ଫରିଦପୁର,୧୫।୧୧: ଇଛାଶକ୍ତି ଦ୍ୱାରା କୌଣସି କାର୍ଯ୍ୟ ମଧ୍ୟ ଅସମ୍ଭବ ନୁହେଁ। ଦୃଢ ଇଛାଶକ୍ତି ରହିଲେ ଅସାଧ୍ୟ କାର୍ଯ୍ୟ ମଧ୍ୟ ସହଜରେ ଓ ସରଳରେ ହୋଇଯାଏ। ଆମେ କହୁଛୁ ଉତ୍ତରପ୍ରଦେଶର ଫରିଦପୁରର ଜଣେ ୧୯ବର୍ଷିୟ ଯୁବକଙ୍କ ବିଷୟରେ। ଅଷ୍ଟମ ଯାଏଁ ପାଠ ପଢି ଗାଁରେ ଟେଲର କାମ କରୁଥିବା ସାହିଲ ଅଲି ନିଜ ହାତରେ ଏକ ଚାରିଚକିଆ ଯାନ ତିଆରି କରିଛନ୍ତି। ମାତ୍ର ୧୮ଦିନରେ ସାହିଲ ଏକ ଇଲେକ୍ଟ୍ରେିକ ଜିପ୍ ତିଆରି କରିଛନ୍ତି। ଏହି ଜିପ୍କୁ ଥରେ ଚାର୍ଜ କଲେ ୧୨୦କିମି ପର୍ଯ୍ୟନ୍ତ ଯାତ୍ରା କରିପାରିବ। ଘଣ୍ଟାକୁ ଏହା ୪୦କିମି ବେଗରେ ଯାତ୍ରା କରିପାରୁଛି। ସେହିପରି ଏଥିରେ ୪ଜଣ ବସିବାର କ୍ଷମତା ରହିଛି।
ସାହିଲ ନିଜ ଗାଁରେ ଏକ ସିଲେଇ ଦୋକାନ ଖୋଲିଛନ୍ତି। ତାଙ୍କ ବାପା ରିକ୍ସା ଚଲାନ୍ତି। ଜିପ୍ ତିଆରି କରିବା ସମ୍ପର୍କରେ ସାହିଲ କୁହନ୍ତି, ପୋଲିସ ଜିପ୍ ତାଙ୍କୁ ବହୁତ ପସନ୍ଦ। ୪-୫ମାସ ପୂର୍ବରୁ ସେ ଏକ ଜିପ ବନେଇବେ ବୋଲି ଚିନ୍ତା କରିଥିଲେ। ତେବେ ଏ ସମ୍ପର୍କରେ ସେ ତାଙ୍କ ବାପାଙ୍କୁ କହିବାରୁ ସେ ମନା କରିଦେଇଥିଲେ। କିନ୍ତୁ ସାହିଲ ନିଜ ଜିଦରେ ଅଟଳ ରହି ଜିପ ପସ୍ତୁତ କରିଥିଲେ।
ଦେଢ ଲକ୍ଷ ଟଙ୍କା ଖର୍ଚ୍ଚ କରି ସାହିଲ ଜିପ ପାଇଁ ସବୁ ଅତ୍ୟାବଶକୀୟ ଜିନିଷ ଯୋଗାଡ କରିଥିଲେ। ପରେ ୟୁଟ୍ୟୁବ, କାର ମେକାନିକଙ୍କ ଦୋକାନ ଓ ବାପାଙ୍କ ଇ-ରିକ୍ସା ଦେଖି ଏହି ମିନି ଜିପି ତିଆରି ପାଇଁ କାମ ଆରମ୍ଭ କରିଥିଲେ। ମାତ୍ର ୧୮ଦିନ ମଧ୍ୟରେ ଏକାକୀ ସେ ଏହି ଗାଡି କାମ ସମ୍ପୂର୍ଣ୍ଣ ଶେଷ କରିଥିଲେ।
ତେବେ ସାହିଲଙ୍କ ଏହି ଗାଡିକୁ ବହୁଜଣ କିଣିବାକୁ ଇଚ୍ଛୁକ ଥିବାବେଳେ ସେ ଏହାକୁ ବିକ୍ରି କରିବାକୁ ମନା କରିଦେଇଛନ୍ତି। କିଛିଜଣ ଏହି ଗାଡିକୁ ଅଢେଇ ଲକ୍ଷରେ କିଣିବାକୁ ମଧ୍ୟ ପ୍ରସ୍ତୁତ ଅଛନ୍ତି।
