ଢେଙ୍କାନାଳ ଅଫିସ/ଦେବଗଡ଼(ଡି.ଏନ୍.ଏ.), ୧୯।୧୨:ଓଡ଼ିଶାରେ ବଡ଼ଧରଣର ଜାଲନୋଟ ରାକେଟ୍ ଚାଲିଛି। ପଶ୍ଚିମରୁ କେନ୍ଦ୍ର ଓଡ଼ିଶା ଯାଏ ଲମ୍ବିଛି ଏହାର ଚେର। ଢେଙ୍କାନାଳ ସଦର ଥାନା ଭାପୁର ଫାଣ୍ଡି ରଥପଦା ଗ୍ରାମ ନିକଟରୁ ଶୁକ୍ରବାର ବିଳମ୍ବିତ ରାତିରେ ୧ ଲକ୍ଷ ୯୦ ହଜାର ୬୦୦ ଟଙ୍କାର ନକଲି ନୋଟ ଜବତ ଘଟଣାର ଖୋଳତାଡ଼ ବେଳେ ସ୍ପେଶାଲ ଟାସ୍କ ଫୋର୍ସ (ଏସ୍ଟିଏଫ୍) ଏବଂ ପୋଲିସ ହାତରେ ଲାଗିଛି ବହୁ ଚାଞ୍ଚଲ୍ୟକର ତଥ୍ୟ। ଏହି ଘଟଣାରେ ଦେବଗଡ଼ କଚେରିସାହିର ତୁଷାର କୁମାର ବିଶ୍ୱାଳ ଗିରଫ ହୋଇଥିଲେ। ଖୋଳତାଡ଼ ପରେ ଜାଲ ନୋଟ କାରବାରର ମାଷ୍ଟରମାଇଣ୍ଡ୍ ତଥା ଦେବଗଡ଼ ଗୁରୁସାହିର ତ୍ରିନାଥ ଦାସ ଏବଂ ତାଙ୍କର ଅନ୍ୟତମ ସହଯୋଗୀ ବରପାଲି ସାହିର ବିଶ୍ୱନାଥ ଆଚାର୍ଯ୍ୟ ଓରଫ୍ କାଳିଆ ବନ୍ଧା ହୋଇଛନ୍ତି। ଏହାପରେ ମୋଟ ଗିରଫ ଅଭିଯୁକ୍ତଙ୍କ ସଂଖ୍ୟା ୩ରେ ପହଞ୍ଚତ୍ଛି।
ତ୍ରିନାଥଙ୍କ ନିକଟରୁ ଗୋଟିଏ ଲାପଟପ୍, ପ୍ରିଣ୍ଟର ଜବତ କରାଯାଇଛି। ସେ ଦେବଗଡ଼ ଆଞ୍ଚଳିକ ପରିବହନ ବିଭାଗ କାର୍ଯ୍ୟାଳୟରେ ଜଣେ ଦଲାଲ ଭାବେ କାର୍ଯ୍ୟ କରୁଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଛି। ଏ ସଂକ୍ରାନ୍ତରେ ସଦର ଥାନାରେ ମାମଲା ମଧ୍ୟ ରୁଜୁ ହୋଇଛି। ସୂଚନାଯୋଗ୍ୟ, ଦେବଗଡ଼, ଅନୁଗୋଳ ଜିଲାର ଆଠମଲ୍ଲିକ ଏବଂ ଢେଙ୍କାନାଳ ଜିଲାରେ ଏକ ବଡ଼ଧରଣର ଜାଲ ନୋଟ୍ ରାକେଟ ଚାଲିଥିବା ସୂଚନା ପାଇବା ପରେ ସତର୍କ ହୋଇଉଠିଥିଲା ଏସ୍ଟିଏଫ୍। ତେବେ ଏଥିରେ ସମ୍ପୃକ୍ତ ଅଭିଯୁକ୍ତଙ୍କୁ ଧରିବା ସହଜ ନ ଥିଲା। ଏଥିଲାଗି ଏସ୍ଟିଏଫ୍ ଟିମ୍ ବିଛାଇଥିଲା ଜାଲ। ବିଭାଗୀୟ କର୍ମଚାରୀ ଗ୍ରାହକ ବେଶରେ ଅଭିଯୁକ୍ତଙ୍କ ସହ ସମ୍ପର୍କ ସ୍ଥାପନ କରିଥିଲେ। ଏହାପରେ ସବୁ ଘଟଣାର ରହସ୍ୟ ଉନ୍ମୋଚିତ ହୋଇଥିଲା। ତେବେ ଏଥିରେ ଆଉ କାହାରି ସମ୍ପୃକ୍ତି ଅଛି ସେ ନେଇ ପୋଲିସ ଅଧିକ ତଦନ୍ତ ଚଳାଇଛି।
