ତିର୍ତ୍ତୋଲ, ୬।୮ (ଡି.ଏନ.ଏ.): ଜଗତ୍ସିଂହପୁର ଜିଲା ତିର୍ତ୍ତୋଲ ବ୍ଲକ ଅନ୍ତର୍ଗତ କନୀମୂଳ ପଞ୍ଚାୟତ ଗଇଠିପୁର ଗ୍ରାମରେ ପଞ୍ଚାୟତ ସମିତି ତରଫରୁ ଅନୁମୋଦିତ ହୋଇଥିବା ପ୍ରକଳ୍ପରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ ହୋଇଛି। ଏନେଇ ବିଡିଓ ଅଟଳ ବିହାରୀ ସ୍ବାଇଁଙ୍କ ସମେତ ବ୍ଲକ ଅଧ୍ୟକ୍ଷ, ପ୍ରକଳ୍ପ ନିର୍ଦ୍ଦେଶକ ଡିଆର୍ଡିଏ ଓ ଜିଲାପାଳଙ୍କ ନିକଟରେ ଲିଖିତ ଅଭିଯୋଗ କରାଯାଇ କାର୍ଯ୍ୟାନୁଷ୍ଠାନ ଦାବି କରାଯାଇଛି।
ଅଭିଯୋଗ ଅନୁଯାୟୀ, ଗ୍ରାମ ପଞ୍ଚାୟତର କେନ୍ଦ୍ରୀୟ ଅର୍ଥ ଆୟୋଗଙ୍କ ଯୋଜନାରେ ୬ ମାସ ତଳେ ଯେଉଁ ସ୍ଥାନରେ ଢଳାଇ ରାସ୍ତା କରାଯାଇଥିଲା, ସେହି ସ୍ଥାନରେ ପୁଣି ଥରେ ଢଳେଇ ରାସ୍ତା କରାଯାଇଛି। ରାସ୍ତା ମରାମତି ନାମରେ ଏଠାରେ ନିମ୍ନମାନର କାମ କରି ଅର୍ଥ ହଡପ କରିବାକୁ ମସୁଧା କରାଯାଇଛି ବୋଲି ଅଭିଯୋଗରେ ଦର୍ଶାଯାଇଛି। ସୂଚନା ଫଳକ ଲଗା ନ ଯାଇ ଏହି ପ୍ରକଳ୍ପ କାର୍ଯ୍ୟକାରୀ ହୋଇଥିବା ଅଭିଯୋଗରେ ଦର୍ଶାଯାଇଛି। ଗଇଠିପୁର ସ୍କୁଲ ନିକଟରୁ ମଲ୍ଲିକ ସାହି ରାସ୍ତା ପର୍ଯ୍ୟନ୍ତ ୧ ଲକ୍ଷ ୫୦ ହଜାର ଟଙ୍କା ବ୍ୟୟ ଅଟକଳରେ ପଞ୍ଚମ ରାଜ୍ୟ ଅର୍ଥ ଆୟୋଗଙ୍କ ଯୋଜନାରେ ୨୦୨୧-୨୨ରେ ଢଳେଇ ରାସ୍ତା କରିବାକୁ ଅନୁମୋଦିତ ହୋଇଥିଲା। ସେହି ରାସ୍ତା ଉପରେ ଏବେ ଗଇଠିପୁର ଦିଗବାରୁଣୀ ଆର୍ଡି ରାସ୍ତାରୁ ମଲ୍ଲିକ ସାହିକୁ ରାସ୍ତା ୪୭,୦୦୦ଟଙ୍କା ବ୍ୟୟ ଅଟକଳରେ ନିର୍ମିତ ହେବା ପାଇଁ କାର୍ଯ୍ୟ ଅନୁମୋଦିତ ହୋଇଛି। ତେବେ ବେଆଇନ ଭାବେ ସେଠାରେ କାମ କରା ନ ଯାଇ ଅନ୍ୟତ୍ର କରାଯାଇଛି। କୌଣସି ଆବଶ୍ୟକତା ନ ଥାଇ ବ୍ୟକ୍ତିଗତ ପୋଖରୀ ନିକଟକୁ ଯିବା ପାଇଁ ଢଳାଇ ରାସ୍ତା ନିର୍ମାଣ କରାଯାଇଥିବା ଅଭିଯୋଗରେ ଦର୍ଶାଯାଇଛି। ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଅରୁଣ ସୂତାର, ପ୍ରଣତି ସେଠି, ସସ୍ମିତା ମଲ୍ଲିକ, ନରେନ୍ଦ୍ର କୁମାର ଖୁଣ୍ଟିଆ, ତପନ ଦାସ, ସ୍ବାଧୀନ କୁମାର ଖୁଣ୍ଟିଆ, ନଗେନ୍ଦ୍ର ଖୁଣ୍ଟିଆ, ଚନ୍ଦ୍ରମଣି ଦାସ, ନିରଞ୍ଜନ ମଲ୍ଲିକ, ବନମାଳୀ ସୂତାର, ସନାତନ ଖୁଣ୍ଟିଆ, ଗିରିଧାରୀ ସେଠୀ, ତପନ ସେଠୀ ପ୍ରମୁଖ ଦାବି କରିଛନ୍ତି। ଏ ସମ୍ପର୍କରେ ବିଡିଓ ସ୍ବାଇଁ କହିଛନ୍ତି, କୌଣସି ନିମ୍ନମାନର କାର୍ଯ୍ୟ ହୋଇନାହିଁ। ଭୁଲ୍ବଶତଃ ପ୍ରକଳ୍ପ ଚିହ୍ନଟ ପାର୍ଶ୍ୱ ପରିବର୍ତ୍ତେ ଅନ୍ୟ ପାଶର୍ବରୁ କାମ କରାଯାଇଛି। ଏନେଇ ବିଲ୍ ଅଟକା ଯାଇଛି ବୋଲି ସେ ସୂଚନା ଦେଇଛନ୍ତି।
