ଲାଠୋର,୨ା୧୨(ଡି.ଏନ.ଏ.): ଏମ୍ଜିଏନ୍ଆର୍ଇଜିଏସ୍ରେ କାମ କରୁଛୁ। ଏଥିରୁ ଯାହା ରୋଜଗାର ହେଉଛି ସେଥିରେ ଖୁସିରେ ପରିବାର ଚଳାଉଛୁ। ନିଜ ଭିଟାମାଟିରେ କାମ କରି ଜୀଇଁବାର ଯେଉଁ ଆନନ୍ଦ ତାହା ବାହାର ରାଜ୍ୟକୁ ଦାଦନ ଖଟି ଯାଇ ମିିଳବନି। ସମ୍ମାନ ନଷ୍ଟ, ଶାରୀରିକ ଓ ମାନସିକ ନିର୍ଯାତନାରେ ଜୀବନ ଚାଲି ଯିବାର ଭୟ ନାହିଁ। ଏଇଠି ଆମକୁ ସରକାର କାମ ଯୋଗାଇ ଦିଅନ୍ତୁ। ଆମେ ବାହାର ରାଜ୍ୟକୁ ଦାଦନ ଖଟିବାକୁ ଯିବୁ ନାହିଁ। ପୁରା ଗାଁକୁ ଦାଦନମୁକ୍ତ ଗାଁରେ ପରିଣତ କରିବୁ। ଏହିଭଳି କହିଛନ୍ତି ବଲାଙ୍ଗୀର ଜିଲା ଖପ୍ରାଖୋଲ ବ୍ଳକ ମାଲପଡ଼ା ପଞ୍ଚାୟତ ଅନ୍ତର୍ଗତ ଜଲପାଙ୍କେଲ ଗ୍ରାମର ୨୦ଦାଦନ ଶ୍ରମିକ ପରିବାର। ଏହି ଅଞ୍ଚଳରେ ସେମାନେ ଏକ ଉଦାହରଣ ସୃଷ୍ଟି କରିଛନ୍ତି।
ଭିଟାମାଟି ଛାଡ଼ି ଅନ୍ୟ ରାଜ୍ୟକୁ ଦାଦନ ଖଟି ଯିବା ଉପରେ ରୋକ ଲଗାଇବା ପାଇଁ ସରକାର ଏମ୍ଜିଏନଆରଇଜିଏସ୍ରେ କାମ ଯୋଗାଇ ଦେଉଛନ୍ତି। ଅନେକ ଜାଗାରେ ତାର ବ୍ୟତିକ୍ରମ ଦେଖା ଯାଉଥିଲେ ମଧ୍ୟ ଜଲପାଙ୍କେଲ ଗ୍ରାମରେ ଶ୍ରମିକମାନେ ଏହାର ସଦୁପଯୋଗ କରୁଛନ୍ତି। ନିଜ ପରିବାର ସହ ଆଉ ବାହାର ରାଜ୍ୟକୁ ଦାଦନ ଖଟି ଯାଉ ନାହାନ୍ତି। ଏଥିରୁ ଯାହା ରୋଜଗାର କରୁଛନ୍ତି ପରିବାର ଚଳୁଛି ବୋଲି କହିଛନ୍ତି ଗ୍ରାମର ଛଗନ ଦାସ, ଚତୁର ହଂସ, ମଦନ ରଣା, ଆଶାରାମ ହଂସ, ଚକୁ ବେମାଲ, ପୁରନ ଦାସ, ତ୍ରିନାଥ ମାଝି, ମକସିର କଟା, ଡ଼ୁଲାମଣି ରଣା, ନକୁଲ ହଂସ, ବଳଭଦ୍ର ଭୁଏ, କରୁଣା ଭୁଏ, ସୁଜନ ପୁଟେଲ ଏବଂ ଜିତେନ୍ଦ୍ର ରଣାଙ୍କ ପରିବାର। ୨୦୧୯-୨୦ ମସିହାରେ ଏହି ଦାଦନ ପରିବାରରୁ ଆସୁଥିବା ଛଗନ ଦାସ ଜଲପାଙ୍କେଲ ଗ୍ରାମରେ ଗାଁ ସାଥୀଭାବେ ନିଯୁକ୍ତି ପାଇଲା ପରେ ଚିତ୍ର ବଦଳି ଥିଲା। ବାହାର ରାଜ୍ୟକୁ ଦାଦନ ଖଟି ନ ଯାଇ ନିଜ ଅଞ୍ଚଳରେ କାମ କଲେ କଣ ସବୁ ଲାଭ ମିଳିଥାଏ ଶ୍ରମିକ ପରିବାରଙ୍କୁ ବୁଝାଇ ଥିଲେ। ଫଳରେ ଗ୍ରାମରେ ଥିବା ୩୦ପରିବାରଙ୍କ ମଧ୍ୟରୁ ୨୦ପରିବାର ଦାଦନ ଖଟିବାକୁ ଯିବା ବନ୍ଦ କରି ଗାଁରେ କାମ କଲେ। ଏବେ ୧୦ ପରିବାର ଦାଦନ ଖଟି ଯାଉଛନ୍ତି। ଯେଉଁ ପରିବାର ଦାଦନ ଖଟି ଯାଉ ନାହାନ୍ତି ସେମାନେ ଏମଜିଏନଆଇଜିଏସ କାମ କରି ନିଜର ପରିବାର ପ୍ରତିପୋଷଣ କରୁଛନ୍ତି। ଆଗାମୀ ଦିନରେ ଜଲପାଙ୍କେଲ ଗ୍ରାମକୁ ସମ୍ପୂର୍ଣ୍ଣ ଦାଦନ ଶ୍ରମିକ ମୁକ୍ତ ଗ୍ରାମରେ ପରିଣତ କରିବା ଲକ୍ଷ୍ୟ ରଖିଛି ବୋଲି ଛଗନ ପ୍ରକାଶ କରିଛନ୍ତି।
