ଜଟଣୀ,୨୩ା୯(ରବୀନ୍ଦ୍ର ନାଥ ମହାକୁଡ଼): ଜଟଣୀ ଥାନା ଅଧୀନ ଗଜପତିନଗର ରେତଙ୍ଗ କଲୋନୀ ବଜାରରେ ଥିବା ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍ବି)ର ଏଟିଏମ୍ କାଟି ଦୁର୍ବୃତ୍ତମାନେ ୨୩ ଲକ୍ଷ ୩୯ ହଜାର ଟଙ୍କା ଲୁଟି ନେଇଥିବା ଶୁକ୍ରବାର ଅଭିଯୋଗ ହୋଇଛି। ଏଫ୍ଏସ୍ଏସ୍ ପିଏନ୍ବି ଏଟିଏମ୍ ଇନ୍ଚାର୍ଜ ମନୋଜ କୁମାର ସାହୁଙ୍କ ଅଭିଯୋଗକ୍ରମେ ପୋଲିସ ଘଟଣାର ତଦନ୍ତ ଚଳାଇଛି। ସୂଚନା ମୁତାବକ, ଗୁରୁବାର ରାତି ୧୨ଟା ୫୮ରେ ଏକ ଧଳାରଙ୍ଗର କାର୍ରେ ତିନିଜଣ ବ୍ୟକ୍ତି ପହଞ୍ଚି ୬ରୁ ୭ ମିନିଟ ମଧ୍ୟରେ ଉକ୍ତ ଏଟିଏମ୍ କାଟି ଟଙ୍କା ନେଇ ଫେରାର ହୋଇଯାଇଥିବା ନିକଟରେ ଥିବା ସିସିଟିଭି ଫୁଟେଜରୁ ଜଣାପଡ଼ିଛି। ଏଟିଏମ୍ ସ୍ଥାପନ ହୋଇଥିବା ଘର ମାଲିକ ଶୁକ୍ରବାର ସକାଳେ ଉକ୍ତ ଏଟିଏମ୍ରୁ ଲୁଟ ହୋଇଥିବା ଜାଣିବାକୁ ପାଇଥିଲେ। ଏହା ପରେ ସେ ଥାନାକୁ ଜଣାଇଥିଲେ। ଖବରପାଇ ପୋଲିସ ପହଞ୍ଚି ତଦନ୍ତ କରିଥିଲା। ପରେ ଏଫ୍ଏସ୍ଏସ୍ ପିଏନ୍ବି ଏଟିଏମ୍ ଇନଚାର୍ଜ ମନୋଜ କୁମାର ସାହୁ ଘଟଣାସ୍ଥଳରେ ପହଞ୍ଚି ସ୍ଥିତି ଦେଖିବା ପରେ ଥାନାରେ ଅଭିଯୋଗ କରିଥିଲେ।
