ହାଟଡିହୀ,୨୦।୧୨(ଡି.ଏନ.ଏ.): କେନ୍ଦୁଝର ଜିଲା ହାଟଡିହୀ ବ୍ଲକ କଳା ସଂସ୍କୃତି ସଂଘକୁ ଆସିଥିବା ଅନୁଦାନ ଏବଂ ଉକ୍ତ ଅନୁଦାନର ଖର୍ଚ୍ଚରୁ ୨୦୦ ଟଙ୍କାର ହିସାବ ମିଳୁନି। ଖର୍ଚ୍ଚ ସମ୍ପର୍କିତ ରିପୋର୍ଟକୁ ଦେଖିଲେ ଏ କଥା ସ୍ପଷ୍ଟ ହୋଇଛି। ୨୦୦ ଟଙ୍କା ବଡ଼ କଥା ହୋଇ ନ ପାରେ କିନ୍ତୁ ଅନ୍ୟପକ୍ଷେ ବ୍ଲକ କଳା ସଂସ୍କୃତି ସଂଘର କ୍ୟାସ ବହି ଏବଂ ଖର୍ଚ୍ଚ ଅନୁଦାନର କାର୍ଯ୍ୟ ତାଲିକା ମଧ୍ୟ ହଜିଯାଇଛି। ଫଳରେ କେବଳ ୨୦୦ ନା ଅଧିକ ଅର୍ଥ ହେର୍ଫେର ହୋଇଛି ତାହା ତଦନ୍ତସାପେକ୍ଷ।
ସାମାଜିକ ସୁରକ୍ଷା ଅଧିକାରୀ ଦାୟିତ୍ୱରେ ଥିବା ଅବିନାଶ ପତିଙ୍କ ସୂଚନା ଅନୁସାରେ, ୨୦୧୧ ଅଗଷ୍ଟ ୨୨ରେ ବ୍ଲକ କଳା ସଂସ୍କୃତି ସଂଘ ଗଠନ ହୋଇଥିଲା। ବିଡିଓ ଏହି ସଂଘର ସଭାପତି। ସଂଘକୁ ୨୦୧୦-୧୧ ବର୍ଷରେ ୨ ଲକ୍ଷ ଟଙ୍କା ସରକାରୀ ଅନୁଦାନ ମିଳିଥିଲା। ୨୦୧୩-୧୪ ରେ ସେଥିରୁ ୧ ଲକ୍ଷ ୮୭ ହଜାର ୨୦୦ ଟଙ୍କା ଦାସକାଠିଆ/ପାଲା ଟ୍ରୁପ୍ସ ବାବଦରେ ଖର୍ଚ୍ଚ ହୋଇଛି। ଗୁରୁତ୍ୱପୂର୍ଣ୍ଣ କଥା ହେଉଛି ୟୁସି (ୟୁଟିଲାଇଜେସନ ସାର୍ଟିଫିକେଟ ବା ଉପଯୋଗିତା ପ୍ରମାଣପତ୍ର) ଫର୍ମ ଓଜିଏଫଆର.୭-ଏ, ରୁଲ ୧୭୨ ଅନୁସାରେ ଦର୍ଶାଯାଇଛି, ମିଳିଥିବା ୨ ଲକ୍ଷ ଅନୁଦାନରୁ ୧ ଲକ୍ଷ ୮୭ ହଜାର ୨୦୦ ଟଙ୍କା ଖର୍ଚ୍ଚ ହେବା ପରେ ଆଉ ୧୨ହଜାର ୬୦୦ ଟଙ୍କା ଅନୁଦାନ ବଳକା ରହିଛି। କିନ୍ତୁ ବଳକା ଅନୁଦାନ ୧୨ ହଜାର ୮୦୦ ଟଙ୍କା ରହିବା କଥା। ଏ ନେଇ ଖୋଦ ବିଡିଓ ଚିଠି ନଂ. ୪୯୩୦/୨୫ ନଭେମ୍ବର ୨୦୧୩ରେ କେନ୍ଦୁଝର ଡିଆଇପିଆର୍ଓଙ୍କୁ ଜଣାଇଥିଲେ। ୟୁସି ପ୍ରଦାନ କରିଥିବା ପୂର୍ବତନ ବିଡିଓ ବିଚିତ୍ର କର କହିଛନ୍ତି, ବ୍ଲକ ଅଫିସରେ ୟୁସି ଯିଏ ଲେଖିଥିଲେ ସିଏ ଦାୟୀ। ମୁଁ କେବଳ ବିଡିଓ ହିସାବରେ ଦସ୍ତଖତ କଲି। ପରବର୍ତ୍ତୀ ବିଡିଓ ସେ ସବୁ ଦେଖିବା କଥା। ସେହିପରି ବ୍ଲକ କଳା ସଂସ୍କୃତି ସଂଘର କ୍ୟାସ ବହି ଏବଂ ଖର୍ଚ୍ଚ ଅନୁଦାନର କାର୍ଯ୍ୟ ତାଲିକା ନ ଥିବା ପତି କହିଛନ୍ତି। ବିଡିଓ ବିନିତା ବିଜୟିନୀଙ୍କ ସହ ଯୋଗାଯୋଗ ପାଇଁ ବାରମ୍ବାର ଚେଷ୍ଟା ସତ୍ତ୍ୱେ ସମ୍ଭବ ହୋଇପାରି ନାହିଁ। ସୂଚନା ଥାଉକି, ବ୍ଲକରେ ବିଭିନ୍ନ କାର୍ଯ୍ୟର ଅଡିଟ୍ ସମୟରେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ(ପିଇଓ) ଗୋପବନ୍ଧୁ ନାୟକଙ୍କ ନାମରେ ୧୩୨ ଟଙ୍କା ପାଇଁ ଆପତ୍ତି ଉଠିବାରୁ ଓଡ଼ିଶା ଲୋକାୟୁକ୍ତ ନୋଟିସ୍ ଜାରି କରି ଜବାବ ରଖିବାକୁ କହିଥିଲେ। କିନ୍ତୁ ପୂର୍ବତନ ବିଡିଓ ୨୦୦ ଟଙ୍କାର ହିସାବ ଦେଇପାରି ନାହାନ୍ତି।
