କେନ୍ଦୁଝର,୨୧ା୧(ସ୍ବ.ପ୍ର.): କର୍ମଚାରୀ ଅଭାବ ଆଳରେ କେନ୍ଦୁଝର ଜିଲାର ପଦ୍ମପୁର ଓ ବାଂଶପାଳ ଦୁଇଟି ଗୁରୁତ୍ୱପୂର୍ଣ୍ଣ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଦାୟିତ୍ୱରେ ଜଣେ ଡାକ୍ତର(ଅଧିକାରୀ)ଙ୍କୁ ନିଯୁକ୍ତ କରାଯାଇଛି। ଫଳରେ ରୋଗୀଙ୍କୁ ଠିକ୍ ଭାବରେ ସ୍ବାସ୍ଥ୍ୟସେବା ମିଳିପାରୁନାହିଁ। ଉକ୍ତ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଥିବା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରରେ ମଧ୍ୟ ସ୍ବାସ୍ଥ୍ୟସେବା ପରିଚାଳନାରେ ସମସ୍ୟା ସୃଷ୍ଟି ହେଉଛି। ଲୋକେ ଉଚିତ ସ୍ବାସ୍ଥ୍ୟସେବା ପାଇ ନ ପାରି ଜିଲା ମୁଖ୍ୟ ବା ଅନ୍ୟ ଡାକ୍ତରଖାନାକୁ ଯାଇ ଖର୍ଚ୍ଚାନ୍ତ ହେଉଛନ୍ତି।
ଯେ, ସଦର ବ୍ଲକ୍ର ପଦ୍ମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ବରଦାପାଳ, ଜଗନ୍ନାଥପୁର, ରାଇସୁଆଁ, ଜଡ଼ିପଦା, ମଇଦାନକେଲ ଏବଂ ବାଂଶପାଳ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧୀନରେ ଗୋନାସିକା, କାଞ୍ଜିପାଣି, ଫୁଲଝର, ଶୁଆକାଟି, କଲଣ୍ଡା ପ୍ରାଥମିକ ସ୍ବାସ୍ଥ୍ୟକେନ୍ଦ୍ର ରହିଛି। ଆଦିବାସୀ ବହୁଳ ଓ ପଛୁଆ ଅଞ୍ଚଳରୁ ସ୍ଥାନୀୟ ଅଧିବାସୀମାନେ ଏହି ଡାକ୍ତରଖାନାଗୁଡ଼ିକ ଉପରେ ନିର୍ଭର କରନ୍ତି। ମାତ୍ର ଉକ୍ତ ଦୁଇ ଡାକ୍ତରଖାନା ଦାୟିତ୍ୱରେ ଥିବା ଡା. ଏସ୍.ସି ବାଗ ନିୟମିତ ଗସ୍ତ କରୁ ନ ଥିବାରୁ ପ୍ରାଥମିକ ଡାକ୍ତରଖାନାଗୁଡ଼ିକ ଠିକ୍ ଭାବରେ ପରିଚାଳନା ହୋଇପାରୁନାହିଁ। କେତେକ ପ୍ରାଥମିକ ସ୍ବାସ୍ଥ୍ୟକେନ୍ଦ୍ରର ଡାକ୍ତର ତାଙ୍କ ସହ ସୁସମ୍ପର୍କ ସ୍ଥାପନ କରି ଡାକ୍ତରଖାନା ଯାଉ ନ ଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଡାକ୍ତରମାନେ କ୍ୱାର୍ଟର୍ସରେ ନ ରହି କେନ୍ଦୁଝର ସହରରେ ରହୁଥିବାରୁ ସରକାରଙ୍କ ସ୍ବାସ୍ଥ୍ୟସେବା ଆଭିମୁଖ୍ୟ ସଫଳ ହୋଇପାରୁନାହିଁ ବୋଲି ପଞ୍ଚାୟତ ସମିତି ସଭ୍ୟା କିରଣବାଳା ନାୟକ କହିଛନ୍ତି। ଏ ନେଇ ସିଡିଏମ୍ଓ ଡାକ୍ତର କୈଳାସ ଚନ୍ଦ୍ର ପୃଷ୍ଟି କହିଛନ୍ତି, ଡାକ୍ତର ଅଭାବରୁ ଏଭଳି ଦାୟିତ୍ୱ ଦିଆଯାଇଛି। ତେବେ ଅଧିକାରୀଙ୍କ କାମକାର୍ଯ୍ୟ ନେଇ ହେଉଥିବା ଅଭିଯୋଗର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବେ। ଜିଲା ପରିଷଦ ସଭ୍ୟ ରଥ ମୁଣ୍ଡା କହିଛନ୍ତି, ମେଡିକାଲରେ ବିଭିନ୍ନ ଅବ୍ୟବସ୍ଥା ନେଇ ଅଭିଯୋଗ ପାଇଛନ୍ତି। ଏନେଇ ସେ ଉଚ୍ଚ ଅଧିକାରୀଙ୍କ ଦୃଷ୍ଟି ଆକର୍ଷଣ କରିବେ ବୋଲି କହିଥିଲେ। ଅନ୍ୟପକ୍ଷରେ ଦାୟିତ୍ୱରେ ଥିବା ଡାକ୍ତର ବାଗ ସମସ୍ତ ଅଭିଯୋଗକୁ ଖଣ୍ଡନ କରିଛନ୍ତି। ସେ କେନ୍ଦୁଝରରେ ରହିଲେ ମଧ୍ୟ ଡାକ୍ତରଖାନା ନିୟମିତ ପରିଦର୍ଶନ କରନ୍ତି। ସ୍ବାସ୍ଥ୍ୟସେବା ସବୁ ଠିକ୍ ଭାବରେ ଚାଲିଛି ବୋଲି କହିଥିଲେ।
