ରାଇଘର, ୧୫।୧୨(ଡି.ଏନ୍.ଏ.): ନବରଙ୍ଗପୁର ଜିଲା ରାଇଘର ବ୍ଲକରେ ୧୦ ତାରିଖରେ ମଣ୍ଡି ଉଦ୍ଘାଟନ ହୋଇଥିବା ବେଳେ ବ୍ଲକର ମୋଟ ୫ଟି ସ୍ଥାନରେ ଧାନ କିଣା ନିମନ୍ତେ ପ୍ରସ୍ତୁତି ଆରମ୍ଭ ହୋଇଛି । ଉଦ୍ଘାଟନ ଦିନ ଅଖା ବସ୍ତା ବଦଳରେ ଟଙ୍କା ଫେରସ୍ତ କିମ୍ବା ବସ୍ତା ହିଁ ଫେରାଇବା ଦାବି ସହ କଟ୍ନି ଛଟ୍ନି ଉପରେ ମିଲର୍ସ ମନଇଚ୍ଛା ଚାଷୀଙ୍କୁ ଶୋଷଣ କରୁଥିବା ଅଭିଯୋଗ ହୋଇଥିଲା। ଲ୍ୟାମ୍ପ୍ସ କର୍ତ୍ତୃପକ୍ଷ ଧାନ କିଣିବା ବଦଳରେ ମିଲର୍ସ ନିଜ ଇଚ୍ଛାରେ ଧାନ କିଣାକୁ ନେଇ ଅଭିଯୋଗ ହୋଇଥିଲା। ତେବେ ଅଭିଯୋଗର କୌଣସି ସମାଧାନ ନ ହେବା ପୂର୍ବରୁ ସୋମବାର ରାଇଘର ବ୍ଲକର ମହଣ୍ଡ ମଣ୍ଡି ଉଦ୍ଘାଟନ ନିମନ୍ତେ କାର୍ଯ୍ୟକ୍ରମ ଆରମ୍ଭ କରିଥିଲା। କିନ୍ତୁ ସେଠାରେ କଟ୍ନି ଛଟ୍ନି ବିବାଦ ଯୋଗୁ ଧାନ ଉଠି ପାରିଲା ନାହିଁ l ମହଣ୍ଡ ମଣ୍ଡିରେ ବର୍ତ୍ତମାନ ସୁଦ୍ଧା ଖୋଲା ପଡ଼ିଆରେ ୧୮୭୦ ବସ୍ତା ଧାନ ପଡ଼ି ରହିଛି। ମଙ୍ଗଳବାର ଯୋଡ଼ିଙ୍ଗା ମଣ୍ଡି ଉଦ୍ଘାଟନ ଅବସରରେ ସେଠାରେ କଟ୍ନି ଛଟ୍ନି ବାବଦରେ ୪କିଲୋ ଲେଖାଏ ଧାନ କାଟି ଚାଷୀଙ୍କୁ ଶୋଷଣ କରାଯାଉଥିବା ଅଭିଯୋଗ ହୋଇଛି। ଧାନକିଣା ବ୍ୟବସ୍ଥା ସମ୍ପୂର୍ଣ୍ଣ ଭାବେ ମିଲରଙ୍କ ଭରସାରେ ଚାଲିଛି। ସେମାନଙ୍କ ଇଚ୍ଛା ହେଲା ଧାନ କିଣା ହେବ ନ ହେଲେ ବନ୍ଦ l ମିଲରଙ୍କ ମନମାନି ଯୋଗୁ ଚାଷୀଙ୍କ ମନରେ ଅସନ୍ତୋଷ ପ୍ରକାଶ ପାଇଛି। ଏଭଳି ସ୍ଥିତିରେ ହତାଶ ଚାଷୀ କେଉଁଠି ଅଭିଯୋଗ କରିବେ କିଛି ବୁଝି ପାରୁ ନାହାନ୍ତି। ମିଲର୍ସ ଓ ଚାଷୀଙ୍କ ମଧ୍ୟରେ ବିବାଦ ଯୋଗୁ ମହଣ୍ଡ ମଣ୍ଡିରେ ଧାନ ଉଠିପାରିନାହିଁ । ଅନ୍ୟପଟେ ଆର୍ଏମ୍ସି ପକ୍ଷରୁ ଜଗୁଆଳି ରଖି ସମସ୍ତ ଧାନ ରକ୍ଷଣା ବେକ୍ଷଣ କରିଥିବା ଜଣାପଡ଼ିଛି। କଟ୍ନି ଛଟ୍ନିକୁ ନେଇ ଅନେକ ବିବାଦ ଦେଖା ଦେଉଥିବା ବେଳେ ପ୍ରଶାସନ ଏଥିପ୍ରତି ସ୍ବତନ୍ତ୍ର ଦୃଷ୍ଟିଦେବାକୁ ଦାବି ହୋଇଛି । ବୁଧବାର ଅନେକ ଚାଷୀ ରାଇଘର ମଣ୍ଡିରେ ପହଞ୍ଚତ୍ଥିବା ବେଳେ ସେଠାରେ ମଧ୍ୟ ଅନେକ ଅବ୍ୟବସ୍ଥା ଦେଖିବାକୁ ମିଳୁଛି । ସ୍ବତନ୍ତ୍ର ଭାବେ ସବୁ କିଛି ଚାଷୀଙ୍କ ସୁବିଧା ସୁଯୋଗ ରହିବା ଆବଶ୍ୟକତା ରହିଛି l ଏଠାରେ ମଧ୍ୟ ଚାଷୀ ଲ୍ୟାମ୍ପ, ମିଲର୍ସ, ଆର୍ଏମ୍ସି ଓ ଯୋଗାଣ ବିଭାଗ ମଧ୍ୟରେ ବସି ଧାନ କିଭଳି ଉଠିବ ଆଲୋଚନା ହୋଇଥିଲା। ପରିଶେଷରେ ବ୍ଲକ ହେର୍ଡକ୍ୱାର୍ଟର୍ସରେ ସୁରୁଖୁରୁରେ ଯେଉଁଭଳି ଧାନ ଉଠିବ ସେଥିପ୍ରତି ଗୁରୁତ୍ୱ ଦିଆଯାଇଛି। ଏହା ପରେ ମଧ୍ୟ କଟ୍ନି ଛଟ୍ନିକୁ ନେଇ ଅଙ୍କକଷା ଆରମ୍ଭ ହୋଇଥିଲା l ଚଳିତ ବର୍ଷ ମଣ୍ଡି ଟୋକେନ କମ୍ ପରିମାଣର ଆସିଥିବାରୁ ଚାଷୀଙ୍କ ଚିନ୍ତା ବଢିଛି। ଚଳିତ ବର୍ଷ ଧାନ ଚାଷ ଭଲ ହୋଇ ନ ଥିବାରୁ ସେହି ମାତ୍ରାରେ ଟୋକେନ ଆସି ନ ଥିବାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖିବାକୁ ମିଳିଛି ଏଥିପ୍ରତି ଜିଲା ପ୍ରଶାସନ ଦୃଷ୍ଟିଦେବାକୁ ସାଧାରଣରେ ଦାବି ହୋଇଛି।
