍ୟସେବା ତ ଦୂରର କଥା ଠିକରୂପେ ୬ଘଣ୍ଟାର ସ୍ବାସ୍ଥ୍ୟସେବା ମଧ୍ୟ ଲୋକଙ୍କୁ ମିଳୁ ନ ଥିବା ଅଭିଯୋଗ ହେଉଛି। ଗତ ଦେଓଗାଁ ପଞ୍ଚାୟତ ସମିତି ବୈଠକରେ ପଞ୍ଚାୟତ ଜନପ୍ରତିନିଧିମାନେ ଡାକ୍ତର ଓ ବିଶେଷଜ୍ଞ ଡାକ୍ତର ଯୋଗାଇ ଦେବାପାଇଁ ବିଧାୟକ ନରସିଂହ ମିଶ୍ରଙ୍କ ନିକଟରେ ଦାବି ଉପସ୍ଥାପନ କରିଥିଲେ। ଏହାସହ ରୋଗୀ କଲ୍ୟାଣ ସମିତି ବୈଠକରେ ମଧ୍ୟ ଡାକ୍ତର ଓ ନର୍ସ ଅଭାବକୁ ନେଇ ଉଦ୍ବେଗ ପ୍ରକାଶ ପାଇଥିଲା। ଏହାସହ ସ୍ବାସ୍ଥ୍ୟକେନ୍ଦ୍ରର ନୂତନକୋଠା ନିର୍ମାଣ, ଗାଡିପାର୍କିଂ ଜୋନ, ବ୍ଲକ ଛକରେ ଗେଟ ନିର୍ମାଣ ଆଦି ଦାବି ଉପସ୍ଥାପନ ହୋଇଥିଲା। ହେଲେ ଏ ପର୍ଯ୍ୟନ୍ତ ଉପରୋକ୍ତ ସମସ୍ୟା ଉପରେ କୌଣସି ପଦକ୍ଷେପ ନିଆ ନ ଯିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଛି।
