ସୁନ୍ଦରଗଡ,୮ା୧୦(ଜୟ ନାରାୟଣ ମେଣ୍ଡୁଳି)ସୁନ୍ଦରଗଡ ସହର ଉପକଣ୍ଠ ଇବ୍ ନଦୀ ପୋଲ ଉପରେ ଶୁକ୍ରବାର ଉଲଗ୍ନ ହୋଇ ଚାଲି ଚାଲି ଯାଉଥିବା ୨ ଆଦିବାସୀ ମହିଳା ଉଦ୍ଧାର ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି। ସ୍ଥାନୀୟ ବିଧାୟିକା କୁସୁମ ଟେଟେ ୨ ମହିଳାଙ୍କୁ ଏଭଳି ଅବସ୍ଥାରେ ଦେଖି ସଦର ଥାନା ପୋଲିସ ସହାୟତାରେ ଉଦ୍ଧାର କରି ଜିଲା ଆସ୍ଥା ଗୃହକୁ ପଠାଇଥିଲେ। ସେମାନଙ୍କ ମାନସିକ ସ୍ଥିତି ଠିକ ନ ଥିବା ବେଳେ ଆସ୍ଥା ଗୃହ ଅଧିକାରୀ ସ୍ନେହଲତା ପଟେଲଙ୍କ ତତ୍ତ୍ୱାବଧାନରେ ସେମାନଙ୍କୁ ପଚରା ଉଚରା କରାଯାଇଥିଲା। ସେମାନେ ଉଭୟ ଶାରୀରିକ ଓ ମାନସିକ ନିର୍ଯାତନାର ଶିକାର ହୋଇଥିବା ଜଣାପଡ଼ିଛି। ଓଡିଶା ସୀମାନ୍ତବର୍ତ୍ତୀ ଅଞ୍ଚଳ ଖଇରମୁଣ୍ଡାରେ ଉଭୟଙ୍କ ଘର। ସେମାନେ ହେଉଛନ୍ତି ମା’ ଓ ଝିଅ। ସୂଚନାଯୋଗ୍ୟ, ମହିଳା ଜଣଙ୍କ ଖଇରମୁଣ୍ଡାରେ ବିବାହ କରିଥିଲେ। ହେଲେ ସେ ନିଜ ଦିଅରଙ୍କ ଦ୍ବାରା ଯୌନନିର୍ଯାତନାର ଶିକାର ହୋଇଆସୁଥିଲେ। ଏପରିକି ଏହାକୁ ପ୍ରତିବାଦ କରିବାରୁ ତାଙ୍କୁ ଶାରୀରିକ ନିର୍ଯାତନା ମଧ୍ୟ ମିଳୁଥିଲା। ସେହିପରି ତାଙ୍କ ୨୪ବର୍ଷୀୟା ଝିଅ ୪-୫ବର୍ଷ ହେବ ମୁମ୍ବାଇରେ କାମ କରୁଥିଲେ। ପ୍ରତ୍ୟକ୍ଷ ଦର୍ଶୀଙ୍କ କହିବା ଅନୁଯାୟୀ, ପ୍ରଥମେ ସେମାନେ ସାୟା ପିନ୍ଧି ଚାଲୁଥିଲେ। ହେଲେ ସରକାରୀ କଲେଜ ପାଖାପାଖି ଶରୀରରୁ ସାୟା ଖୋଲି ଚାଲି ଚାଲି ଯାଉଥିଲେ। ଏହା ଦେଖି ବିଧାୟିକା କୁସୁମ ସେମାନଙ୍କୁ ଉଦ୍ଧାର କରି କପଡା ପରିଧାନ ପାଇଁ ଦେଇଥିଲେ। ଝିଅଟି ବର୍ତ୍ତମାନ ପର୍ଯ୍ୟନ୍ତ ପାଟି ଖୋଲି ନାହାନ୍ତି। ସେମାନେ ରାସ୍ତାରେ ଦୁଷ୍କର୍ମର ଶିକାର ହୋଇଥାଇପାରନ୍ତି ବୋଲି ଆସ୍ଥା ଗୃହ ଅଧିକାରୀ ସ୍ନେହଲତା ପଟେଲ ଆଶଙ୍କା ପ୍ରକାଶ କରିଛନ୍ତି। ସ୍ବାଭାବିକ ସ୍ଥିତିକୁ ସେମାନେ ଆସିଲା ପରେ ପ୍ରକୃତ କାରଣ ଜଣାପଡିବ ବୋଲି ସ୍ନେହଲତା କହିଛନ୍ତି।
