ପୁରୀ ଅଫିସ,୨୮ା୫: ଶ୍ରୀମନ୍ଦିର ପରିସରରେ ଶନିବାର ମଧ୍ୟାହ୍ନରେ ଏକ ଅଘଟଣ ଘଟିଛି। ମହାପ୍ରସାଦ ବୋଝେଇ ନେଉଥିବା ବେଳେ ଗରମ ଡାଲି ପଡ଼ି ୨ଜଣ ବୋଝିଆ ଆହତ ହୋଇଛନ୍ତି। ଘଟଣାସ୍ଥଳରୁ ଉଭୟଙ୍କୁ ଉଦ୍ଧାର କରି ସଦର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ତେବେ ବାରମ୍ବାର ଏପରି ଘଟଣା ଘଟୁଥିବାବେଳେ ଶ୍ରୀମନ୍ଦିର ପ୍ରଶାସନ ପକ୍ଷରୁ କୌଣସି ପଦକ୍ଷେପ ନିଆଯାଉ ନ ଥିବାରୁ ଶ୍ରୀଜଗନ୍ନାଥ ମନ୍ଦିର ମହାପ୍ରସାଦ ବାହକ ସଂଘ ଅସନ୍ତୋଷ ପ୍ରକାଶ କରିଛି। ସୂଚନାଯୋଗ୍ୟ, ଶନିବାର ମହାପ୍ରଭୁଙ୍କ ପ୍ରଥମ ଭୋଗ ମଣ୍ଡପ ସମ୍ପନ୍ନ ହେବା ପରେ ପରମ୍ପରା ଅନୁଯାୟୀ ବୋଝିଆ ବା ମହାପ୍ରସାଦ ବାହକମାନେ ବେତା ନେଇ ମହାପ୍ରସାଦ ଭୋଗମଣ୍ଡପରୁ କାଢି ଆନନ୍ଦବଜାରକୁ ନେବା ପାଇଁ ଯାଇଥିଲେ। ମହାପ୍ରସାଦ ନେଇ ୨ ବୋଝିଆ ତଳଜଙ୍ଗ ଗ୍ରାମର ପପି ପ୍ରଧାନ ଓ ବ୍ରହ୍ମଗିରି ଅଞ୍ଚଳର ପ୍ରଦୀପ ସାହୁ ଆସିବାବେଳେ ଭୋଗମଣ୍ଡପ ରାସ୍ତା ଖସଡ଼ା ଥିବାରୁ ତାଙ୍କର ଗୋଡ଼ ଖସି ତଳେ ପଡ଼ିଯାଇଥିଲେ। ଫଳରେ ୨ଜଣଙ୍କ ଦେହରେ ଗରମ ଡାଲି ପଡ଼ି ଗୁରୁତର ଆହତ ହୋଇଥିଲେ। ସେମାନଙ୍କୁ ଉଦ୍ଧାର କରି ଶ୍ରୀମନ୍ଦିର ଆମ୍ବୁଲାନ୍ସ ଯୋଗେ ସଦର ମୁଖ୍ୟ ଚିକିତ୍ସାଳୟ ନିଆଯାଇଥିଲା। ଏ ନେଇ ଶ୍ରୀଜଗନ୍ନାଥ ମନ୍ଦିର ମହାପ୍ରସାଦ ସଂଘ ଉଦ୍ବେଗ ପ୍ରକାଶ କରିଛି। ଏ ପ୍ରସଙ୍ଗରେ ସଂଘ ସଭାପତି ରୋହିତ ଦାଶଙ୍କ କହିବା ଅନୁଯାୟୀ, ମହାପ୍ରସାଦ ଭୋଗ ସରିଲେ ବୋଝିଆମାନେ ବେତା ନେଇ ମହାପ୍ରସାଦକୁ ବାହାରକୁ ଆଣନ୍ତି। ଅନେକ ସମୟରେ ମହାପ୍ରସାଦ ଆଣିବା ସମୟରେ ଅଘଟଣ ଘଟୁଛି। ଯାହାକୁ ନେଇ ବୋଝିଆ ଭାଇମାନଙ୍କ ପାଇଁ ପ୍ରଶାସନ ପକ୍ଷରୁ ଇନ୍ସୁରାନ୍ସ କରିବା ପାଇଁ ବାରମ୍ବାର ଶ୍ରୀମନ୍ଦିର ମୁଖ୍ୟ ପ୍ରଶାସକ, ଜିଲାପାଳଙ୍କୁ ଜଣାଯାଉଥିଲେ ମଧ୍ୟ କୌଣସି ପଦକ୍ଷେପ ନିଆଯାଉ ନାହିଁ। ତେଣୁ ସମସ୍ତ ବୋଝିଆଙ୍କ ପାଇଁ ପ୍ରଶାସନ ପକ୍ଷରୁ ଇନ୍ସୁରାନ୍ସ କରାଯାଉ। ସେହିଭଳି ଅନେକ ସମୟରେ ବାହର ପିଲା ଆସି ବିଶୃଙ୍ଖଳା ସୃଷ୍ଟି କରୁଛନ୍ତି। ତେଣୁ ଆଇଡି କାର୍ଡ ପାଇଁ ମଧ୍ୟ କରିବାକୁ ସୁଆର ମହାସୁଆର ନିଯୋଗ, ପ୍ରଶାସନ, ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ନିକଟରେ ଦାବି ହେଉଛି। ଏଥିସହ ଗୋଡ଼ ଖସୁଥିବା ସ୍ଥାନରେ ସ୍ବତନ୍ତ୍ର ବ୍ୟବସ୍ଥା କରିବା ପାଇଁ ସଂଘ ସଭାପତି ରୋହିତ ଦାଶ ଦାବି କରିଛନ୍ତି।
