ବ୍ରହ୍ମପୁର ଅଫିସ,୯।୧୧:ବ୍ରହ୍ମପୁର ମହାନଗର ନିଗମ (ବିଏମ୍ସି)ପକ୍ଷରୁ ବହୁ ଉନ୍ନୟନମୂଳକ ପଦକ୍ଷେପ ଗ୍ରହଣ କରାଯାଉଛି। ଯାହାଦ୍ୱାରା ସହରବାସୀ ଅନେକ କ୍ଷେତ୍ରରେ ଉପକୃତ ହୋଇପାରୁଛନ୍ତି। କିନ୍ତୁ ବିଏମ୍ସି ଦ୍ୱାରା ନିର୍ମାଣ କରାଯାଇଥିବା ଅନେକ ପ୍ରକଳ୍ପ ବର୍ତ୍ତମାନ ଅଲୋଡ଼ା ହୋଇ ରହିଛି। ବର୍ତ୍ତମାନ କୋର୍ଟପେଟା ମର୍ଦ୍ଦରାଜ ଭେଣ୍ଡିଂ ଜୋନ୍କୁ ଉଚ୍ଛେଦ କରାଯାଇ ପ୍ରାୟ ୩ କୋଟି ଟଙ୍କା ବ୍ୟୟରେ ଉନ୍ନତୀକରଣ ପାଇଁ ନିଷ୍ପତ୍ତି ହୋଇଛି। ଏହି ସ୍ଥାନରୁ ବ୍ୟବସାୟୀଙ୍କୁ ସ୍ଥାନାନ୍ତର ପାଇଁ ଅସ୍ଥାୟୀ ଭାବେ କମାପଲି ଓଭରବ୍ରିଜ୍ ତଳେ ଜାଗା ଦିଆଯାଇଛି। କିନ୍ତୁ ସହରରେ ଏଭଳି କିଛି ଭେଣ୍ଡିଂ ଜୋନ୍ ଅଛି, ଯାହା ବର୍ତ୍ତମାନ ଅବହେଳିତ ଓ ଅଲୋଡ଼ା ଅବସ୍ଥାରେ ରହିଛି। ଫଳରେ ବ୍ୟବସାୟୀଙ୍କ ଉଦ୍ଦେଶ୍ୟରେ ନିର୍ମିତ ଭେଣ୍ଡିଂ ଜୋନ୍ଗୁଡିକ ବର୍ତ୍ତମାନ ଅଦରକାରୀ ହୋଇପଡିଛି। ବିଜୁ ପଟ୍ଟନାୟକ ପାର୍କ ନିକଟରେ ଥିବା ଭେଣ୍ଡିଂ ଜୋନ୍ ଏହାର ଉଦାହରଣ ପାଲଟିଛି। ଉକ୍ତ ଭେଣ୍ଡିଂ ଜୋନ୍ ୨୦୧୯ରେ ୧୨ ଲକ୍ଷ ଟଙ୍କା ବ୍ୟୟରେ ନିର୍ମାଣ କରାଯାଇଥିଲା। ଗିରି ମାର୍କେଟଠାରୁ ହନୁମାନ ମନ୍ଦିର ରାସ୍ତା ପାର୍ଶ୍ୱରେ ବସୁଥିବା ବ୍ୟବସାୟୀଙ୍କ ଥଇଥାନ ନିମନ୍ତେ ଏହା ନିର୍ମାଣ ହୋଇଥିଲା। ବିଶେଷକରି ଉକ୍ତ ଭେଣ୍ଡିଂ ଜୋନ୍ରେ ଆମିଷ ବଜାର ପାଇଁ ଲକ୍ଷ୍ୟ ରଖାଯାଇଥିଲା, ଯାହାକୁ ୨୦୧୯ ସ୍ବାୟତ୍ତ ଶାସନ ଦିବସରେ ଉଦ୍ଘାଟନ କରାଯାଇଥିଲା। କିନ୍ତୁ ଆଜକୁ ୩ ବର୍ଷ ବିତିଥିଲେ ସୁଦ୍ଧା ଆଜିଯାଏ କୌଣସି ବ୍ୟବସାୟୀ ଏଠାକୁ ସ୍ଥାନାନ୍ତର ହୋଇନାହାନ୍ତି। ଫଳରେ ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ଭେଣ୍ଡିଂ ଜୋନ୍ ଅଦରକାରୀ ହୋଇପଡ଼ିଛି। ସେହିଭଳି ଅନ୍ୟ ଏକ ଭେଣ୍ଡିଂ ଜୋନ୍ ହେଉଛି ଗୋକର୍ଣ୍ଣେଶ୍ୱର ମନ୍ଦିର ପାର୍ଶ୍ୱ ରାସ୍ତାରେ ଥିବା ଖୋଲା ଭେଣ୍ଡିଂ ଜୋନ୍। ଏହି ଜୋନ୍ଟି ୨୨ ଲକ୍ଷ ଟଙ୍କା ବ୍ୟୟରେ ନିର୍ମିତ ହୋଇଥିବା ବେଳେ ୨୦୧୯ରେ ଉଦ୍ଘାଟିତ ହୋଇଥିଲା। ଉଦ୍ଘାଟନ ପରଠୁ ଏଠାରେ କୌଣସି ବ୍ୟବସାୟୀ ବ୍ୟବସାୟ କରୁ ନ ଥିବା ଦେଖିବାକୁ ମିଳିଛି।
ବିଏମ୍ସି ଏନ୍ଫୋର୍ସମେଣ୍ଟ୍ ପକ୍ଷରୁ ରାସ୍ତା ପାର୍ଶ୍ୱରେ ବସୁଥିବା ବ୍ୟବସାୟୀଙ୍କୁ ତାଗିଦ ପରେ ବର୍ତ୍ତମାନ କେବଳ ଫୁଲ ବ୍ୟବସାୟୀମାନେ ହିଁ ବ୍ୟବସାୟ କରୁଛନ୍ତି। କିନ୍ତୁ କୌଣସି ପରିବା ବ୍ୟବସାୟୀ ଉକ୍ତ ସ୍ଥାନରେ ବେପାର କରିବାକୁ ଇଚ୍ଛା ପ୍ରକାଶ କରୁନାହାନ୍ତି। ବିଏମ୍ସି ପକ୍ଷରୁ ଭେଣ୍ଡିଂ ଜୋନ୍ ସଫେଇ ନିମନ୍ତେ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବାରୁ ବ୍ୟବସାୟ ପାଇଁ ସେଠାକୁ ଯାଉ ନ ଥିବା ବହୁ ବ୍ୟବସାୟୀ ପ୍ରକାଶ କରିଛନ୍ତି। ଅନ୍ୟପଟେ ବର୍ତ୍ତମାନ ବିଏମ୍ସି ପକ୍ଷରୁ ମର୍ଦ୍ଦରାଜ ଭେଣ୍ଡିଂ ଜୋନ୍ର ଉନ୍ନତୀକରଣ ଯୋଜନାକୁ ନେଇ ନାନା ପ୍ରଶ୍ନବାଚୀ ସୃଷ୍ଟି କରିଛି। ବିଏମ୍ସି ପକ୍ଷରୁ ଭେଣ୍ଡିଂ ଜୋନ୍ର ଉନ୍ନତୀକରଣ ପରେ ବ୍ୟବସାୟୀମାନେ ଯଦି ସ୍ଥାନାନ୍ତର ନ ହୁଅନ୍ତି ତେବେ ଅନ୍ୟ ଭେଣ୍ଡିଂ ଜୋନ୍ ଭଳି ଏହା ମଧ୍ୟ ଅଦରକାରୀ ଓ ଅଲୋଡ଼ା ହୋଇଯିବ ବୋଲି ସାଧାରଣରେ ମତ ପ୍ରକାଶ ପାଇଛି। ଏ ନେଇ ବିଏମ୍ସି ଏନ୍ଫୋର୍ସମେଣ୍ଟ ଅଧିକାରୀ ତରୁଣକାନ୍ତଙ୍କ ସହ ଯୋଗାଯୋଗ ବେଳେ ସେ କହିଛନ୍ତି, ଆସନ୍ତା ୧୦ ତାରିଖରେ ଖାଲିପଡ଼ିଥିବା ଭେଣ୍ଡିଂ ଜୋନ୍ଗୁଡ଼ିକୁ ବ୍ୟବସାୟୀଙ୍କୁ ସ୍ଥାନାନ୍ତର ନେଇ ପଦକ୍ଷେପ ଗ୍ରହଣ କରାଯିବ।
