ଜଗତ୍ସିଂହପୁର ଅଫିସ, ୫ା୩: ଜଗତ୍ସିଂହପୁର ପୌର ପରିଷଦ ପାଇଁ ଗତ ୨ ତାରିଖରୁ ନାମାଙ୍କନପତ୍ର ଦାଖଲ ପ୍ରକ୍ରିୟା ଆରମ୍ଭ ହୋଇଛି। ନାମାଙ୍କନପତ୍ର ଦାଖଲର ୩ୟ ଦିନ ସୁଦ୍ଧା ଅଧ୍ୟକ୍ଷ ପଦବୀ ପାଇଁ କେହି ଜଣେ ହେଲେ ବି ପ୍ରାର୍ଥତ୍ପତ୍ର ଦାଖଲ କରିନାହାନ୍ତି। କିନ୍ତୁ ଗୁରୁବାର ଜଣେ ଫର୍ମ କିଣିଛନ୍ତି। କାଉନସିଲର ପଦବୀରେ ୨ ଜଣ ନାମାଙ୍କନପତ୍ର ଦାଖଲ କରିଛନ୍ତି। ଏଥିସହ କାଉନସିଲର ପଦବୀରେ ୩୨ ଜଣ ଫର୍ମ କିଣିଥିବା ଜିଲା ସୂଚନା ଓ ଲୋକ ସମ୍ପର୍କ କାର୍ଯ୍ୟାଳୟ ପକ୍ଷରୁ ସୂଚନା ଦିଆଯାଇଛି। ସୂଚନାଯୋଗ୍ୟ ଯେ, ବୁଧବାର ସୁଦ୍ଧା ଅଧ୍ୟକ୍ଷ ପାଇଁ ୨ ଓ କାଉନସିଲର ପଦବୀ ପାଇଁ ୧୪ଜଣ ଫର୍ମ କିଣିଥିଲେ । ପରିଷଦ ଅଞ୍ଚଳର ୨୧ଟି ୱାର୍ଡରେ ୨୫,୫୧୭ ଜଣ ଭୋଟର ଥିବାବେଳେ ସେମାନେ ୧୯ଟି ସ୍ଥାନର ୩୩ଟି ବୁଥ୍ରେ ମତଦାନ ସାବ୍ୟସ୍ତ କରିବା ପାଇଁ ବ୍ୟବସ୍ଥା ହୋଇଥିଲା। ମାର୍ଚ୍ଚ ୯ରେ ମନୋନୟନପତ୍ର ଯାଞ୍ଚ ଓ ୧୦ରେ ବୈଧ ତାଲିକା ପ୍ରକାଶ ପାଇବ। ୧୪ରେ ପ୍ରାର୍ଥତ୍ପତ୍ର ପ୍ରତ୍ୟାହାର ପରେ ଚୂଡାନ୍ତ ପ୍ରାର୍ଥୀ ତାଲିକା ପ୍ରକାଶ ପାଇବ। ତେବେ ଏହା ଭିତରେ କଂଗ୍ରେସ ପକ୍ଷରୁ ଅଧ୍ୟକ୍ଷ ପଦବୀ ପାଇଁ ପ୍ରାର୍ଥୀ ଚୟନ ସରିଥିଲେ ସୁଦ୍ଧା ବିଜେଡି ଓ ଭାଜପାର ଚୂଡ଼ାନ୍ତ ହୋଇନାହିଁ। ବିଶେଷକରି ବିଜେଡିରେ ଏକାଧିକ ଆଶାୟୀ ଥିବାରୁ ଅଡ଼ୁଆ ହେଉଛି। ଆସନ୍ତା ୬ ଓ ୭ ତାରିଖରେ ପ୍ରାୟତଃ ୱାର୍ଡର କାଉନସିଲର ଓ ଅଧ୍ୟକ୍ଷ ପଦବୀ ପାଇଁ ଆଶାୟୀଥିବା ନେତାମାନେ ନାମାଙ୍କନପତ୍ର ଦାଖଲ କରିବେ ବୋଲି ଜଣାପଡ଼ିଛି।
