ନାଗୋୟା,୪ା୧୦: ଜାପାନର ପରମ୍ପରା ଓ ଆତିଥ୍ୟକୁ ପ୍ରଦର୍ଶିତ କରୁଥିବା ଲାଇଟ୍ ଓ ମ୍ୟୁଜିକାଲ ଶୋ’ ସହିତ ଏସିଆନ ଗେମ୍ସର ୨୦ତମ ସଂସ୍କରଣ ରବିବାର ଉଦ୍ଯାପିତ ହୋଇଯାଇଛି। ଦୁଇ ସପ୍ତାହରୁ ଊର୍ଦ୍ଧ୍ୱ ଦିନ ଧରି ଚାଲିଥିବା ଏହି ପ୍ରତିଯୋଗିତାରେ ଏସିଆର ୪୫ ଦେଶର ଆଥଲେଟ୍ ଭାଗ ନେଇଥିବା ବେଳେ ୫୦ ବିଶ୍ୱ ରେକର୍ଡ ସମେତ ୩୫୦ରୁ ଅଧିକ ରେକର୍ଡ ସୃଷ୍ଟି ହୋଇଛି।
ମିଜୁହୋ ପାର୍କ ଆଥଲେଟିକ୍ ଷ୍ଟାଡିୟମରେ ଆୟୋଜିତ ଉଦ୍ଯାପନୀ କାର୍ଯ୍ୟକ୍ରମ ୯୦ ମିନିଟ୍ ଧରି ଚାଲିଥିଲା। ଅତିଥିଙ୍କ ଆଗମନ ସହ ଲେଜର ଲାଇଟ୍ ଶୋ’ ଓ ଡ୍ୟାନ୍ସ ଆର୍ଟିଷ୍ଟଙ୍କ ପରଫର୍ମାନ୍ସ ଆରମ୍ଭ ହୋଇଥିଲା। ଏହାପରେ ଆଥଲେଟ୍ ପରେଡ ହୋଇଥିଲା। ଏହି ପ୍ରତିଯୋଗିତାରେ ୨ ସ୍ବର୍ଣ୍ଣ ଓ ୧ ରୌପ୍ୟ ପଦକ ଜିତିଥିବା ଶୁଟର ନୀରୁ ଧଣ୍ଡା ପତାକା ବାହକ ଭାବେ ଭାରତୀୟ ଦଳର ନେତୃତ୍ୱ ନେଇଥିଲେ।
ଆଥଲେଟ୍ସ ପରେଡରେ ଧଳା ଓ ବ୍ଲ୍ୟୁ ପୋଷାକରେ ପ୍ରାୟ ୩୦ ଭାରତୀୟ ଆଥଲେଟ୍ ଓ ଅଧିକାରୀ ଭାଗ ନେଇଥିଲେ। ଯୁବରାଜ ଓ ଯୁବରାଣୀ ଆକିଶିନୋଙ୍କ ଉପସ୍ଥିତିରେ ଅଲିମ୍ପିକ୍ କାଉନସିଲ ଅଫ୍ ଏସିଆ(ଓସିଏ) ସଭାପତି ଶେଖ ଜୋଆନ ବିନ ହାମଦ ଅଲ ଥାନି ପ୍ରତିଯୋଗିତା ଶେଷ ହୋଇଥିବା ଘୋଷଣା କରିଥିଲେ। ପରେ ଓସିଏ ପତାକା ଓ ଟର୍ଚ୍ଚ ୨୦୩୦ ଏସିଆନ ଗେମ୍ସ ଆୟୋଜକ କାତାର ପ୍ରଧାନମନ୍ତ୍ରୀ ଶେଖ ମହମ୍ମଦ ବିନ ଅବଦୁଲ ରହମାନ ଅଲ ଥାନିଙ୍କୁ ହସ୍ତାନ୍ତର କରାଯାଇଥିଲା।