ବେଲଗାଭି,୧୨।୧: ୨୦୨୩ କର୍ନାଟକ ବିଧାନସଭା ନିର୍ବାଚନରେ କଂଗ୍ରେସ ବିଜୟୀ ହୋଇ କ୍ଷମତାକୁ ଆସିଲେ ରାଜ୍ୟର ପ୍ରତି ପରିବାରକୁ ୨୦୦ ୟୁନିଟ୍ ପର୍ଯ୍ୟନ୍ତ ବିଜୁଳି ମାଗଣାରେ ଯୋଗାଇ ଦିଆଯିବ। କର୍ନାଟକ ପ୍ରଦେଶ କଂଗ୍ରେସ ସଭାପତି ଡି.କେ. ଶିବକୁମାର ବୁଧବାର ଏହା ଘୋଷଣା କରିଛନ୍ତି। ଚିକୋଡ଼ିଠାରେ ଦଳର ପ୍ରଜାଧ୍ୱନି ସମ୍ମିଳନୀରେ ଉଦ୍ବୋଧନ ଦେଇ ଶିବକୁମାର କହିଥିଲେ, ଦଳର ଏହା ଏକ ଐତିହାସିକ ଯାତ୍ରା। ପ୍ରଜାଧ୍ୱନି ବସ୍ ଯାତ୍ରା ଜରିଆରେ ଲୋକମାନଙ୍କ ସମସ୍ୟା ଓ ମତାମତ ସଂଗ୍ରହ କରାଯିବ।
୧୯୨୪ରେ ବେଲଗାଭିର ବୀରସୌଧଠାରେ ଅନୁଷ୍ଠିତ କଂଗ୍ରେସ ସମ୍ମିଳନୀରେ ମହାତ୍ମା ଗାନ୍ଧୀ ଅଧ୍ୟକ୍ଷତା କରିଥିଲେ। ଦେଶରେ ଗଣତନ୍ତ୍ର ସ୍ଥାପନ ଲାଗି ବ୍ରିଟିଶ ଶାସକଙ୍କୁ ତଡ଼ିବା ନିମନ୍ତେ ଉକ୍ତ ସମ୍ମିଳନୀରେ ପ୍ରସ୍ତାବ ଗୃହୀତ ହୋଇଥିଲା। ସେହି ସ୍ଥାନରୁ ଆଜି କଂଗ୍ରେସ ତା’ର ଲଢ଼େଇ ଆରମ୍ଭ ଲାଗି ସଂକଳ୍ପ ନେଉଛି ବୋଲି ଶିବକୁମାର କହିଛନ୍ତି।
କଂଗ୍ରେସ ସବୁବେଳେ ଦେଇଥିବା ନିର୍ବାଚନୀ ପ୍ରତିଶ୍ରୁତି ରଖିଆସିଛି। ଭାଜପା ନିର୍ବାଚନ ପୂର୍ବରୁ ଦେଇଥିବା ପ୍ରତିଶ୍ରୁତି ରକ୍ଷା ନ କରି ଲୋକଙ୍କ ଜୀବନ ସହ ଖେଳୁଛି ବୋଲି ଶିବକୁମାର ଅଭିଯୋଗ କରିଥିଲେ। ସେ ରାଜ୍ୟର ଭାଜପା ସରକାରକୁ ୪୦ ପ୍ରତିଶତ କମିଶନ ସରକାର ବୋଲି କହିଥିଲେ। ଏହି ସରକାର ଲୋକଙ୍କ ମଧ୍ୟରେ ସାମ୍ପ୍ରଦାୟିକ ଘୃଣାର ମଞ୍ଜି ବୁଣିବା ସହ ଦୁର୍ନୀତିରେ ଲିପ୍ତ ରହିଛି।
ସରକାର କମିଶନ ଧାର୍ଯ୍ୟ କରୁଛନ୍ତି। ମୁଖ୍ୟମନ୍ତ୍ରୀ ପଦ ପାଇଁ ୨,୫୦୦ କୋଟି ଟଙ୍କା କମିଶନ ଧାର୍ଯ୍ୟ ହୋଇଥିବାବେଳ ମନ୍ତ୍ରୀ ପଦ ଲାଗି ୧୦୦ କୋଟି ଓ କମିଶନର ପଦ ପାଇଁ ୧୫ କୋଟି ଟଙ୍କା ଧାର୍ଯ୍ୟ ହୋଇଛି। ସେହିପରି ପିଡବ୍ଲ୍ୟୁଡି କାମ ପାଇଁ ୪୦ ପ୍ରତିଶତ ସ୍ଥିର କରାଯାଇଥିବା କଂଗ୍ରେସ ନେତା ଅଭିଯୋଗ କରିଛନ୍ତି।
