ଆଇସିସି ଦିନିକିଆ କ୍ରିକେଟ ବିଶ୍ୱକପ୍ର ଦ୍ୱିତୀୟ ସଂସ୍କରଣ ସେହି ଇଂଲଣ୍ଡରେ ୧୯୭୯ରେ ଅନୁଷ୍ଠିତ ହୋଇଥିଲା। ୯ରୁ ୨୩ ଜୁନ୍ ପର୍ଯ୍ୟନ୍ତ ଅନୁଷ୍ଠିତ ପ୍ରୁଡେନ୍ସିଆଲ୍ କପ୍ରେ ଓ୍ବେଷ୍ଟଇଣ୍ଡିଜ ଆଧିପତ୍ୟ ବଜାୟ ରଖି ପୁଣି ଟାଇଟଲ ହାସଲ କରିଥିଲା। ପ୍ରତିଯୋଗିତାର ପ୍ରଥମ ଦୁଇ ସଂସ୍କରଣରେ ଓ୍ବେଷ୍ଟଇଣ୍ଡିଜ ଚାମ୍ପିୟନ ହୋଇଥିଲା। ପ୍ରତିଯୋଗିତାରେ ୮ ଦଳକୁ ନେଇ ମୋଟ ୧୫ଟି ମ୍ୟାଚ ଅନୁଷ୍ଠିତ ହୋଇଥିଲା। ପ୍ରଥମ ସଂସ୍କରଣ ଅପେକ୍ଷା ଏଥର ନୂଆ କଥା ଥିଲା କାନାଡା କ୍ୱାଲିଫାୟର ଟୁର୍ନାମେଣ୍ଟରେ ଭଲ ପ୍ରଦର୍ଶନ କରି ବିଶ୍ୱକପ୍ ଖେଳିବାକୁ ଯୋଗ୍ୟତା ଅର୍ଜନ କରିଥିଲା। ୧୯୭୫ରେ ଖେଳିଥିବା ଇଷ୍ଟଆଫ୍ରିକା ସ୍ଥାନରେ ଏହି ଦଳକୁ ସୁଯୋଗ ମିଳିଥିଲା। ଟୁର୍ନାମେଣ୍ଟର ଫର୍ମାଟ ସମାନ ଥିଲା। ଦୁଇ ଗ୍ରୁପ୍ର ଶ୍ରେଷ୍ଠ ୨ଟି ଲେଖାଏ ଦଳ ସେମିଫାଇନାଲ ଖେଳିବାକୁ ଯୋଗ୍ୟତା ଅର୍ଜନ କରିଥିଲେ। ଭାରତର ପ୍ରଦର୍ଶନ ଏହି ବିଶ୍ୱକପ୍ରେ ଅତ୍ୟନ୍ତ ଦୟନୀୟ ରହିଥିଲା। ଗ୍ରୁପ୍ ‘ବି’ରେ ଦଳ ୩ଟି ଲିଗ୍ ମ୍ୟାଚ ଖେଳି ସବୁଥିରେ ପରାଜିତ ହୋଇଥିଲା। ଏହି ଗ୍ରୁପ୍ରୁ ଓ୍ବେଷ୍ଟଇଣ୍ଡିଜ ଓ ନ୍ୟୁଜିଲାଣ୍ଡ ଏବଂ ଗ୍ରୁପ୍ ‘ଏ’ରୁ ଇଂଲଣ୍ଡ ଓ ପାକିସ୍ତାନ ସେମିଫାଇନାଲରେ ପ୍ରବେଶ କରିଥିଲେ। ଲିଗ୍ ପର୍ଯ୍ୟାୟରୁ କଟି ଯାଇଥିବା ଅନ୍ୟ ୩ ଦଳ ହେଲେ ଅଷ୍ଟ୍ରେଲିଆ, କାନାଡା ଓ ଶ୍ରୀଲଙ୍କା। ସେମିଫାଇନାଲରେ ପାକିସ୍ତାନକୁ ୪୩ ରନରେ ହରାଇ ଓ୍ବେଷ୍ଟଇଣ୍ଡିଜ ଏବଂ ନ୍ୟୁଜିଲାଣ୍ଡକୁ ୯ ରନରେ ହରାଇ ଇଂଲଣ୍ଡ ଟାଇଟଲ ପର୍ଯ୍ୟାୟରେ ପହଞ୍ଚତ୍ଥିଲା। ଲଡର୍ସରେ ଅନୁଷ୍ଠିତ ଫାଇନାଲରେ ଇଂଲଣ୍ଡକୁ ୯୨ ରନରେ ହରାଇ ଓ୍ବେଷ୍ଟଇଣ୍ଡିଜ ଚାମ୍ପିୟନ ହୋଇଥିଲା। ଓ୍ବେଷ୍ଟଇଣ୍ଡିଜର ଗର୍ଡନ ଗ୍ରିନିଜ୍ ୨୫୩ ରନକରି ଟପ୍ ସ୍କୋରର ହୋଇଥିଲେ। ଏହି ଦଳର ଭିଭିଆନ ରିଚାଡର୍ସ ୨୧୭ ଓ ଇଂଲଣ୍ଡର ଗ୍ରାହାମ୍ ଗୁଚ୍ ୨୧୦ ରନକରି ପରବର୍ତ୍ତୀ ୨ ସ୍ଥାନରେ ରହିଥିଲେ। ସେହିପରି ଇଂଲଣ୍ଡର ମାଇକ ହେଣ୍ଡ୍ରିକ ୧୦ ଉଇକେଟ ନେଇ ସର୍ବାଧିକ ଉଇକେଟ ହାସଲକାରୀ ହୋଇଥିଲେ। ୩ ଜଣ ଖେଳାଳି ୯ ଉଇକେଟ ଲେଖାଏ ପାଇଥିଲେ ହେଁ ନ୍ୟୁଜିଲାଣ୍ଡର ବ୍ରାଏନ ମ୍ୟାକକେନି ଓ ପାକିସ୍ତାନର ଅସିଫ ଇକବାଲ ତାଲିକାର ପରବର୍ତ୍ତୀ ୨ ସ୍ଥାନ ଅଧିକାର କରିଥିଲେ।
