ଓ୍ବାଶିଂଟନ,୨୩ା୨: ଭାରତୀୟ ବଂଶୋଦ୍ଭବ ଟେକ୍ ଏଣ୍ଟରପ୍ରିନ୍ୟୁର୍ ବିବେକ ରାମାସ୍ବାମୀ ବୁଧବାର ଆମେରିକା ରାଷ୍ଟ୍ରପତି ନିର୍ବାଚନରେ ରିପବ୍ଲିକାନ୍ ପାର୍ଟି ପକ୍ଷରୁ ପ୍ରାର୍ଥୀ ହେବା ପାଇଁ ଅଭିଯାନ ଆରମ୍ଭ କରିଛନ୍ତି। ଗତ ୧୪ ତାରିଖରେ ଭାରତୀୟ ବଂଶୋଦ୍ଭବ ନିକ୍କି ହାଲି ୨୦୨୪ ରାଷ୍ଟ୍ରପତି ନିର୍ବାଚନ ପାଇଁ ନିଜ ପ୍ରାର୍ଥତ୍ତ୍ୱ ନେଇ ଘୋଷଣା କରିଥିବାବେଳେ ବିବେକ ହେଉଛନ୍ତି ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଦ୍ୱିତୀୟ ଚ୍ୟାଲେଞ୍ଜର। ରାଷ୍ଟ୍ରପତି ନିର୍ବାଚିତ ହେଲେ ଚାଇନା ଉପରେ ଆମେରିକାର ନିର୍ଭରଶୀଳତା ହ୍ରାସ କରିବେ ବୋଲି ବିବେକ ପ୍ରତିଶ୍ରୁତି ଦେଇଛନ୍ତି।
ନ୍ୟୁଜ୍କୁ ସାକ୍ଷାତ୍କାର ଦେଇ ବିବେକ କହିଛନ୍ତି, ଆମେ ଜାତୀୟ ପରିଚୟ ସଙ୍କଟ ମଧ୍ୟରେ ରହିଥିବାବେଳେ ଦୀର୍ଘ ସମୟ ଧରି ବିବିଧତାକୁ ମାନିଆସିଛେ। ଆମେରିକାକୁ ପୂର୍ବ ଗୌରବ ଫେରାଇ ଆଣି ପ୍ରତ୍ୟେକଙ୍କ ଜୀବନକୁ ସୁଖମୟ କରିବା ଦିଗରେ ସେ ଉଦ୍ୟମ କରିବେ। ୩୭ ବର୍ଷୀୟ ବିବେକଙ୍କ ମାତାପିତା କେରଳରୁ ଆମେରିକା ଯାଇ ଓହିଓସ୍ଥିତ ଏକ ଜେନେରାଲ ଇଲେକ୍ଟ୍ରିକ୍ ପ୍ଲାଣ୍ଟରେ କାର୍ଯ୍ୟ କରିଥିଲେ। ବିବେକ ୨୦୧୪ରେ ରୋଇଭାଣ୍ଟ୍ ସାଇନ୍ସେସ୍ ପ୍ରତିଷ୍ଠା କରିଥିଲେ। ପରବର୍ତ୍ତୀ ସମୟରେ ସେ ଆଉ କେତେକ ସ୍ବାସ୍ଥ୍ୟ ସେବା ଓ ଟେକ୍ନୋଲୋଜି କମ୍ପାନୀ ଗଢ଼ିଥିଲେ। ୨୦୨୨ରେ ବିବେକ ଷ୍ଟାଇଭ୍ ଆସେଟ୍ ମ୍ୟାନେଜ୍ମେଣ୍ଟ ନାମରେ ଏକ ସଂସ୍ଥା ଖୋଲିଥିଲେ, ଯାହାକି ଆମେରିକୀୟ ଅର୍ଥନୀତିରେ ପ୍ରତ୍ୟେକ ନାଗରିକଙ୍କୁ ସ୍ବର ଉତ୍ତୋଳନ ପାଇଁ ସୁଯୋଗ ଦେଇଥାଏ। ପ୍ରକାଶ ଯେ, ଏକ ପଞ୍ଜାବୀ ପରିବାରରୁ ଆସିଥିବା ନିକ୍କି ହାଲି ମଧ୍ୟ ଏହି ଦୌଡ଼ରେ ପୂର୍ବରୁ ସାମିଲ ହୋଇସାରିଛନ୍ତି। ନିକ୍କି ପୂର୍ବରୁ ସାଉଥ୍ କାରୋଲିନାରେ ୨ ଥର ଗଭର୍ନର ଓ ଜାତିସଂଘରେ ଆମେରିକାର ପ୍ରତିନିଧି ଭାବେ ମଧ୍ୟ କାର୍ଯ୍ୟ କରିଥିଲେ।
